1 Corinthians 14

1Kunyo möce otyiki koromun onyoru cömisyet. Okoci kurup mukuleywek cikwok kokotutek cepo Yiyintet ntene kupëlis oŋnket amwayte lokoywekap Yiyintet. 2Cito nyo ŋolole ŋelyepik alak kunye puryo kuŋololyini nyo piko, ntene ŋololyini Yiyintet. Omnye puryo ci nye lime ŋalekyi. Ŋolole neto ŋalek cepo manta ce wuŋotin om swametap Muyet Nyetilil. 3Ntene cito nyo mwoytoy lokoywekap Yiyintet kunye ŋololyini nyo piko, kukalya kutitir oŋnkuŋerec cekto. 4Cito nyo ŋolole ŋelyepik alak, kolyoykey neto nkit. Ntene cito nyo mwoytoy lokoywekap Yiyintet kunye kolyoy pikap Yiyintet tokol. 5Amöce ani kule nto aŋalal akwek tokol ŋelyepik alak, ntene amöce kupëlis kule oponte kokotutek ce mwoytoy lokoywekap Yiyintet. Omnye cito nye ŋolole kumwowu lokoywekap Yiyintet kunye ponto nyoto latik kupël cito nyo ŋolole nelyepik alak, tos pate ye mite yoto cito ake nye koror topon ŋalek ce mwowu cicoto, sukuŋet kukalya pikap Yiyintet tokol. 6Kunyo mpo yeya, mosonyoru akwek latik pa, ye kaco ani wule omite onŋkyaŋalale ŋelyepik alak? Puryo mpo kisic, tos pate ye kosutwok ani ŋoŋutyet ake nye cone wule mite Yiyintet, nto ŋomnonet ake, nto lokoywek alak cekwone torot nto konetisyet ake. 7Nka mpo tukuk co moponto soponto kuyu kurerut nto pukantit, muce citake kunket kule tum ne nye pute ye puryo kot ceput kutok topon. 8Ye puryo kot kukut cito kontit kutok topon, komuce kulene piko kuyiytakey kupa poryet? 9Kuyunyoto mpo muce kunket cito ake kulene ŋalek ce ŋololi nyi ye ŋolole ŋelyepik alak ce puryo kot celime topon? Mosukusut yomet pate ŋalekuk! 10Mite ŋelyepik wok ce caŋ, ce mite koret tokol, oŋnkurok kuponto ŋelyepta ake tokol kito nye poru. 11Ntene ye puryo kot aŋnket ani ŋelyepta nye ceŋolole, mosukwek cito nyo ŋolole tontet om wule amite ani, oŋnkoyeku ani tontet om wule mite neto. 12Kunyo ye omöce akwek koromun kule cenyoru kokotutek cepo Muyet Nyetilil, kumöce asyem oyiyisye aŋalal kupëlis ŋalek co kolyoy pikap Yiyintet. 13Kunyo misyini cito nyo ŋolole ŋelyepik alak kusome kokotutek sukuŋet konket kule mwowu ne ŋalek co ŋolole neto. 14Omnye ye kosom ani om ŋelyepta nye menket ake, kusome mukuleyto nyimwani manta, ntene oŋnkupuryo kot kumite kasoteywek wule mite ŋolyontonoto. 15Kunyo masayiy kulene? Mososom om mukuleymwani ntene oŋnkosom mpo om kasoteywekwani, mosotum om mukuleymwani, ntene oŋnkotum mpo om kasoteywekwani. 16Ye kesom kaste Yiyintet om mukuleyto pate, kumuce kulene cito ake nye püc pate nye mite kusome kumwoy kule, “Yunyoto.’’ Om somseŋuŋyi nyepo kakastayet? Puryo komuce neto kot konket ŋalek ce mwowu nyi. 17Nka kot kutopon somset nyeŋuŋ nyepo kakastayet om wule mite Yiyintet, kupuryo kot kukolyoy mpo kisic cito nyin ake. 18Okostoy Yiyintet omnye oŋololi ani ŋelyepik alak kupëlok akwek tokol. 19Ntene pëlisyi ye kaŋalal ŋalek mut ce toku om sayet nyepo pikap Yiyintet saŋet anet piko alak, kusir ye kaŋalal ŋalek elifunek ce caŋ om ŋelyepik ce puryo kot kulime piko. 20Mpo yeya, monte cipurte kasoteywek cepo lekwantit, opur kuyu lekoy om wule miyotyet. Ntene oŋnkopurte kasoteywek cepo piko ce woyec. 21Kicesil om silutekap Yiyintet kule: “Komwoy Mokoryontet kule, Mosoŋolyolyi ani picu, oyiyisye piko cepo ŋelyepik alak, oko kutuwak cepo piko alak, ntene nka mpo yoto kupuryo kot kulimwo pikwani.’’ 22Kunyo ŋalalet nyepo ŋelyepik alak kunye porcini ŋalek piko co puryo kot kuyen, nto ŋalalet nye cemwoytoy lokoywekap Yiyintet kunye porcini ŋalek piko co kikoyen. 23Kunyo ye keyomokey pikap Yiyintet oŋnkucec kuŋalal om ŋelyepik alak, oŋnkukwa orit piko cepo saŋ nto piko co puryo kot kuyen, kupuryo kot kumwowu cek kule kopunwok akwek metewok? 24Ntene ye kaŋalal piko tokol lokoywek cepo Yiyintet, oŋnkukwa orit piko alak cepo saŋ nto piko co puryo kot kucömis, mosukonket cito miyotyenyi om ŋalek ce kalim ce cemwowu mosukumutyikey musankut. 25Mosukonket om moyenyi, mosukukutuny oŋnkusay Yiyintet kuror kumwoy kule, “Oponte akwek Yiyintet kupoyit manta.’’ 26Mpo yeya, ŋalek ce omwowu cu. Ye koyomekey akwek om sayet, kuponto cito ake tumnto, kuponto ake konetisyet, kuponto ake ŋoŋutyet nye cone wule mite Yiyintet, kuponto ake ŋalalet nyepo ŋelyepik alak, oŋnkumuce cito ake mpo kupor kule mwowu ne ŋalek ce komwoy.Kumöce kule kukalya ŋalecato tokol pikap Yiyintet. 27Ye möce cito ake kule waŋalal ŋelyepik alak, kumöce kuŋalal piko oyenku nto somok kurupekey picoto oŋnkuroke cito ake kupor topon kito nye mwowu ŋalecato. 28Nteye puryo kot kumite yoto cito ake nye muce kot kupor kule mwowu ne ŋalecato, kuroke kusis nye maŋalal cito nyo ŋolole ŋelyepik alak om tuyet, ntene kuŋalal neto kwine nkit oko Yiyintet. 29Misyini kuŋalal pate piko oyeny nto somok ce kocikoci lokoywekap Yiyintet, oŋnkulimnta piko alak kukäs koyoyec topon ŋalek ce mwowu. 30Nteye kanyor cito ake nye kepur tuyet lokoywek ce kwone wule mite Yiyintet, kumisyini kusis cito nyo koŋolole. 31Omuci akwek piko tokol ce mite tuyet oŋalale akenke akenke sukuŋet anetkey cititirok. 32Möce cito nyo mwoytoy lokoywek cepo Yiyintet kurip topon ŋalek ce ŋolole. 33Omnye Yiyintet kunye puryo kot kupo tankwarat, ntene Yiyintet nyepo kalyet. Kuyu wule yunto om wulyo tokol wule mite pikap Yiyintet, 34Möce kusisio koruk ye mite cek tuyet nyepo pikap Yiyintet. Puryo kot ce cömncini cekto kuŋalal kuyu wulo mwowu ntarastinek. 35Ye möce kule cinket ŋolyo ake tokol, kuroke kutepe sanikwa ye mite korikwa. Ŋolyo nyepo kalilan ye kaŋalale korko tuyet nyepo pikap Yiyintet. 36Kicone so ŋolyontetap Yiyintet wule omite akwek? Nto kico wule omite akwek nkit? 37Ye sote cito ake kule oyiku kiyokintetap Yiyintet, nto sote kule oponte kokotutyet nyepo soponto nyetilil, kumisyini konket cicoto kule ŋalecu osilwok ani kuce kwone ntarastinekap Yiyintet. 38Ye katay malim ŋalecu, kumerok mpo olimnci akwek neto. 39Kunyo mpo yeya, asat mukuleywekwok om mwaytayet nyepo lokoywekap Yiyintet, ntene monte omwaytatet akerekte ŋalalet nyepo ŋelyepik alak. 40Misyini kyiy kiy ake tokol topon om aret nye rotat.

will be added

X\