Rome 15

1Namonde mave tumonde gogoghombuse, fakina eraera amo, nano namendi mendeni mave jo fakina edo, tumonde gogoghombae eraera, ainda bouvu fumbarera. Namonde jo namondeda uju ava use irae arera. 2Namondeda komana nange fakina edo, tumonde gogoghombaetira, a nunda evevadae sedo, namonde nunda uju ava use irarera. 3Keriso numbarago amingusira. Nu jo nunda uju ava aeri. Keriso nange God Afa da bouvu fufusira aindae, God da Geka eminge resira: "Arie, Afa, evetu genembo ni imboe edo dere jisera ainda bouvu ava, na nindae sedo fufuseni," aminge resira. 4Ne eregoseva: God rea seari nunda Geka jokáda gembudo ghusera amo, namonde ijugari dae sedo, gembudo ghuseri. Amo, namonde tege gido durumuguse, fakina aoro tamo feghari, nu rea mutari dae sisira ava gigitaoro dae sedo, gembudo ghuseri. 5Avori, durumuguse fakina aoro tamo feghari da susu mo: God Afa numori. Ava sedo, God nune ne sonembururari, dubo dabako areva. Amo, ne Iesu Keriso da amboda amboda use, dabade tatedo dubo dabako use, beka dabakoimi Iesu Keriso da Numamo, God Afadae sakai sareva. 7God da duro isagha ari gaovo dae sedo, Keriso ne nati joká doruse rurusira. Ava sedo, kau daba aminga ava, tofo tofo nati joká doruse tavo use irivu! 8Ne amingareva da susu ava, saono ningareva. God namane Jusi embo da abuamanekena beka gagojuse geka beká sisira, ava kasama aoro dae sedo Keriso fira, namane Jusi embo da jokáda sabua etiri God da Geka beká usira. 9A namanenda gitofu, God da joka ari ava gido, nange sakai saetera aindae barago, nune fira sabua usira. God da Geka aindae eminge resira: "Na aindae sedo, ninda natofo da gitofu jokáda nindae sakai sarena. Namonde dabade irise, yaru didivuse ninda javo jighono erarira!" aminge resira. 10Kotugo vasa eninda resira: "Ne God da natofo ainda gitofuri. Avata fuvu, nunda natofode dabade ivuga aove!" aminge resira. 11A kotugo vasa eninda, kau daba aminga ava resira: "God da natofo ainda gitofu, nemokena resena. Ne, Bajaridae sakai sevu! Evetu genembo isambu, nundae sakai sevu!" aminge resira. 12A kotugo vasa eninda, God setiri nunda feroveta Isaiah eminge gefusira: "Jesse da mandi David, ainda imemesiri da jokáda, veka eni sirorarira. Ainda jokáda, kotofu eni siroredo, God da natofo ainda gitofu ava, nune bajari arira. Amingururari, ne tumondari isambu numokena fitarera," God da Geka aminge resira. 13Ava sedo tumondururuvu, God gido, nemokena ivuga tomanako a dubo jama mutari baove! God resena emo, nu rea amboda mutari seraira ava, nune seari, ne aindae gigiteraeva. Numo nenda gigitari da susuri. Nune sari nunda Asisi Kakara sonembururari, ne gigituse nenda tumondari baji mindafu are! 14Avori, nanda nano namendi, na tofo mandi kasama erena: ne ari eveva avanembo use ireva, dubo kote gogoghomberaeva, a tofo tofo dengoro indarikena, ne inonori. 15Avata nanda reta einda jokáda, na fakina edo geka mendeni mendeni fakarago ava sise, sekago kotovo dae seteni. Amingetena da beká mo eviri: God setiri, na Iesu Keriso da aghi kato edo, ya namane Jusi embo da gitofu ainda jokáda saramana aono dae sisira. Na nunda fristi+ edo, God da Bino Eveva ava seraena. Na vironu seraena da susu mo: Asisi Kakara ne namane Jusi embo da gitofu ava budo, kakara use, ne kau joba aminga ava God kena mutari gido, nu ivuga are dae sedo, amingeraena. Na aindae sedo, geka fakarago mendeni mendeni seteni. 17Avori, na Iesu Keriso de dabade tatise, nunda fakinaimi God da saramana eveva usena aindae, na ivuga eraena. 18Na rea usena amo, jo nanda fakina aimi aeri. Iesu da fakina ainembo usena ava sari dae erena. Saramana amo eviri: na geka mendeni sise, ari mendeni edo ghuseni. Aminguse, tano a ari bouvu ijugedo ghusena ainda fakinaimi, a Asisi Kakara da fakinaimi, eono gido dudukughedo ghusevu. Ainda beká mo: ne namane Jusi embo da gitofu, God da Geka ningido ava aovo dae sedo, aminguseni. Aindae sedo: reighi Jerusalem tano ghedo ira reighi Ilirikom ainda soroda, na ya Keriso da Bino Eveva ava, vironu se gogoghombedo ghuseni. 20Na sifo ghousa uju eraena amo, nange ya natofo Keriso da Bino Eveva jo ningae irera aikena, vironu saeteni. O evetu genembo mendeni anakora era Keriso da Bino ava vironu setero, natofo ningi tumonduse irera aikena, na jo yari uju aeri. Na natofo aikena yaetena amo, inono, evetu genembo mendeni, kambo da tutumbi daroro ainda etoda na kambo itari da kaugori. A gido na imboe eraena. 21Nanda uju mo, nange God da Geka evia beká aeti: "Evetu genembo mavekena, nunda Bino jo ya sae irera amo, ne gido diti basarira, a evetu genembo mave jo ningae irera, ne ningi kasama arera." God da Geka emo, geka beká aeti. 22Umbu mendeni mendeni, na nemokena yari dae kotedo ghuseni. Avata reighi mendeni mendeni aminda birurughuse, vironu sedo ghusena agido, na nemokena jo ya buvae edo ghuseni. 23Avata oroko nanda saramana eminda eteno dadabusira ava sedo, na nemokena yari dae erekotena. Kotugo na ghaeko ghousa evia inono, nemo gari dae kotedo ghuseni. 24Aindae sedo, na edo garena, na nange Frovensi Spain aminda ise, Rome aminda teredo ne gaeteni. Ne gido, namonde itako aminda umo ururono, na sonembedo dirigaovo yaeteni. 25Avata oroko mo, God da natofo Jerusalem aminda irera, ava sonembari dae sedo, na aminda yari dae erena. 26Na yari dae erena ainda beká mo: na moni nemokena mutarena. Tumondari+ embo Frovensi Masedonia a Akeia aminda irera aimi eredo, moni resena emo, dabade fitido makasi embo sonembari dae siseri. Makasi embo resena emo, na God da natofo Jerusalem aminda irera, aindae resena. 27Amo, ne totofo ari dae kotiseri. Kotugo, amo eveva bekári. Ne amingaeteri. Ainda beká mo: Jusi embo Iesu da natofo edo irera, nenda asisi da esimbugari ava nenda gitofukena ghasetero jebuga tafuseri. Ava sedo, gitofuá eredo nenda guguaimi nanda natofo Jusi embo sonembarera amo, eveva bekári. 28Avori, moni dabade fifitusera ava bu ya mutono dadabari gido, na dodo Frovensi Spain aminda ise, ne tere garena. 29A na kasama erena: na ya nemokena buvarena amo, Keriso da esimbugari fakinago ava, isambu bu ya mutono bareva. 30Avori, nanda nano namendi, Asisi Kakara dubo bari nemokena futusira, aindae nemokena benunu resena. A kotugo, namondeda Bajari Iesu Keriso da javoda nemokena eminge benunu resena: ne nanda banungari sonembuse, nandae sedo dubo isambu futuse banungaetevu! 31Evetu genembo mendeni Frovensi Judia aminda God jo tumondae eraera. Erama evetu genembo aimi foa na deore dae sise banungaetevu! A na moni bu yarena ava, God da natofo Jerusalem aminda, ne ivuga use baoro dae sedo banungaetevu. 32Amingaeteva da beká mo: God 'avori' sarira amo, na saramana resena emo, aono dadabari gido, ivugaghae nemokena ya namonde dabade umo gamo eveva arera. 33Avori, God, dubo jama mutari kato, nemokena irare! Ai, bekári!+ Yari budo givu!

will be added

X\