1 Сэсся крамсьыс ме кылi гора гöлöс шы. Сiйö шуис сизим анделлы: «Мунöй да кисьтöй Ен скöрлуна сизим чашасö му вылö». 2 Медводдза анделыс петiс да кисьтiс ассьыс чашасö му вылö. Сэки найö, кодъяс новлöдлiсны зверлысь пассö да копрасисны сылöн серпаслы, вевттьысисны чорыд орзьöм дойясöн. 3 Мöд анделыс кисьтiс ассьыс чашасö саридзö. Сэки саридзыс лои кулöм мортлöн вирыс кодь, да саридзын став олысьыс кулiс. 4 Коймöд анделыс кисьтiс ассьыс чашасö юясö да ва петанiнъясö, и ваыс пöри вирö. 5 Сэсся ме кылi ваяслöн анделлысь шуöмсö: – Господьöй, Тэ вöлiн и эм, Тэ веськыд да вежа, Тэ öд веськыда мыждан! 6 Йöзыс кисьтiсны вежа войтырлысь да пророкъяслысь вирсö, та вöсна Тэ юктöдан найöс вирöн. Тэ мынтысян налы уджъясныс серти! 7 Ме кылi висьпуктанiнсянь мöд гöлöс шы. Сiйö шуис: – Господьöй Енмöй, Ставсöкутысьöй, Тэнад мыждöмыд збыль да веськыд! 8 Нёльöд анделыс кисьтiс ассьыс чашасö шондi вылö, и шондiыслы вöлi сетöма вын сотны йöзсö биöн. 9 Ёна пöжöмысла йöзыс сотчисны да лёкöдiсны Енлысь нимсö, öд Сiйö веськöдлiс тайö бырöданторъяснас. Но йöзыс эз бергöдчыны Енлань да эз ошкыны Сiйöс. 10 Витöд анделыс кисьтiс ассьыс чашасö зверлöн юралан пуклöс вылö, и зверлöн юраланiнын лои пемыд. Чорыд дойяссьыс йöзыс курччалiсны ассьыныс кывсö 11 да лёкöдiсны енэжвыв Енмöс тайö дойяссьыс да мучитчöмсьыс, но асланыс лёк уджъясысь эз бергöдчыны. 12 Квайтöд анделыс кисьтiс ассьыс чашасö ыджыд Евфрат юö, и ваыс сэтысь косьмис. Тадзи вöлi дасьтöма туйсö асыввывсянь локтысь öксыяслы. 13 Сэсся ме аддзи: гундыр вомысь, звер вомысь да ылöгпророк вомысь петiсны куим пеж лов, найö вöлiны жаба кодьöсь. 14 Тайö – мутияслöн ловъясыс, кодъяс вöчисны шензьöданаторъяс. Найö мунiсны мувывса став öксыыс дiнö, медым чукöртны найöс Ставсöкутысь Енлöн ыджыд лунся тыш вылö. 15 «Со, Ме локта гусясьысь моз. Шуда сiйö, кодi оз узь да видзö ассьыс паськöмсö, медым эз коль пасьтöг да некод эз янöд сiйöс». 16 Пеж ловъяс чукöртiсны мувывса öксыясöс öти местаö. Тайö местаыс шусьö еврей ногöн Армагеддон. 17 Сизимöд анделыс кисьтiс ассьыс чашасö сынöдас. Сэки енэжвыв крамысь, юралан пуклöс дiнысь, кылiс гора гöлöс шы: «Ставсö вöчöма!» 18 Сэсся кутiс чардавны-гымавны, кылiсны гора шыяс, да муыс кутiс ёна вöрны. Олöм пуксьöмсяньыс та ыджда му вöрöмыс некор на эз вöвлы! 19 Сэки Вавилон, ыджыд кар, киссис куим пельö, и мукöд войтырлöн каръясыс тшöтш киссисны. Енмыс ставсö кутiс тöд вылас тайö ыджыд карыс йылысь да сетiс сылы юны вина чашасö, кодi вöлi тырöма Сылöн скöрлунöн. 20 Став дiыс вошис, а керöсъяс бырисны. 21 Йöзыс вылö енэжсянь киссис зэв гырысь, комын кило сьöкта шер. Йöзыс лёкöдiсны Енсö тайö шерсьыс, öд тайö бырöданторйыс вайис налы уна сьöкыдлун.
