Rome 3

1Avata vika mendo anoso gafugedo Jusi embo arera, ainda eveva eni tefo, ava erá seove! Ainda eveva mo irira. 2Jusi embo nenda eveva mo, evia gitida sari dae erena. God nunda Geka nemokena mutiri ruruseri. 3Geka bekári: Jusi embo mendeni God jo tumondae useri. Ne nundae sedo rea ari dae beka gagojusera ava, ne jo ae useri. Avata kote givu! God aindae sedo nunda beka gajari ighagha edo doyarira, ai? 4Tefo, nu jo doyae arira. Evetu genembo isasambu ne gungubo seraera tano. O God nu geka beká vanembo seraira. Nunda Geka jokáda aindae eminge resira: "Ni geka sise, geka beká vanembo seraesa, ava isagha ari evetu genembo kasama arera. A kotugo ni ijujaresa da sifo aminda, evetu genembo ni gido geka beká arera," nunda Geka aminge resira. 5Avata evetu genembo mendeni erekotera amo: "Namonde ari ekoko arera amo, God nu eveva vanembo arira aindae, evetu genembo nunda javo jighoro erarira. Amo, namondeda ari ekoko eraera aimi, God da binó sonembari teria arira. Ava sedo, God redae namonde ari ekoko embo dari dae resi?" (Emo, na evetu genembo mendeni da kotari ava resena.) 6Avata amo jo geka beká iraeri. God nu ari ekoko da mino, jo inononda mutae aetira amo, nu nange enda kaifa use evetu genembo ijujari? 7Evetu genembo daba aimi, eminge erekotera: "Namonde gungubo seraera aimi, God da binó sonemberaira. Ainda beká mo: namonde gungubo seraera aindae sedo, God geka beká ava ijugari dae sedo geka beká seraira. Amingeari, God da Geka beká isagha eari kasama edo, natofo God dae sakai seraera. Ava sedo, God jo namondeda ari ekoko ijujari dae jo sae aeti." 8A gido, ari eveva isagha are dae sedo, ekoko vanembo use irore!" aminge seraera amo, geka sembaeri. Evetu genembo mendeni nandae unongu sise, na amingaoro dae sariá sise seraera. Avata na geka eko amo jo sae eraena. A unongu sari kakato setena amo, God ijujedo, nenda unongu sari aindae darira amo, eveva arira. 9Ava sedo, namane Jusi embo jo eminge sae arera, "Namane evevari, namanenda gitofu ekokori," ava jo sae arera. Tefo, na geka anakora seteno ningeva amo, eviri. Jusi embo a Jusi embo da gitofu, ne inonori. Ne isasambu, ari ekoko da amboda amboda use irá gheraera. 10God da Geka aindae eminge resira: "Genembo eveva eni, tefo bekári. 11Genembo eniimi jo kasama use God tava ae eraira. 12Evetu genembo isambu, eveva da emboro gukai mutudo, eko da emboroda udo ya gheraera. Evetu genembo isambu sembae use irá gheraera. 13Kau ambari embo da ofofo gomoda ghe, masa ombege foa gheraira aminga ava, geka eko nenda bekada ghe foa buvuraira. Amo, ne gungubo sise irá gheraera. Kau kae eko jingabukena iriari gamburaira aminga ava, geka eko nenda békada irise buvuruturureari, dara siroreraira. 14Nenda bekaimi simbora use, dubo ekoko use geka seraera. 15Tataya da bino ningarera amo, ne anakora sumbu ya buvudo tataya use, mendeni daoro mema itatamarera, a mendeni daoro sirivo arera. 16Ne reda ya buvarera amo, reighi sosighi edo, ekoko ururoro dubo mema sirorarira. 17Mainungari da emboro amo, ne berefori. 18Ne God jo itako kakara use, igheghi ae eraera," God da Geka aminge resira. 19Ainda beká mo: namonde kasama erera, Agho Dari rea resira amo, nu evetu genembo Agho Dari da emboro+ aminda ise irá gheraera, nemokena resira. Agho Dari resira amo, nu evetu genembo isambu nange God da ijujari ava darige ya buvaetera ainda emboro+ ava, gajari dae sise resira. 20Jo genembo eniimi Agho Dari da emboroda+ ise inononda ururari, God nundae 'eveva' jo sae arira. Amo, God Agho Dari futusira da susu mo: namonde evetu genembo ari ekoko eraera, ava totofo kasama aoro dae sedo futusira. 21God evetu genembodae 'eveva' sari da emboro mo, oroko isagha etiri eregosera. Avata evetu genembo Agho Dari da emboro aminda udo yarera aikena, nendae jo 'eveva' sae arira. God emboro+ seka numokena afigarira ava, Agho Dari da geka a feroveta da geka jokáda gembero resira. 22Ainda emboro+ eviri: evetu genembo Iesu Keriso tumondarera aindae, God nendae 'eveva' sarira. Evetu genembo isambu kau dabakori. Amo, evetu genembo isasambu ekoko use irá gheraera. Aminguse, God da kau duroghae ava, nene ijugaoro nenda tamonda isagha aetira amo, ne kasiguse jo ijugae eraera. Isasambu ne ari ekoko use irá gheraera. Ava sedo, God isambukena inononda eraira. Evetu genembo mave Iesu Keriso tumondarera amo, God gido, nendae 'eveva' nune sarira. 24Ne Iesu Keriso tumonduse, nunda fakinaimi jebugeraera. Ainda beká mo: God nunda sonemba tefo futururari, ne Iesu tumondururoro gido, nendae 'eveva' sarira. 25God nu evetu genembo da ari ekoko kote doyari dae sedo, Iesu mutiri fira ambududurusira. Iesu namondeda ari ekoko da mino mutari gido, numoá tumonduse nunda ambari da fakinaimi jebugaoro dae sedo, God Iesu futusira. Amingusira da beká mo: nu nange evetu genembo inononda ijujeraira, ava ijugari dae sedo amingusira. Ne eregoseva, Iesu mutiri fusira ainda gitida, God nu durumugedo kaifa use, evetu genembo da ari ekoko gido dotutusira. 26Avata Iesu fira buviri aindae, God nu oroko, evetu genembo da irari inononda ijujeraira ava kasama aoro dae sedo, evetu genembo da ari ekoko jo tefo tefo kote doyae eraira. Avata evetu genembo mave Iesu tumondarera amo, God nendae 'eveva' sarira. 27Ava sedo, namonde totofo sakai sari da susu eni tefori. Ainda beká mo: namonde jo Agho Dari da emboroda+ ise, ari eveva eraera aindae jo jebugae arera. Jo namondeda ari eveva aimi, God da jebuga tuve bae arera. Namonde taká tumondururoro aindae, God namondedae 'eveva' sarira. 29Ne eregoseva: God namane Jusi embokena nunda Agho Dari mutiri rurusera amo, jo kikiako namanenda God iraeri. Namane Jusi embo da gitofu barago, namondeda God ri. 30God nu dabakori. A nunda uju mo: namane Jusi embo tumondururoro gido, namanendae 'eveva' sise, sari namane nunda sasingu aeteri. A kotugo, namane Jusi embo da gitofu barago tumondururoro gido, nendae 'eveva' sise, sari nembarago nunda sasingu aeteri. Amo nunda ujuri. 31Avata namondeda tumondari resena eimi, jo Agho Dari fugoro dadabae arira. Namonde Iesu Keriso tumonduse, Agho Dari bu jighiroro ainda fakina foa isaghada buvarira.

will be added

X\