1 Corinthians 11

1Kunyo orup wule ayunte ani, kuyu wulo arupe ani wule yunto Kristo. 2Okostok ani akwek, omnye osoti okokoy oŋnkorup kanetisyet nye kyanetak. 3Ntene möce kule oŋnket akwek kule Kristo kunye nyewo om wule mite ci ake tokol. Nyewo santet om wule mite korkenyi, kunyo nyewo Yiyintet om wule mite Kristo. 4Kunyo ci tokol nye mwoytoy ŋolyontetap Yiyintet om sayet nyepo piko tokol kuyenot metit nyenyi kesornen cicoto Kristo. 5Nto korko nye soye nto mwoytoy ŋolyontetap Yiyintet om sayet nyepo piko tokol kupuryo kot koyen metinyi kunye kesornen korkonoto santenyi. Omnye kerkey nye rwakat metinyi. 6Ye puryo kot kuyen korko metinyi, kuroke kurwac putek, ntene omnye kiy nyepo kalilan ye karwac korko metit, kunyo roke kuyen metinyi. 7Puryo kot kuroke kuyen morono metinyi omnye poru tonto oko woyintap Yiyintet. Ntene poru korko woyinto nyepo cito. 8Omnye kipuryo kot citany moron kucone wule mite korko, ntene kicone korko wule mite morono. 9Kipuryo mpo kot citany moron kupo korko, ntene kicitany korko kupo moron. 10Kunyo misyini kuponto korko kito nye yene metinyi kupo malaykanik nye poru kule poytoy santenyi neto. 11Ntene om soponto nyepo Mokoryontenyo, puryo kot kumite korko ye puryo moron, oŋnkupuryo kot kumite morono ye puryo korko. 12Kuyu wulo kicitany Korko kucone wule mite morono, kuyunyoto kunyo iye yawut korko moron, ntene kwone tukuk tokol wule mite Yiyintet. 13Amut akwek nkit musankut, misyini pa kusome korko om tuyet nyepo pikap Yiyintet ye puryo kuyen metit? 14Puryo kot kunetak akwek ne koret kule sornon ye kepit morono putek? 15Ntene toponec kuromun putek om wule mite korko, kicikoci neto putek ce koyec sukuŋet kuyene metit. 16Ye möce citake kule otinten, ŋalek tokol ce omwowu ani kucu, puryo kot ceponte acek nto mpo pikap Yiyintet kopurto ake nyepo sayet. 17Puryo kot okostok ani akwek om ŋalek cu amöce omwowok, ye koyomekey akwek om sayet nyimwoŋ oyiye ce miyotec ye kotoyiye ce toponec. 18Nyepo tayta kunyi kule, kicemwowo kule mite piko ce tintentyinos kupciykey ye koyomekey akwek pikap Yiyintet. Acöme ani kule pesyet ake po manta ŋaleca. 19Omnye roke kumite pciyatet om wule omite akwek sukuŋet cinket kutok piko cepo manta. 20Ye koyomekey akwek wanak kupuryo kot okwoni kule kwokyam omikap Mokoryontet. 21Omnye ye oyomisyi kutosyinikey citake kwan omikyi nkit okoy kwam alak rupet, kupokit piko alake. 22Omne? Puryo kot oponte akwek korikwok wule oyomisye oŋnkoyesye? Oŋnkokoci kolilonis piko ce moponto kiy? Nto onyile akwek pikap Yiyintet? Momwowok ani ne? Makastak om ŋalecato? Puryo kot okostok. 23Omnye ŋalek ce kikono ani Mokoryontet kuce kyanetak kule; om kwomowut nyo kiceŋomntoy neto, kunäm yoto Mokoryontet Yesu Mukatyantet, 24oŋnkusomci kukasta Yiyintet, oŋnkupetec oŋnkumwoy kule, “Nyi kunye pormwani nye kacekonok akwek, oyiye kuyunyi ye asoteno ani.’’ 25Kuyunyoto om letutap omik, kunäm cikompet oŋnkumwoy kule, “Cikomponi kunye kirotyet nyelel nyepo Yiyintet nye kociporune pelutyet nyepo korotik. Ye koye akwek, oyiye kuyunyoto ye asoteno ani.’’ 26Omnye om pesyo tokol ye kayam Mukatyantet oŋnkoye cikomponi kuye omwoytoy yoto metap Mokoryontet okoy kuco neto. 27Kunyo, ye kam citake mukatyantet oŋnkuye cikomponi om aret nye puryo kot kuyeme mosukulel cicoto kowurta porto oko koritikap Mokoryontet. 28Kunyo misyini kukaskey citake nkit topon kunyo kutompo kwam mukatyantet oŋnkuye cikompet. 29Omnye ye puryo kot konkete neto kito nye poru portap Mokoryontet ye ome mukatyantet oŋnkuyesye cikompet ku kosutyikey cicoto nkit musankut ye mite kwomisyi oŋnkuyesyi. 30Yunyoto sukuŋet kumnyonis moponto swamet alake ce caŋ om akwek, oŋnkupotyo mpo alak. 31Ye kocemutyikey acek nkit musankut nyepo manta, kupuryo kot cemutwec musankut. 32Ntene omnye Mokoryontet kunye mutwec musankut oŋnkupirec, sukuŋet mente cemutwec musankut wanak oko koret. 33Kunyo mpo yeya, ye koyomekey akwek wanak kule kyam omikap Mokoryontet, roke akanynkey tokol. 34Nteye ponto cito ake rupet, ku misyini kwomis kunyo kanyi, sukuŋet mente kumutwok akwek Yiyintet musankut ye koyomekey wanak. Nto ŋalek ce nöme tukuk alak mosicasat ani ye kaco.

will be added

X\