1 Corinthians 2

1Mpo yeya, yo kyoconi ani wule omite akwek comwowok ŋalekap Yiyintet cepo manta ce woŋotin, kipuryo kot oyiyisye yoto ŋalek ce koyec oko ŋomnonet nyewo. 2Omnye yo kicepontekey kyasot kule ayutye kiy ake tokol oŋnkasot Yesu Kristo nkit oko menyi nye kimeci mortowontet. 3Kipuryo kot oponte swama ye kicepontekey ntene kyapotoni pate om muyotet. 4Kunyo ŋalalemwani oko lokoywek ce kyomwowu kuce kipuryo kot kupo polot nyepo ŋomnon nyepo cito. Ntene kiporu kupoyit manta swametap Muyet Nyetilil nyepo Yiyintet. 5Kunyo puryo kuroke kopurune koyenet nyimwoŋ ŋomnonet nyepo cito, ntene kopurune swametap Yiyintet. 6Ntene oŋololi ani ŋalek cepo ŋomnon ye oŋololyini piko co kikilyo om koyenet, ntene puryo kot ku ŋomnon nyepo koroni nto swamet nyepo poytoyik cepo koroni ce mite yawut kucucucktoy kupoku. 7Ŋomnonet nye oŋololi kunye ŋomnonet nyepo Yiyintet nye wuŋat om wule mite piko, nye kikwey Yiyintet keny kupoyit woyinto nyinyacek. Kikwiy kunyo mpo kutompo citany koret. 8Puryo mpo akenke om poytoyik cepo koroni nye nkete ŋomnonet nyitenyi. Nto yunye kikikonket nto kipuryo kot kuwuyitoci cekto neto murtowontet. 9Ntene kuyu wulo mwoytoy silutekap Yiyintet kule: “Tukuk ce tompo kot kukäs koŋnta kenyis, nto kulim yitik, tompo kusot mukuleytap cito, tukuk coto kuce kikwiytoci Yiyintet piko co cöme cekto neto.’’ 10Ntene kikoporwec acek Yiyintet ŋalekyi ce wuŋotin kwiyisye Muyenyi Nyetilil. Cenye Muyet Nyetilil kiy ake tokol nka mpo nye wuŋat om wule mite Yiyintet. 11Omnye ŋo nye nkete kasoteywekap cito, tos pate Muyet nye mite soponto nyenyi orit. Kuyunyoto Muyet Nyetilil kunye nket ŋalek tokol ce nöme Yiyintet. 12Kunyo puryo kot cenyoru acek muyetap soponto nyepo koret, ntene kicekonec Muyet Nyetilil nye cone wule mite Yiyintet, sukuŋet cinket kokotutek tokol ce kikonec Yiyintet. 13Kunyo puryo kot ceŋololi acek ciyiyisye ŋalek ce kinet ŋomnonet nyepo cito, ntene om ŋalek cepo manta ce kinet Muyet Nyetilil, ye ce mite ceŋolyini piko co ponto Muyet Nyetilil. 14Puryo kot kunyoru cito nye moponto Muyet Nyetilil kokotutek ce kwone wule mite Muyet Nyetilil nyepo Yiyintet. Puryo kot kunkete, sute kuyu perperyo pate, omnye nkete pate latik cikwa nkit. 15Muce cito nye ponto Muyet Nyetilil kunket latik cepo kiy ake tokol, ntene puryo ci mpo akenke nye muce konket wule yunto neto. 16Kuyu wule mwoytoy silutekap Yiyintet kule; “Ŋo nye nkete kasoteywekap Mokoryontet? Ŋo nye muce kukoci neto ŋomnonet?’’ Kunyo ceponte acek kasoteywekap Kristo.

will be added

X\