Rome 9

1Na Keriso da javoda geka beká resena. Geka resena emo, jo gungubo iraeri. Asisi Kakara namokena irira aimi, sonembiri nanda dubo jokáda itatamerena, emo geka bekári. 2Na, nanda natofo Israel embo, nanda ororo aindae, dubo mema use nanda dubo jokáda, evovodae mema ambarako ava itatamuse irena. 3Ne Keriso ighagha usera aindae, God nunda janje eko nemokena mutarira. Na aindae sedo dubo mema erena. Na Keriso da natofo dodo, nanda natofo Israel embo da vasa budo, God ne mema itatamaoro dae sedo simbora usira ava, nane ambudo mema itatamaono ne jebugaetera amo, na ivuga aeteni. 4Ne eregoseva: God Israel embo ava anakora gategetiri, ne nunda natofo useri. Nune setiri ne nunda sasingu etero, nunda usasa a duro nemokena futusira. A kotugo, nunda Agho Dari nemokena futusira. Nu bekáda bekáda tumonde bainghari da emboro ava, nemokena ijugusira. Nunda beka gajari mendeni ava, nemokena futusira. 5Nombuamane binonde, Abraham, Isaac, a Jacob nunda sasingude, nemoá avavagori. A Keriso barago, genembo edo Israel embo ainda jokáda sirorusira. God nune roera isasambu bu jighirise kaifa eraira, nundae evovodae sakai sise irore! Ai, bekári!+ 6Avori, Israel embo isambu, ne jo God da sasingu beká edo iraeri. Avata, God da beka gajari Abraham kena gofusira, ava na jo sae arena. 7Kau daba aminga ava, God beka gagojuse Abraham kena rea mutari sisira ava, nunda sasingu jo isambuimi bae arera. God Abraham kena sisira, "Ninda sasingu a imemesiri digari mutari dae sisena amo, ninda mandi Isaac da sasingu aindae nembo mutari siseni." 8Aminge sisira da tuka mo: Abraham da imemesiri isambu, ne jo God da natofo iraeri. Sasingu God beka gajedo mutari dae sisira, aimi nembo nunda natofo edo irera. 9Ainda beká mo: God beka gagojuse, eminge sisira, "Sifo foa buvari gido, na jovereghe foa sonembururono, Sarah mandiá fumbarira." Aminge sisira amo, nu Abraham da evevetu mendeni da sasingudae jo saeri. 10Geka eni mo eviri. Genembo eni javo Isaac noaro Rebecca ava fitiri, nu vide jamena etoto naká takegha fufusira. 11Sasingu etoto naká ava jo siroredo, eveva o eko eni jo ae irero ainda sifoda, God nunda fakina a kasama kau nangego a nunda gategari kau nangego ava ijugari isagha are dae sedo, Rebecca kena eminge sisira, "Ninda mandi ambo aimi vitido, bego da bajari ava nune barira." Aminge sise, nu ijugusira: mandi ambo viti bajari barira da susu mo, jo sasingu da irari o nenda ari eni iraeri. God nunda uju ava use, mandi amboá aghi usira; aindae sedo, bajari mutiri rurusira. 13God da Geka Rebecca da sasingu aindae sise, eminge resira: "Jacob na dubo rurusena avata, Esau na imboe useni," aminge resira. 14Avori, geka amo ningi kotise, erá eminge seove! "God jo inononda ae eraira," erá aminge seove! 15Geka ainda beká ava, nu Moses kena ijugetiri kasama usira. Ijuguse, eminge sisira, "Na genembo ningiá uju arena aindae, na joka arena, a mavejo ava uju arena aindae, dubo mema use sonembarena," aminge sisira. 16God jo evetu genembo da uju o nenda irari ava kotise ne aghi ae eraira; nu nunda uju ava use, joka edo ne aghi eraira. 17Ava ijuguse, God da Geka Egypt embo da kini (king), (o Fero sedo ghusera,) aindae resira. "Nane seteno ni kini (king) usesa da beká mo eviri: nanda fakina ijugaono kasama aso dae sedo, a enda da natofo isambu nanda bino ava kasama aoro dae sedo, seteno ni kini (king) usesi," aminge sisira. 18Ava sedo, God uju arira amo, genembo enidae joka arira. O uju arira amo, God nune ururari genembo eni gogore edo dubo jo jovereghae arira. 19O nenda eni eredo eminge saetira, "Paul, ni setesa aindae resena. God da uju amo, jo evetu genemboimi buregari da kaugo iraeri. Ava sedo, God redae namonde ijujari? Nunda uju ava eraira ava sedo, jo namonde ijujae aeti," aminge saetira amo, jo eveva iraeri. Nu taká genembori. Nu jo eredo, God kena mino eni jo sae aeti. Aminge saetira amo, nu inono: okia eniimi eredo, okia jighari katokena ategi aetira, "Ni redae na kau emingeteso siroreteni?" Aminge ategi aetira amo, jo inono iraeri. 21Okia jighari kato amo, nu nunda uju ava arira. Sifo eninda, nu enda budo enda daba aimi, okia etoto naká ava arira. Eni mo, okia garigo koana da kaugo ava arira, a eni mo, taká bayau itari da okia ava arira. Amo avori. Nu bajariri. 22Kotugo, God nu kau daba avori. Nu nunda fakina a janje eko ava ijugari dae sedo, nu durumuguse, evetu genembo, mavedae janje eko use dari dae esimbugusira ava, jo totoi dari ambaeri. 23Kotugo kau daba aminga ava, nu namonde mavedae joka edo, nunda usasa garigo ava ijugari baoro dae sedo uju usira amo, ne esimbugusira. Esimbugedo, nunda usasa ava futusira. 24Namonde nune gategusira. 'Namonde' resena emo, mave Jusi embo da jokáda a namane Jusi embo da gitofu ainda jokáda gategusira, aindae resena. 25God namane Jusi embo da gitofu gategedo, nunda natofo aovo dae sisira. Ava jo ae irise, nu setiri nunda feroveta javo Hosea, nunda buku jokáda eminge gefusira: "Evetu genembo mendeni, ne giti nanda natofo jo ae iriara aindae, amboda 'ne nanda natofo' sarena. A kotugo oro eni, giti na jo dubo bae usena ava, amboda nendae, 'ne nanda dubo bari natofo' sarena. 26A reighi eni aminda siseni, 'Ne jo nanda natofo ae ireva,' siseni. Reighi daba aminda, na amboda sarena, 'God jebuga irari, amo namori, Ne nanda sasinguri,' sarena." Hosea namanenda gitofudae geka aminge sisira. 27Kotugo God da feroveta eni javo Isaiah, namane Jusi embodae sise, eminge gefusira: "Israel embo da natofo, ne eva da ghonesa avaga irarera tano, avata daba daba aimi jebuga tambarera. 28Ai resira amo: God evetu genembo isambu endada irera, nenda irari da mino ava, totoi foa mutari dadabarira." Isaiah aminge sisira. 29Kotugo Isaiah daba aimi, vasa eninda geka evia gefuse sisira: "God Fakina Kato Beká jo joka use, namondekena imemesiri daba daba doyari jebuga irae aetera amo, namondeda oro anakora sirivo tefo aeteri. Kau reighi Sodom embo a Gomora embo sirivo e tefo usera, aminga ava aeteri." Isaiah aminge gefusira amo, namane Jusi embo oroko irera aikena, rea sirorumutara ava kotise, aminge gefusira. 30Avori, geka setena ainda tuka mo eviri. Namanenda gitofu giti God da kotari eveva jo tavo e gogoghombae edo ghusera aimi, tumondero gido, God nendae 'eveva' sisira. 31O nanda natofo Jusi embo God tofo mandi gategusira aimi, God nendae 'eveva' sare dae sedo, nunda Agho Dari da amboda amboda use, jebuga kosasaghuseri. 32Redae jebuga kosasaghuseri? Ainda beká mo: ne totofo nenda ariimi, jebuga tava edo ghuseri. Avata jo nenda tumondariimi, tava ae edo ghuseri. God nunda Geka jokáda, 'ghamana emboroda fitari atada dimbari durari' sisira aimi, atada dimbiri ne duduruguseri. Ghamana fitari sisira amo, Iesu dae sisira. 33God da Geka setena, eminge resira: "Givu! Enda jiro fumbari Saion+ aminda, na ghamana eni emboroda fitono, evetu genembo ya foa ghuroro, atada dimbari durarera. A kotugo, evetu genembo aimi atada dari gofe ya du fasarera. Avata mave ghamana resena ava tumondarira amo, nu jo aindae meka gae arira," aminge sisira.

will be added

X\