1 Гижö Яков, Енлöн да Господь Исус Кристослöн кесйöг. Чолöмала дас кык чужанкотырöс, кодъяс разалöмаöсь став му пасьталаыс. 2 Вокъяс, долыда нимкодясьöй, кор тiянлы ковмас нуны быдпöлöс сьöкыдсö. 3 Тi öд тöданныд: эскöмöн кö нуанныд сьöкыдсö, тi лоанныд зумыдöсь. 4 А зумыдлуныс мед вайöдас ассьыс уджсö тiян пытшкын помöдз, медым тi вöлiнныд дзоньнас тыр-бурöсь, да тiян эз вöв некутшöм тырмытöмтор. 5 Тiян пиысь кö кодлыкö оз тырмы мывкыдлуныс, мед корö Енмыслысь, и сылы лоö сетöма. Öд Енмыс быдöнлы сетö лышкыда да шуасьтöг. 6 Сöмын корöй эскöмöн да майшасьтöг. Öд майшасьысь морт – саридзвывса гы кодь, кодöс кыпöдö тöвнырыс да новлöдлö öтарö-мöдарö. 7 Мортыс кö кык ногöн мöвпалö öтитор йывсьыс, сiйö нинöм оз вöч зумыдпырысь. Татшöм мортыс мед оз чайт босьтны мыйкö Енсяньыс. 9 Гöль вок мед ошйысьö вылö пуктöмнас. 10 Озыр вок мед ошйысьö улö пуктöмнас, öд сiйö турунвывса дзоридз моз бырас. 11 Шондi петас, пöжас да косьтас турунсö. Дзоридзыс сылöн усьö и мичлуныс бырö. Дзик тадзи кусö озыр мортлöн мырсян-пессян олöмыс. 12 Шуда сiйö, кодi вермö венны ыштöдöмсö, öд та бöрти сылы лоö сетöма Олöмыслысь юркытш. Тайö юркытшсö Господь кöсйысис сетны Сiйöс радейтысьяслы. 13 Ыштöдöм дырйи некод мед оз шу: «Енмыс менö ыштöдö». Öд лёк вылас Енсö некод оз вермы ыштöдны, и Ачыс Енмыс некодöс оз ыштöд. 14 Но быд мортöс ыштöдö сылöн лёк кöсйöмыс, öд сiйö ылöдлö мортсö да кыскö сiйöс лёкас. 15 Лёк кöсйöмыс содö-быдмö да чужтö мыж, а вöчöм мыжыс чужтö кулöм. 16 Муса вокъяс, некодлы энö сетöй асьнытö ылöдлыны. 17 Быдпöлöс бурсетöмыс да тыр-бур козиныс воö вылiсянь, югыдыслöн Батьсянь. Сiйö некор оз вежсьыв, Сылöн югыдыс некор оз кус. 18 Ас кöсйöм сертиыс Сiйö чужтiс миянöс Збыльыслöн Кывнас, медым Сылöн вöчöмторъясысь ми вöлiм медводдзаясöн. 19 Муса вокъяс, быдöн мед лоö тэрыб кывзыны, но ньöжмыд сёрнитны да скöрмыны. 20 Öд мортлöн скöралöмыс оз вай Ен нога веськыд олöмсö. 21 Та вöсна эновтчöй быдпöлöс пежсьыс да лёк вöчöмысь, рам сьöлöмöн сибöдöй тiянлы висьталöм Кывсö, öд сiйö вына мездыны тiянлысь ловнытö. 22 Энö лоöй сöмын кывзысьясöн, но Кывйыс серти олысьясöн. Öд куш кывзöмнад сöмын ылöдланныд асьнытö. 23 Кодi кылö Енлысь Кывсö, но оз ов сы серти, сiйö рöмпöштанö чужöмсö видзöдысь кодь. 24 Сiйö видзöдлас ас вылас, а вешйöм бöрас дзик пыр вунöдас чужöмсö. 25 Но кодi видзöдö мездлунсö сетысь тыр-бур Индöд вылö да олö сы серти, сiйöс лоö бурсиöма уджъясыс пыр. Öд сiйö оз вунöд кывлöмасö, но олö сы серти. 26 Кодкö тiян пиысь кö лыддьö асьсö вежавидзысьöн, но быдлаö вомсö восьтö, сiйö ылöдлö асьсö. Татшöм мортыслöн вежавидзöмыс нинöм оз сулав. 27 Мортыс кö тöждысьö батьтöм-мамтöм челядь вöсна да дöваяс вöсна налöн сьöкыд нуигöн, да видзö асьсö тайö мувывса пежсьыс, – тайö эм Ен Бать водзын сöстöм да пежасьтöм вежавидзöм.
