1 Corinthians 13

1Nka mpo ye amuci ani aŋalal ŋelyepik cepo piko, nto ŋelyepik cepo Malaykanik, ntene oŋnkupuryo kot oponte cömisyet, ku kerkey ŋalalemwani oko kiy nye kyiye nto kerkey twolik ce kwerekey. 2Nto mpo ye aponte swamet nyepo workoyontit nye omuci aŋnket tukuk tokol ce wuŋotin oŋnkoponte ŋomnonet tokol, oŋnkoponte mpo koyenet nye omuci aŋet tulonok, ntene oŋnkurok yec moponte cömisyet, ayiku ani püc pate. 3Ye omuci mpo okoyte tukuk tokol ce oponte, okoci pononik; oŋnkokoyte cepel porto nyenyu, ntene ye moponte cömisyet, kupuryo kot onyoru kiy. 4Cömisyet ku muytocinotet oko poypoyet, cömisyet kunye puryo kot ku corokyinot nto koperperisyo nto silotet. 5Puryo kot kwiye cömisyet sornon, nto puryo kot kunyeru lakwar, cömisyet kunye puryo kot kuyukyini mukuley ŋolyo. 6Puryo kot kuŋerekyini cömisyet miyotyet, ntene ŋerekyini pate ŋalek cepo manta. 7Ripe cömisyet kiy ake tokol, oŋnkuyene kiy ake tokol, ponto kokenotet om kiy ake tokol, oŋnkumuytocini kiy ake tokol. 8Cömisyet kunye puryo kot kupoku kenyis, mosukupok ŋorsyet, mosukupok ŋalalet nyepo ŋelyepik, mosukupok ŋomnonet. 9Omnye puryo kot cinket tukuk ciwoŋnkyi oŋnkupuryo kot ceŋorsyi ciwoŋnkyi. 10Ntene ye kakwa tukuk cepo manta, yoto kuye mosukupotyo co mocinket ciwoŋnkyi. 11Ye kyoyiku ani lekwa, kyosoti kuyu lekwa, kyonketi ŋalek kuyu lekwa, nteyu kowo ayiku ci nyewo ayaste cepo lekwantit. 12Kito nye ceköse acek yawut kunye kerkey oko kerkeyin nye motoku topon nye ceköse ciyoyit. Ntene om letut mokwocekäs acek Yiyintet om konyekyacek. Aŋnketi ani yawut kereryantet ake pate, ntene mosonket topon koromun om pesyosyek co kwoni kuyu wulo kicinketo. 13Kunyo om tukucutecu somok, koyenet kokenotet, oko cömisyet nye nyewo nye pëlisyi cömisyet.

will be added

X\