1 Corinthians 16

1Kunyo yawut ŋalek ce nöme pesanik co ciruruce sukuŋet cikalye pikap Yiyintet ce mite Yuteya. Misyini ayiy akwek kuyu wulo kyomwocini ani pikap Yiyintet cepo Kalatiya. 2Roke kukonune ci ake tokol om akwek pesanik tukusic ce kanyor kuyu wule muktoy ye pesyetap santey, sukuŋet mente yec kot ciruruc pesan ye kaco ani wule omite akwek. 3Nteye kaco ani, mosoyokte piko ce kakwey akwek nkit kupa Yerusalem kusut kokotutekwok. 4Nteye keporkey kule mite latik owetekey ani picoto, kuye cepetekey tokol. 5Masoco wule omite akwek om letut ye kawo opunte Meketoniya, omnye amoce kule apunte wuloto. 6Mosopur oko akwek pesyos ce ŋeri, nto pesyet ake opur awany pesyosyek cepo koyitityet tokol. Yoto kuye okalya om poninekyu om wulyo ake tokol wule mosowo. 7Omnye puryo kot amoce ani kule copur oko akwek awany pesyos tukusic pate ye okeytoy. Asoti kule mosopur oko akwek awany pesyos ce caŋ ye kacäm Mokoryontet. 8Ntene mosopur wuli po Efeso okoy pesyetap Pentekoste. 9Yatat kurket om wuli, mite yisyet nyewo nka kot kumite piko ce caŋ ce kerektoy yisyet. 10Ye kuco Timosewo okoy wule omite akwek kumöce kule atoroc oŋerekyi, sukuŋet kuŋerec om wule omite akwek; omnye yiyisyi yisyetap Mokoryontet kuyu wulo oyiyisyi ani. 11Puryo kuroke kot kunyil citake neto, ntene möce akalye kutosyikey poninekyi om kalyet sukuŋet kuketkey kuco amite ani, omnye amite okonye neto oko mpo yeya alak. 12Kunyo ŋalek ce nöme yeya Apolo, kwasaysay ani neto oko mpo yeya alak kule kuco kurutocok akwek, ntene tompo kuwoŋnkyi kule aco yawut pakenke, mosukuco ye kanyor poroyinto. 13Oŋomekitu, oŋnkoyoŋnkye okwilokisye om koyenet, oyiku nyikon oŋnkopoyitu swama. 14Oyiye yisyonutek tokol om cömisyet. 15Oŋnket akwek Stefana oko pikap kanyi, cekto kuce piko ce kinyosyo cewec kwek Kristayek om Akaya kunyo kicikenekey cekto om yisyet nyepo pikap Yiyintet. Mpo yeya, osomok ani kule 16arup kantoyintet nyepo piko ceyucoto oko ci ake tokol nye kolyoyisyi oŋnkwiyisyi wanak oko cekto. 17Oyiku ani ŋerekat omnye kukwa mpo Stefana oko Fortunato oko Akayiko, omnye kukwiy cekto tukuk ce kumo oponte akwek poroyinto nye oyiye. 18Kukuŋereca ani cekto, oŋnkuŋerecak mpo akwek, möce oŋnketi akwek piko ce yuco. 19Kesupayak akwek pikap Yiyintet cepo koretap Asia. Kesupayak akwek Akwila oko Prisika pikap Yiyintet ce tuytos om koto nyimwa om kosupoyisyet nyepo poypoyet om Kristo. 20Kesupayak akwek mpo yeya tokol ce mite wuli asupayikey akwek aŋatutkey kuyu mpo yeya. 21Ani nkit nye kosile ŋalecu om yewumwani. Kasupayak ani Paulo. 22Ye puryo kot kucöme ci ake tokol Mokoryontet, kucupot nyoto! Ico Mokoryontet! 23Opurte akwek tokol poypoyetap Mokoryontenyo Yesu. 24Kopur cömisyet nyimwani wule omite akwek tokol om koyomotet oko Yesu Kristo. Yunyoto.

will be added

X\