Matthew 17

1Sifo 6 ava dadabetiri ainda amboda, Iesu nu eredo, Peter, James, a nunda mandako John, gatege budo nemonde esike era, doriri mindafu eni aminda vitiseri. Vasa aminda evetu genembo eni tefori. 2Doririda viti fetedo gosero, Iesu nu jovereghedo kau eni usira. Nunda dombu mo, kau iji da usasa aminga ava edo jaraghusira. A nunda tamo asugari barago, foyago beká ava use, usasa beká ava usira. 3Etiri, Moses Elijah ghae, ne giti beká endada iriara ava, nengae fera isagha edo Iesu de dabade geka se niningero, nunda ambo jimbi etodaba naká ne gosuseri. 4Gido, Peter Iesu kena sisira, "Bajari, namane budo ojesa aindae sedo, na ivuga erena. Ni nange erekotesi? Eveva mo, na dobo etodaba naká eminda itone? Eni nindae, eni Moses dae, a eni Elijah dae itone, ai?" 5Peter aminge siri, foroga eni foyago beká ava fira, nenda jiro agada fefetusira. Fetiriri, foroga ainda jokáda beka siri ne nininguseri, "Emo nanda dubo bari Mandiri. Na, nundae ivuga beká use, aiyakoe resena. Nunda geka ava ningivu!" beka aminge sisira. 6Siri, nunda ambo jimbi etodaba naká ne oju beká ava edo endada du fafasuseri. 7Du fafasetero, Iesu nemokena ira tamonda deredo sisira, "Erevu! Erá oju eove!" 8Setiri, ne dombu fainghedo, Iesu nusuka fetiriri gosuseri. 9Gido, ne jovereghe Iesu de dabade vose fuse, Iesu nemokena sisira, "Oroko rea geva amo, erá osa seove! Evetu Genembo da Koro+ daoro ambudo, ambarida ghe jebuge erarira, ainda amboda osa sareva, a nu avori," aminge sisira. 10Setiri, Peter, James, a John numokena ategi useri, "Moses da Geka ijuga kakato+ eminge seraera: 'Elijah giti endada ireira ava, sekago jovereghe furarira ainda amboda, God Genembo eni mutari sisira amo, sirorarira.' Amo redae aminge seraeri?" ne aminge ategi useri. 11Etero, Iesu nemokena sisira, "Aminge seraera ainda beká mo: Elijah giti foama Evetu Genembo da Korodae+, emboro rerebuse roera simbugaetira. 12Avata, na nemokena resena: amo anakora sirorusira. Elijah anakora jovereghe fira iriri, evetu genembo mendeniimi nu bunedo, budo nenda uju ava useri. Amboda Evetu Genembo da Korokena+, kau daba aminga ava use, mema numokena mutoro itatamarira," aminge sisira. 13Setiri, nunda ambo jimbi kasama useri: nu Elijah sisira amo, John Bafataito Ari Kato dae sisira. 14Ne vose fera namanekena, a evetu genembo mendeni totorugedo irisera aikena, buvurutuseri. Buvero, genembo eni ira, Iesu da dombuda kauboi dadarigedo sisira, 15"Arie, Bajari! Nanda mandidae joka aetesi! Nu jinongu tambudo eko beká ava eraira. Umbu mendeni, nu ungo ata dadadagheari, endada du fasedo, afufe ya avaraka etoda vitiraira o uvuda tifugheraira. 16Amingeraira ava, budo ojena ninda ambo jimbikena ijugetena ava, ne jo aoro jebugaeri. Etiri, na bune jaredo, nimokena bu refena." 17Setiri, Iesu eminge sisira, "Ne isambu sembae eraeva. Nangetiraimi ne tumondari tefori? Eveva mo: na ne doyaetena ava avori! Na erebunena. Avori, mandi reseva, namokena budo fuvu gaone vae!" 18Aminge setiri budo fera buvero, Iesu nu sukarukena kovionoghae setiri, sukaru mandi ainda jokáda ava vose darigetiri, mandiá jebugusira. 19Amingetiri dadabetiri ainda amboda, namane kikiako era, Iesu de dabade se nininguseri, "Namane ondera amo, nangetiraimi sukaru jo vose darigaeri?" 20Aminge setero, Iesu namanekena sisira, "Nenda tumondari jo inono irae, ava sedo, seteva, nu jo jebugaeri. Kotovo dae resena. Nenda tumondari itako, kau ika maine ainda vuji da kaugo ava iraetira amo, ne doriri oindae, 'Darige yasi, sovenikena fetase!' saeteva amo, nu amingaeti. Ne rejo saeteva amo, siroraeti. 21Avata sukarudae eminge resena. Sukaru eviviga ondari sareva amo, bayau kanangara use God kena utua fetedo, banunguse irareva. Emboro eni tefori," Iesu aminge sisira. 22Sifo eni, Iesu da dorevare isambu namane namonde dabade, Frovensi Galilee aminda totorugetero, Iesu namanekena sisira, "Evetu Genembo da Koro+ ava sandido, gegenembo mendeni da ungoda fitoro 23daoro ambarira. Avata sifo etodaba naká dadabari ainda amboda, God sari nu ambarida ghe jebuge erarira," nu aminge setiri, namane ningido bate dombu useri. 24Iesu namonde dabade era reighi Kaponiam aminda teretero, God da Kambo+ ainda takesi bari kakato Peter kena era ategi useri, "Nenda ijuga kato God da Kambo+ da takesi omburaira, ai tefo?" aminge setero, 25Peter sisira, "Ai, omburaira. Redae resevu?" aminge sisira. Sedo, kamboda ira teretiri, Iesu giti tuturo edo aindae ategi usira, "Simon, ninda kotari ava se ningone! Enda eminda kini (kings) a kokotofu mavekena takesi buraeri, nenda sasingukena, ai, gitofukena?" setiri, 26Peter, "Gitofukena buraera," setiri, Iesu sisira, "Beká resesa. Kini (king) da sasingu ne takesi jo ombae eraera. Ava sedo, na God da Kambo+ da takesi jo ombae aeteni. 27Avata erá dumo eore dae sedo, ombarena. Avori, emingaresa. Yasi, uvu da teria ainda betuda fetedo, kimai fugaso, oka eni giti foa gambari jumbaresa, ainda békada, moni+ eni tambaresa. Amo, nangaeda takesi da inono ava baresa. Avori, moni ava budo yama, nangaeda takesi ai ombaresa," Iesu aminge sisira.

will be added

X\