1 Corinthians 12

1Mpo yeya, amöce ani kule oŋnket akwek ŋalek cepo manta, ce nöme kokotutek ce kwone wule mite Muyet Nyetilil. 2Oŋnket kule yo kito oyiku akwek pic ce monket Yiyintet, ku kipoytok yoto kerkeyik ce moponto sopon ce kimosok omosokisye. 3Kunyo misyini oŋnket kule puryo ci nye ntocini Muyet Nyetilil nye muce kot kucupis kumwoy kule, “Kupot Yesu.’’ Oŋnkupuryo ci nye muce kuŋalal kumwoy kule, “Yesu kunye Mokoryontet,’’ okoy ye ntocini Muyet Nyetilil nyoto. 4Mite kokotutek ce pciyotin wok ce caŋ, ntene konu tokol Muyet Nyetilil akenke. 5Mite mpo arosyek wok ce caŋ ye cikolyoyisyi, ntene keyicini Mokoryontet akenke. 6Mite arosyek wok ce caŋ wule muce cito kwiyiyta yisyonutek, ntene Yiyintet akenke nye kocini ci ake tokol kwiy yisyonutek tokol. 7Kocini Muyet Nyetilil ci ake tokol kopur wule yunto, sukuŋet kukalya piko tokol. 8Kocini Muyet Nyetilil cito ake ŋomnonet oŋnkukoci Muyet nyitenyi akenke cito ake lokoywek cepo konketotet. 9Kocini Muyet nyitenyi akenke cito ake koyenet, oŋnkukoci cito ake swamet nye sopse. 10Kocini Muyet Nyetilil cito ake swamet nye yiye tukuk cepo kakitat, oŋnkukoci cito ake kokotutyet nye muce kuŋalal kupor lokoywekap Yiyintet, oŋnkukoci yec mpo cito ake komuc kot kumwoy pciyatet nyepo kokoteywek cepo Muyet Nyetilil oko ce puryo kot kupo Muyet Nyetilil. Kukoci yec cito ake komuc kot kuŋalal ŋelyepik alak, kukoci cito ake kupor kule mwowu ne ŋelyepicoto. 11Ntene Muyet Nyetilil akenke nyitenyi kunye yiye tukucutecu tokol. Kocini neto ci ake tokol kokotutek ce pciyotin kuyu wule moktoy. 12Omnye kerkey Kristo oko porto nye akenke nye ponto kereryanik wok ce caŋ oŋnkurok ku akenke porto nka kot kiciy cituyo kereryanik wok ce caŋ ce pciyotin. 13Kuyunyoto mpo acek tokol Yutayek oko Lamek, oko mutworik, oko piko co kicityac, kicepatisanec ciku porto akenke om Muyet Nyetilil akenke, kunyo kicekonec ceye Muyet Nyetilil akenke. 14Omnye porto kunye puryo kot ku kiy akenke, ntene ponto kereryanik wok ce caŋ. 15Nto kwemuce kerenket kumwoy kule, “Puryo kot opoye ani porto omnye puryo kot oyiku yewut.’’ Kupuryo ra kot komuce kerenket mopoyit porto? 16Nto kumwoy mpo yitit kule, “Puryo kot opoye ani porto omnye moyiku koŋnta.’’ Komuce ra kot kukerekta mopoyit porto. 17Nto kikwek porto tokol koŋnta, nto kilime ŋalek kulene? Nto kikwek porto tokol yitit, nto kiŋutoy cito kulene? 18Kunyo kuyu wule yunto, kikoci Yiyintet porto tukuk wok ce pciyotin kuyu wule moktoy. 19Nto yunye kikwek porto kiy akenke nto mite porto kulene? 20Kunyo ponto porto kereryanik ce caŋ ntene akenke porto. 21Kunyo puryo kot komuce koŋnta kumwoci yewut kule, “Puryo kot omociŋ ani nyi.’’ Nto mpo yec kumwoci metit kerenkok kule, “Puryo kot omöcok ani akwek’’ 22Ntene ŋalek cepo manta kucu kule, kereryanik cepo porto ce cisote kule puryo kuponto swamet kuce ce möce coto koromun. 23Nto kereryanik cepo porto co ce nyile kule puryo kuponto latik koromun, kuce cikostoy acek kule ponto woyinto, nto kereryanikap porwonik cicacek co puryo kot kutoku topon, kuce ceripe coto topon. 24Kereryanik co toku topon kuce puryo kot kumoce kule cerip topon. Yiyintet nkit kunye kituyo porwonikyacek, sukuŋet kukoci woyinto kereryanik co puryo kot kuponto latik. 25Kunyo puryo kot kupciyat porto, ntene yicintos kereryanik tokol cepo porto. 26Ye kataŋany kereryantet akenke nyepo porto, yoto kutaŋany mpo cut tokol oko kereryantet nyoto. Nteye kacikasta kereryantet akenke nyepo porto, kuŋerec kereryanik cut tokol. 27Kunyo oyiku akwek tokol porto nyepo Kristo oŋnkupo yec ci ake tokol om akwek porto nyenyi. 28Om piko cepo Yiyintet, kikokoci neto ci tokol yisyenyi. Cepo tayta ku kiyokik, cepo oyeny ku workoyik, cepo somok ku konetik oko co yiye tukuk cepo kakitat, oko co sopsi, oko co kolyoyisyi, oko co poytoyisyi, oko co ŋolole ŋelyepik alak. 29Puryo kot kweku piko tokol kiyokik. Puryo kot kweku piko tokol workoyik. Puryo kot kweku piko tokol konetik. Puryo kot kwiye piko tokol tukuk cepo kakitat. 30Puryo kot ku ponto piko tokol kokotutek ce sopsi, moŋolole piko tokol ŋalyepik alak, nto mpo kuŋor kumwoy kule mwowu ne ŋalecato. 31Ntene okoci mukuleywekwok kucorokyi kokotutek ce woyec koromun. Kunyo moporwok ani aret nye topon nye pelisyi.

will be added

X\