1 Corinthians 1

1Cone parwani wule amite ani Paulo nye kicekur kwek Kiyokintetap Yesu Kristo om cömisyetap Yiyintet, oŋnkucone wule mite yeyanyo Sosene. 2Casilyini pikap Yiyintet cepo Korinso, piko tokol ce kicekur kwek pikap Yiyintet cetililec om koyomotet oko Yesu Kristo, wanak oko piko tokol ce mite wulyo ake tokol ce kure kaynetap Mokoryontenyo Yesu Kristo, nye Mokoryontemwa oŋnku Mokoryontenyacek. 3Kante kukonok Yiyintet Papanyo oko Mokoryontet Yesu Kristo poypoyet oko kalyet. 4Okostoy ani okokoy Yiyintenyu om wule amite akwek, omnye kikonok neto poypoyet kupunte Yesu Kristo. 5Omnye koyomet nye oponte akwek oko Kristo kunye kukonok mokoryontit nyepo tukuk tokol, kupontokey wanak oko ŋalalet tokol oko ŋomnonet tokol. 6Kikwilokis koromun om wule omite akwek lokoywek ce nöme Kristo, 7nye puryo kot omuytoy monyoru kupeyok tokol ye tomite okonye ciŋoŋ Mokoryontenyo Yesu Kristo. 8Mosukuripok kukwilak kuyunyoto okoy pesyet nyepo letut, sukuŋet otoku nye puryo kot oponte lelis om pesyetap Mokoryontenyo Yesu Kristo. 9Yiyintet kunye cikosekey, nyoto kunye kikurok akwek oyomekey oko Werinyi Yesu Kristo Mokoryontenyo. 10Osomok ani akwek mpo yeya om kamukeywekap Mokoryontenyo Yesu Kristo kule, ocömncine tokol om ŋalek ce oŋolole sukuŋet komo kumite pciyatet om wule omite akwek nkit. Ntene oyomekey tokol wanak om kasoteywontet akenke oŋnkotyikyi ŋolyo akenke. 11Mpo yeya, kumwowo ani kupoyit manta piko alake cepo kaytap Klowe kule oponte akwek wokutyet om kwenumwoŋ. 12Ŋolyontet nye omwowu kunyi kule, mwowu citake tokol om akwek ŋolyontet nye pciyat. Mwowu ake kule, “Opoye ani Paulo.’’ Kumwoy ake kule, “Opoye ani Apolo.’’ Kumwoy ake kule, “Apoye ani Kefa.’’ Kumwoy ake kule, “Opoye ani Kristo.’’ 13Pciyat pa Kristo? “Paulo kunye kimecok akwek om Murtowontet? Kicepatisanak akwek oyiku konomikap Paulo?’’ 14Okostoy ani yiyintet omnye kipuryo kot apatisan ci ake tokol om akwek, tos pate Krispo oko Kayo. 15Kunyo puryo ci nye muce kumwoy kule kicepatisana om kaynetap Paulo. 16(Ntene kasotyi yec kule kyapatisan ani Stefana oko pikap kanyi, ntene puryo kot omuci kot asot kule kyapatisan yec citake.) 17Kipuryo kot kuyokto ani Kristo wepotisonisye, ntene kiyokto wamwayte lokoywek ce toponec, oŋnkamwayte nye puryo kot oyiyisye ŋomnonet nyepo piko sukuŋet mente kot kupokune swamet metap Kristo om murtowontet. 18Omnye lokoywek ce nöme metap Kristo om murtowontet kuce sute piko co mite kupotos kule perperyo pate. Ntene cesute acek cu cemite cisopec kule swametap Yiyintet. 19Omnye mwowu silutekap Yiyintet kule; “Mosayarante ani ŋomnonetap piko co ŋomec, mosonumu kasoteywekap piko co muswokik.’’ 20Kunyo poru ŋaleca kule, mite ono piko ce ŋomec nto muswokik? Nto kirwokik ce ŋomec cepo koroni? Kukupor Yiyintet kule perperyo pate ŋomnonet nyepo koroni. 21Omnye kikwiy Yiyintet kuwuyit nye puryo kot komuce konket piko neto om ŋomnonet nye nyimwa nkit. Ntene kicäm Yiyintet kule osop piko ce yene kwiyisye, ŋolyontoni. “Perperyet’’, coto ku lokoywek cu cemwoytoy acek. 22Möce Yutayek cepo kakitat kule sicinket cepo manta, kucenye lamek ŋomnonet. 23Cemwoytoy acek Kristo nye kimeci murtowontet, lokoywek coto kuce konokut om wule mite Yutayek oŋnkwek perperyo om wule mite lamek. 24Ntene om wule mite piko co kikur Yiyintet nka Yutayek nto lamek, lokoywekyu ku Kristo nye neto kunye swamet nyepo Yiyintet oŋnku ŋomnonet nyepo Yiyintet. 25Omnye kito nye porukey kuyu perperyetap Yiyintet, kunye ŋomnon nyoto kupël ŋomnonetap piko. Nto kito nye porukey kuyunye purenotatap Yiyintet kunye ponto swamet kupël swamet nyepo piko. 26Mpo yeya, möce asot yawut wule kyoyunte akwek yo kikurok Yiyintet. Kuyu wule yunto sopontap koret, kipuryo kot oyiku ŋomec alake om akwek. Kipuryo kot oponte kamukeywek alake om akwek, kipuryo kot ciyweyok oyiku tokunotin alake om akwek. 27Ntene kikwey Yiyintet tukuk cesute koret kupoyit perperyo sukuŋet kusornen piko co ponto ŋomnonet. Kikwey Yiyintet tukuk co sute piko kule puryo kot kuponto swamet sukuŋet kosornen piko co ponto swama. 28Kikwey Yiyintet tukuk co cetoye oŋnkyenyile om koret, mpo ce puryo kot kutoku, sukuŋet kwaranta tukuk co sute koret kule ponto latik. 29Poru ŋalecu kule puryo ci mpo akenke nye muce kot kusilkey om taytap Yiyintet. 30Ntene kikoyomok akwek Yiyintet oko Kristo Yesu, kunyo kikwey Yiyintet Kristo kwek ŋomnonet nyinyacek, omnye kisatec acek cenyolu om wule mite Yiyintet. Kiciku pikap Yiyintet, kunyo kicityacec. 31Kunyo kuyu wulo mwowu silutekap Yiyintet kule: “Ye möce ci ake tokol kule osilkey kumisyini kusilekey kito nye kikwiy Mokoryontet.’’

will be added

X\