1 Corinthians 15

1Mpo yeya, amöce ani yawut kule asotwok akwek lokoywek ce toponec co kyomwowok, coto kuco kyonyoru ce kikwil koyenet nyimwoŋ. 2Lokoywek coto, kuce lokoywek ce toponec co kyomwowok. Mososopce ye kanäm topon lokoywek ce toponec, tos ye kyoyen parak pate. 3Kyomwowok ŋalek ce woyec koromun ce kyonyoru mpo ani, kule, kimeci Kristo miyotyonik kyacek, kuyu wulo kicesilyo om silutekap Yiyintet, 4kule kicemuy neto, oŋnkyiŋet kotutune met om pesyet nyepo somok kuyu wule kicesilyo om silutekap Yiyintet. 5Oŋnkuporkyikey neto Kefa, oko yec kiyokik taman ok oyeny. 6Oŋnkuporkyikey neto yec aret akenke konomikyi ce kikeyte pokolwokik mut ce tokusoptos coto okoy kunyi nka kot kipok alake. 7Yoto kuporkyikey Yakopo oko yec kiyokik tokol. 8Nto om letutap coto tokol, kuporwokey mpo ani kuyu lekwa nye kiciwos. 9Omnye oyiku ani nye miniŋ koromun om kiyokik, nye puryo kot kuyeme cekureno kiyokin, omnye kyotoŋonyi koromun pikap Yiyintet. 10Ntene oyuye wule ayunte om poypoyetap Yiyintet, kunyo puryo kot kupoyit püc poypoyenyi nye kikono ani, ntene kyayiy yisyonutek ce caŋ kupël kiyokik alak tokol, nka kot kipuryo kot ku ani nkit nye kyoyiye, ntene om paypoyetap Yiyintet nye yiyisyi om kule amite. 11Kunyo ye kwone wule amite ani nto kwone wule mite cek kuce, ŋelecato ce cemwoytoy acek tokol oŋnku ŋalecato ce kyoyen akwek. 12Kunyo yawut, ye lokoywek ce cemwoytoy kucu kule, kiciŋet Yesu kotutune met, komuce kulene piko alake om akwek kumwoy kule puryo kot komuce kotutune met piko ce kipok? 13Nteye manta ŋalek coto kuporkey kule kipuryo kot ciŋet Yesu kotutune met. 14Nteye kipuryo kot ciŋet Yesu kotutune met, kuporkey kule po püc pate ŋalek ce kicemwowok acek, oŋnkupoyit koyenet nyimwoŋ püc pate. 15Oŋnkuporkey kule ciperperisyi acek om wule mite Yiyintet omnye kicemwowu kule kiŋet Yiyintet Yesu kotutune met. Ye po manta kule puryo kotutune met piko ce kipok. 16Kunyo ye puryo kot kotutune met piko ce kipok, kuporkey kule kipuryo kot kotutune met Yesu. 17Nteye kipuryo kot kotutune met Yesu kuporkey kule koperperisyo pate koyenet nyimwoŋ oŋnkutoyiku potyotin om miyotyonikwok. 18Kuporkey mpo yec kule kipotyo mpo piko co kipok kucöme cekto Kristo. 19Nteye kokenotet nyinyacek om wule mite Kristo kunye topon om soponto nyepo pesyosyecu pate, nye puryo kito ake yec, kuporkey kule roke cerirenec cikalyec acek kupël ci tokol om koret tokol. 20Ntene ŋolyontet nyepo manta kunyi kule, kiciŋet kotutune met Kristo nye kikwil kule mosiciŋet kotutune met mpo piko co kipok. 21Kuyu wulo kico met kupunune wule mite cito, kuyunyoto mosicitutune met kupunte wule mite cito. 22Kuyu wulo kipok piko tokol omnye kipunune cekto koyomotet nye ponto oko Atam, kuyunyoto mosiciŋet kotutune met piko tokol kupunune koyomotet nye ponto oko Kristo. 23Ntene oŋnku ci tokol om otepto nyenyi kwine nkit om pesyet nyo cone neto. Kristo kunye po tayta, kuker piko cepo Kristo. 24Nteye kapok coto kuco pesyet nyepo letut, ye mosukokoyto neto poytoyisyet kukoci Yiyintet om letut ye kakwaranta poytoyisyonik tokol oko swamanik oko kamukeywek. 25Omnye misyini kupoytoyis Kristo okoy kupël Yiyintet punikyi tokol oŋnkukoci kopurune ŋonyutap kerenkokyi. 26Puniyontet nyepo letut nye mosicipël ku met. 27Omnye mwowu silutekap Yiyintet kule, “Kikokoci Yiyintet kopurune tukuk tokol ŋonyutap kerenkokyi.’’ Poru ŋalecu kule, “Tukuk tokol.’’ Kunye puryo kot kumite orit mpene Yiyintet nyo kikoci kopurune tukuk tokol ŋonyutap Kristo. 28Ntene ye kocikoci kopurune tukuk tokol poytoyisyet nyepo Kristo, kunyo Werit nkit nye mosukuweckey kupurune ŋonyutap Yiyintet nyo kikokoci kopurune tukuk tokol wule mite Kristo, sukuŋet kupayta Yiyintet tukuk tokol. 29Kunyo yawut yec, nto piko ce kicepatisan om kaynetap piko co kipok? Mosukunyor coto kiy ne? Nteye po manta kule puryo kot kotutune met piko co kipok, kunyo omne sicepotisone cekto om kaynetap co kipok? 30Nto acek omne sicetaŋany kila sawa. 31Mpo yeya, orice ani met okokoy, kupo silotet nye oponte om wule omite akwek om soponto nyepo Kristo kunye sutwo omwowu ŋalecutecu. 32Kiy ne nye omuci onyoru ani kuyu cito nye kyoporye oko tyoŋik om wuli po Efeso. Kunyo ye puryo kot komuce kotutune met piko co kipok, Kyaste nas, kyomisye oŋnkyeyesye omnye mocepoku tun. 33Monte ciperperak: “Coronutek ce miyotec kuce wurtoy kopurto nye topon.’’ 34Oketyikey akwek kasoteywek cikwok cepo manta, ayaste arustunwekwok cepo miyotyet. Komwowu ani ŋalecu kusornenok akwek, omnye menkete piko alake om akwek Yiyintet. 35Mosukutep citake kule, “Muce kotutune met piko ce kipok kulene? Mosukunyor cekto porto nye yu ne?’’ 36Yiku nyi perper! Ye kekol nyi kupuswontet, ku puryo kot kume kunyo nto turu kupit. 37Kole nyi koci ŋony kupuswontet nkit, oŋnkopo nkanu nto kupuswo ake tokol, ntene puryo kot ku ketit tokol nye pite kuwoyit. 38Kocini Yiyintet kupuswontonoto porto kuyu wule moktoy. Kocini kupuswo ake tokol porto nye nyenyi nkit. 39Puryo kot kukerkey panyek cepo tukuk tokol ce soptos. Ponto piko panyek cikwa, kuponto tyoŋik panyek cikwa, kuponto toritek panyek cikwa, kuponto purpurunek panyek cikwa. 40Kunyo mite mpo tukuk cepo koret torot oko tukuk cepo koret ŋony, kumite toponiyet nyepo tukuk cepo torot, oŋnkumite toponiyet nyepo tukuk cepo ŋony. 41Ponto asista toponiyet nye nyenyi nkit, kuponto arawet toponiyet nye nyenyi nkit, oŋnkuponto kokelik toponiyet wok ce cepciyotin, omnye puryo kot kukerkey kokelik om toponiyet nye ponto. 42Mosukwiytakey nyoto om pesyet nyo tutune met piko. Nune porto ye kacemuy, puryo kot kunune porto ye kakotutune met. 43Cemuye porto nye puryo kot kuponto woyinto, ntene tutune met porto nye ponto woyinto. Cemuye porto nye puryo kot kuponto swamet, ntene tutune met porto nye ponto swamet. 44Cemuye kuyu porto nyepo kwak, ntene tutune met kwek porto nye ponto soponto nyepo okokoy. Ye mite porto nyepo kwak, kumite yec mpo porto nye ponto soponto nyepo okokoy. 45Omnye mwowu silutekap Yiyintet kule, “Kicitany Atam cito nyepo tayta kusop kuponto soponto nyepo kwak,’’ ntene Atam nyepo letut kunye konu Soponto nyepo Muyet Nyetilil. 46Puryo kot kunyosyi kuco soponto nyepo okokoy, ntene soponto nyepo kwak nye nyosyi ntekere soponto nyepo okokoy. 47Kicitany Atam nyepo tayta kucone teŋek, ntene cone Atam nyepo oyeny torot. 48Kerkey piko cepo koret oko cito nyo kicitanye teŋek cepo koret, kukerkey piko cepo torot oko cito nyo cone torot. 49Kuyu wulo kicilac acek tonto nyepo cito nyo kicitanye teŋek, kuyunyoto musicilac tonto nyepo cito nyo cone torot. 50Mpo yeya, ŋalek ce koporu ani kucu kule, puryo kot kunyoru porto oko korotik poytoyisyet nyepo Yiyintet, oŋnkupuryo kot kunyoru kito nye nune kito nye puryo kot kunune. 51- 52Olim omwowok ŋalecu wuŋotin kule, puryo kot cepoku acek tokol, ntene ye kaciy kontit nyepo letut mosicewecec acek lakwar kuyu wulo lekecectoy koŋnta. Omnye ye kaciy kontit mosokuŋetyo piko nye komo kopoku mosicewecewecec acek tokol. 53Omnye misyini kulac kito nye nune kito nye puryo kot kunune, oŋnkulac kito nye me kito nye puryo kot kume. 54Yoto ye kacilac kito nye nune kilokyi kito nyo puryo kunune, oŋnkyilac kito nye me cilokyi kito nye puryo kot kume. Yoto kuye kwitita kupoyit manta silutekap Yiyintet kule, “Kakyaranta met, kupok poryet!’’ 55“Nyi met, pëlisyi nyi oyu? Nyi met, ono swamet nyeŋuŋ.’’ 56Nyortoy met swamet nye wutisye wule mite miyotyet, kunyortoy miyotyet swamet nye wutisye wule mite ntarastinek. 57Ntene cikaste Yiyintet nye konec acek cipëlisye kupunte Mokoryontenyo Yesu Kristo. 58Kunyo mpo yeya cämanik, oyoŋnkye okwilokisye topon, oyiyisye okokoy om yisyemwoŋ nyepo Mokoryontet, omnye oŋnketi akwek kule puryo yisyo nye oyiye om yisyetap Mokoryontet nye moponto latik.

will be added

X\