1 Гижö Павел, Енлöн кесйöг да Исус Кристослöн апостол. Менö мöдöдöма, мед отсавны Енлöн бöрйöмаяслы эскыны да тöдны збыльсö, медым эськö найö вермисны овны вежавидзöмöн 2 да помтöм олöм вылö лачаöн. Помтöм олöмсö Ен кöсйысис му пуксьытöдзыс на, и Ассьыс кывсö Сiйö оз веж. 3 Ас кадö Сiйö сетiс тöдны кывсö бурвисьталöм пыр, та вылö менö и сувтöдiс. Тайö вöлi Ен Мездысьнымлöн тшöктöм. 4 Чолöмала тэнö, Тит. Öтувъя эскöманым тэ меным збыльысь пи кодь. Бурсетöм, буралöм да лöнь олöм тэныд Ен Батьсянь да миян Мездысь Исус Кристос Господьсянь. 5 Ме коли тэнö Критö, мед тэ эштöдiн сэнi помавтöмторсö да быд карын индiн вичкоса юрнуöдысьясöс, кыдзи тай ме тэныд тшöктылi. 6 Юрнуöдысь мед вöлi бур оласнога, öти гöтыра, ныв-пиыс мед эскисны, быдторйын кывзысисны да лэдзчысьöмöн эз овны, на йылысь мед эз кыв лёк сёрни. 7 Вичкоса веськöдлысьöн вермö лоны сöмын бур оласнога морт, öд сылы сетöма вöчны Енлысь удж. Мед сiйö эз вöв асныра, эз вöв дöзмысь, эз ю, эз усьлась мукöд вылö, аслыс эз курав, 8 ветлысь-мунысьöс мед сибöдiс, бурсö радейтiс, вöлi сюсь вежöра, быдторйын веськыд, вежавидзысь да кужис асьсö кутны. 9 Сiйö мед вöлi зумыда кутчысьöма велöдöмыслöн збыль кывъясö, кужис веськыд велöдöмнас туйдöдны мукöдöс да вермис янöдны паныд мунысьöс. 10 Öд унаöн аснырасьöны, ковтöмсö сёрнитöны да мукöдсö пöрйöдлöны, и унджыкыс найö вундыштчöмаяс пöвстысь. 11 Татшöмъясыслысь колö тупкыны вомсö. Яндысьтöм горшлунныс вöсна найö асланыс велöдöмöн шöйöвоштöны дзонь керкаяс, мыйö оз ков велöдöны. 12 Налöн асланыс гижысьыс весиг шулöма: – Критсаяс – пöръясьысьяс, скöр понъяс, горш кöинъяс да дыш руньöяс. 13 Веськыда шуöма. Та вöсна чорыда янöд татшöм йöзсö, медым налöн эскöмыс вöлi веськыд. 14 Найö мед оз кывзыны юдейяслысь мойдъяссö да йöзлысь ас лöсьöдöм тшöктöмъяссö. Татшöм йöзыс öд кежöмаöсь збыльсьыс. 15 Сöстöмлы ставыс сöстöм, а пежасьöмалы да эскытöмлы нинöм абу сöстöм. Налöн пежасьöма вежöрыс, весиг сьöлöмыс. 16 Найö шуöны, тöдам пö Енсö, но уджыс налöн мöдтор йылысь висьталö. Найö мустöмöсь, кывзысьтöмöсь и бурсö вöчны оз сяммыны.
