Rome 7

1Avori, nanda nano namendi, ne God da Agho Dari ava tegutuse, ainda geka da mendo ava kasama ereva. Ava sedo, na rea sari dae erena amo, nemokena isagha erira. Genembo mave Agho Dari da emboroda+ yarira amo, nu Agho Dari da geka ava use irari, ambari tano arira. 2Avori, geka evia kote givu! Ijugaboro evetu genemboghaekena fifituse sari dae erena. Evetu eni vai edo irarira amo, nu jo ya genembo enikena vitae arira. Nuvu jebuga irari, ya genembo enikena vitarira ainda javo mo, yagera seraera. O nuvu ambari rori arira amo, agho dari ainda fakina numokena dadabarira. Nu rori arira ava sedo, ya genembo enikena vai ari sarira, a nu avori. 4Avori, nanda nano namendi, nemokena kau daba ava sirorusira. Agho Dari da fakina nemokena dadabusira. Ainda beká mo: Keriso ambarida ghe jebuge erorusira amo, ne nunda tofo usevu. Nunda tofo edo, ne Keriso da tamo da mendeni edo ireva. Kotugo namonde nunda tofo edo irera da beká mo: God uju erira amo, namonde nundae sedo ari eveva use iraeteri. 5Eregoseva: namonde Keriso da tofo jo ae irero, ari ekoko da aito ava, Agho Dari ijugusira aimi, namondeda ghamo dereari eredo fisi da uju ava use, ari ekoko avanembo edo ghuseri. Mave dubo jo jovereghae irise, amingudo yarira amo, sifo amboda nunda asisi ambarira. 6O oroko mo, Agho Dari da fakina namondekena dadabusira. Ainda beká mo: namonde giti Agho Dari da tofo etero, aimi namonde bundetiri irise Keriso de dabade ambero, Agho Dari da fakina namondekena dadabusira. Oroko emo namonde jo, Agho Dari ainda emboroda+ yae eraera. Jebuga seka God da Asisi muturaira ainda emboro+ aminda, udo refera. 7Avori, na rea setena ava kotise, evetu genembo mendeni eredo eminge saeteri, "Agho Dari ekori," aminge saetera amo, jo eveva ae aeti. Agho Dari mo evevari. Avata kotugo, na Agho Dari tegutuse, na ari ekoko da goroto ava kasama useni. Na giti dighighi ari amo ari eko, ava jo kasama ae irise, Agho Dari jokáda, "Erá dighighi eose!" ava tegutuse, ainda tuka kasama edo, na kotiseni, na amingeraena. 8Kotugo ava kotise, Agho Dari da geka kasama eno, Ari Eko aimi nanda ghamo deretiri eretiri, na roera digari dombu eni dombu eni ava isambu dighighi useni. Ainda susu mo: Agho Dari jo irae arira amo, Ari Eko da fakina barago jo irae arira. 9Namokena kau daba ava sirorusira. Na Agho Dari ainda beká jo ningi kasama ae irise, jebuga iriani. Aminge irise, na Agho Dari da beká ningi kasama eno, Ari Eko nanda dubo jokáda siroredo fakina usira. 10Etiri, nanda asisi ambududurusira, ava itatamuseni. Avori, Agho Darii jebuga mutaetira ava dodo, namokena ambari ava futusira. 11Agho Dariimi goroto afigetiri, Ari Eko aimi deretiri na gofeteno, nanda asisi ambududurusira. 12Avori, Agho Dari nu eveva a kakarari. A nu rea resira amo, kakara, dambu, a evevari. 13"Agho Dari evevari," aminge seteni. A kotugo, Agho Dariimi emboro afigetiri, nanda asisi ambududurusira, ábarago seteni. Avata geka bekári: nanda asisi ambududurusira da susu mo, jo Agho Dari eveva aimi aeri. Nanda asisi ambududurusira da susu mo, Ari Ekori. Amo, Ari Eko aimi eredo, Agho Dari eveva ava jighi jovereghetiri, namokena ambari budo fusira. Amingusira aindae namonde kasama erera, Ari Eko ainda jokáda eveva eniko tefo bekári. 14Geka bekári: God nunda agho Dari amo, namondeda asisi ava sonembari dae sedo futusira. Avata na genembori. Kau tafasara kakatoimi genembo eni sandi budo bajari eko aikena omburaera aminga ava, na Ari Eko da tofo edo irena, a Ari Ekoi nanda bajari edo irira. 15Na rea eraena, ava jo kasama use ae eraena. Ainda beká mo: na jo nanda uju ava ae eraena. Na ari imboe eraena avata eraena. Ari ovia imboe eraena da beká mo: na kasama erena, Agho Dari rea resira amo, nu geka eveva a damburi. 17Ava sedo, ari ekoko eraena amo, jo tofo nane ae eraena. Amo, Ari Eko nanda dubo jokáda irira aimi, sirureari amingeraena. 18Na kasama erena, nanda fisi jokáda roera eveva eni tefori. Ai resira amo: na ari eveva eni uju use ari dae kotarena amo, jo nane ari da kaugo irae ava arena. 19Na, ari eveva rea ari dae uju eraena ava kosasaghe dodo, ari ekoko imboe eraena, ava eraena. 20Avori, amingeraena da tuka mo eviri. Na jo tofo nanda bajari iraeri. Ari Eko nanda dubo jokáda irira amo, nu nanda bajari edo irira. 21Avori, nanda fisi jokáda agho dari eni irira ava itatameraena. Roera eveva eni uju use ari dae koteraena ava kosasaghe dodo, ari eko avanembo eraena. 22Nanda dubo jokáimi, na God da Agho Dari ava uju eraena. 23Avata nanda fisi jokáda, na agho dari eni setena aimi eredo, God da Agho Dari nane uju eraena, ainghae dabade tataya eraira. Aimi na bundedo, Ari Eko da ungoda fiteari irá gheraena. 24Na makasi embo bekari! Nanda dubo mema teria eresufira. Ainda beká mo: nanda dubo joká isambuimi, na God da Agho Dari uju eraena. Avata nanda fisi jokáda, na ari eko uju eraena. Ava sedo, mave foa na sonembari, fisi da ujuimi ambari budo refira, ava darigaeteni? Avata, darigari da emboro mo Bajari Iesu Keriso fira afigusira. Na nune sonembetiri aindae, na jo nanda tamo a fisi eko ainghae dabade ambae arena! Aindae sedo, na God Afakena 'aiyakoe beká' resena.

will be added

X\