1 Павел, Силуан да Тимофей чолöмалöны тiянöс, миян Ен Батьлысь да Господь Исус Кристослысь фессалоникаса вичкоöс. 2 Буралöм да лöнь олöм тiянлы Ен Батьнымсянь да Господь Исус Кристоссянь! 3 Вокъяс, миянлы век колö ошкыны Енсö тiянысь, öд тiян эскöмныд лунысь-лун ёнмö да öта-мöд костаныд муслунныд ёнджыка на содö. 4 Та вöсна ми ошйысям тiянöн Ен вичкоясын, öд быдпöлöс сьöкыдсö нуигöн да тiянöс вöтлiгöн тi зумыда эсканныд. 5 Енмыс лыддьö тiянöс шогманаясöн пырны Аслас Юраланiнö, öд дзик та понда тi нуанныд сьöкыдсö. Таын тыдалö Енлöн веськыдлуныс. 6 Енмыс веськыда вöчö: тiянöс дзескöдысьяслы Сiйö мынтысьö дзескöдöмöн. 7 А тiянлы да миянлы, сьöкыдсö нуысьяслы, Енмыс сетас шойччöг, кор Господь Исус Аслас вына анделъяскöд лэччас енэжсянь 8 ыпъялан би пытшкын да мыждас найöс, кодъяс оз тöдны Енсö да оз кывзыны миян Господь Исус Кристослысь Бур Юöрсö. 9 Найöс лоö мыждöма пыр кежлö кулöм вылö, торйöдöма Господьысь, Сылöн дзирдлунысь да вынысь. 10 Тайö лоö сiйö лунö, кор Господь локтас. Сэки Сылöн став вежа войтырыс кутас ошкыны Господьöс да став эскысьыс кутас шензьыны Сы вылö. Тi тшöтш лоанныд на лыдын, öд тi эскинныд миян висьталöмö. 11 Та вöсна, дугдывтöг кевмысям тiян вöсна, медым Енным лыддяс тiянöс шогманаясöн лоны Аслас корöмаяс лыдын, медым Аслас вынöн Сiйö ёнмöдас тiянлысь бур кöсйöмнытö да эскöмныд пыр отсалас помöдз вайöдны бур уджъяснытö. 12 Сэки миян Господь Исус Кристослöн нимыс ошкыссяс тiян пыр, а тi – Сы пыр, миян Ен да Господь Исус Кристослöн буралöмыс кузя.
