1 Mpo yeya, amöce ani kule oŋnket akwek kito nye kikwiyakay om wule mite mpo kukonyo co kirupe Moses. Kilum kukerekta polyet cekto tokol okoy kway topon tokol ruretyet nye arrar. 2 Kicepatisan cekto tokol om polyet oko ruretyet kwek konomikap Moses. 3 Kikwam tokol mukatyantet nyepo Yiyintet, 4 oŋnkuye tokol peko cekosune wule mite Yiyintet ce kikwone rwantetap Yiyintet. Rwantet nyoto kunye kipesetoti oko cekto nyoto kunye Kristo. 5 Ntene kipuryo kot kuŋerec Yiyintet om wule mite cekto ce caŋ, kunyo kiseretyi muswek cikwa koret nyepo kitela. 6 Kunyo porwec tukucutecu kusowec acek tokol kule puryo kot kuroke cecäm tukuk cepo miyotyo kuyu wule kiyunto cekto. 7 Nto mpo kule cesay kerekeyik kuyu wulo kikwiyta alake om cekto, kuyu wulo mwowu silutekap Yiyintet kule, “Kipur piko ŋony kwomis oŋnkuyesyo oŋnkuŋetyo kutum.’’ 8 Puryo kot kumisyini ceyiy acek sakwayanat kuyu wulo kikwiyta alake om cekto okoy kupok pesyet akenke alake om cekto ce kiyite elifunek tiptem ok somok. 9 Puryo kot kumisyini cesyem acek Mokoryontet kuyu wule kikwiyta alake om cekto okoy kupakäc erenok cekto. 10 Puryo kumisyini kot aŋunyŋuny akwek kuyu wule kikwiyta alake om cekto okoy kupakäc malayket nyepo met cekto. 11 Kikwiyokis ŋaleca om wule mite cek sukuŋet kwek koporunot om wule mite piko alake, kunyo kicesil ŋalecato sukuŋet kusowec acek. Omnye ce mite acek pesyosyek ce karik kuponto pesyet nyepo letut. 12 Cito nye sote kule omite koyony topon kuroke kuripkey sukuŋet mente kosuto. 13 Syemutok tokol ce kokwontyok kuce kerkey oko syemutok cepo kwak ce kwontyini piko tokol. Ntene ripe Yiyintet kurtoyenyi, kunyo puryo kot kucöme kule cesyemak akwek kusir wule tento swamet nyimoŋ. Ntene ye kasyemak mosukukonok neto swamet nye omukte oŋnkuporwok aret nye mopunte. 14 Kunyo coronutekwani, oripkey monte cesay kerekiyik. 15 Oŋololwok kuyu piko ce oyiku ŋomec, kunyo akäs akwek nkit ŋalek ce mwowu ani. 16 Cikompet nyepo kupeyok nye cikoste acek Yiyintet kunye puryo kot ceyemntoy acek om korotikap Kristo ye koceyesye cikompet nyenyi? Nto Mukatyantet nyo cepeteci kunye puryo kot ceyemntoy cepcicine om portap Kristo ye kyome? 17 Mite mukatyantet akenke pate, kunyo nka kot ciku acek caŋ, ntene ciku porto akenke. Omnye ceyemntoy cepcicine mukatyantet nyoto akenke. 18 Asot pa Yutayek piko co ome korosek ce cikoytoy kuce yemntoy kupcicin yisyetap Yiyintet om otepto nye pele korosek. 19 Ŋolyo ne nye amoce ani kule omwowu? Amoce pa kule omwowu kule, kerekeyin nto kito nye kicikoci kerekeyinto kunye kiy nyepo latik? 20 Puryo kot kuyunyo! Komwowu kule kiy nye kocesoci oyik om mesetap piko co menket Yiyintet kuce kocikoci coto kupoyit oyik, ntene puryo kot kocikoci Yiyintet. Kunyo puryo amoce ani kule ayomekey akwek oko oyik. 21 Puryo kot omuci akwek ayemnte oyesye cikompet nyepo Mokoryontet oŋnkoyesye yec cikompet nyepo oyik. Kunyo puryo kot omuci oyomisye mesetap Mokoryontet oŋnkoyomisye yec mesetap oyik. 22 Nto ce möce acek kule kunyer Mokoryontet? Cisoti acek kule ceponte swamet kupël neto? 23 Cemwowu kule, “Ce comwec kyiy kiy ake tokol.’’ Yunyoto, ntene puryo kot kuponto latik tukuk tokol. “Ce comwec kyiy kiy ake tokol’’, ntene puryo kot kuponto kakalyayet tukuk tokol. 24 Puryo ci nye roke kumwoy kule acenye tukuk ce nöme neto nkit, ntene möce kuköse tukuk ce nöme piko alak. 25 Omuci akwek ayal kiy ake tokol nye kyoloy om motepetap panyek nye puryo kot atepe kupo ŋalek ce nöme kasoteywekwok. 26 Omnye mwowu silutekap Yiyintet kule, “Po Mokoryontet koret oko tukuk tokol ce mite orit.’’ 27 Ye kokurok akwek cito nye tompo kocömis kule kwa yomisye omik oŋnkocäm roke oyam kiy ake tokol nye kacekonok nye puryo kot otepe ŋolyo nye nöme kasoteywekwok. 28 Ntene ye komwowok citake kule, “Kocesoci omicu kerekeyik.’’ Mente kyam yoto omicoto kupo toponiyet nyepo cito nyo komwowok oŋnkupo toponiyet nyepo kasoteywekyi. 29 Puryo kot ku cekuk kasoteywek coto, ntene po cito nyin ake. Kunyo mokutep citake kule, “Omne sukurip kasoteywek cepo cito ake kito nye mayiy ani? 30 Ye kakaste ani Yiyintet om omikyu, omne sukurenya ani citake om omik ce oyome okostoy Yiyintet?’’ 31 Kunyo, kiy ake tokol nye oyiye akwek ye koyomisyi, nto ye koyesyi, kumöce oyiye coto tokol kupo woyintap Yiyintet. 32 Opuri kapurto nye puryo kot komuce kusutyi Yutayek wuyinto nto mpo lamek nto mpo pikap Yiyintet. 33 Opuri kuyu wulo opurtoy ani. Omnye asyeme kule aŋerec ci tokol om tukuk tokol ce ayiye nye puryo kot asotyini toponiyet nyimwani nkit, ntene om toponiyetap piko tokol kule, sukuŋet cesoru cekto kusopco.
