Matthew 15

1Ainda amboda, Moses da Geka kaifa kakato+ a ijuga kakato+ mendeni, Jerusalem ghedo fera Iesu kena buvudo, numokena namanendae ategi useri, 2"Namondeda abuamane rea edo ghusera a ijugedo ghusera ava, ninda ambo jimbi jo amingae eraera. Ne abuamane da kiki ava kakara use, nenda ungo giti seghedo, bayau amboda bu mindido ghaeteri. Ne redae jo amingae eraeri? Se ningore!" aminge siseri. 3Setero, Iesu mino nemokena sisira, "Nanda ambo jimbi ne, abuamane da agho dari doyariá reseva. Avata na nemokena resena. Nenda kotari a nenda uju ava use, nene God da Agho Dari ava dotutusevu. 4God eminge sisira: 'Nei nimamo kakara use, nenda geka ava ningivu!' A eni mo: 'Mave noi o numamokena jijivu sarira amo, devu ambare!' 5Avata nemo, eminge ijugeraeva: genembo mave, noi numamo ighagha use, nunda gugua budo God kena mutari sise, noi numamo jo sonembae arira amo, avori. Ne aminge ijugeraeva. 6Evetu genembo avavaga use, noi numamo jo sonembae eraera amo, ne 'avori' seraeva. Aminguse, ne God da Geka ava dotutuse, nenda kotari ava seovo buveari, geka bekáva sise eraeva. 7Ne gungubo kakatori! God da feroveta Isaiah nendae sise, geka beká eminge gefusira: 8Bajari resira, 'Evetu genembo emo, bekaimi na kakara eraera. Avata nenda dubo jokáda mo, ne soka bekári. 9Ne na tumonde baingheraera, avata beká eni tefori. Ne aminda sonemba eni jo bae arera. Ainda beká mo: ne evetu genembo da kotari ava, God da Agho Dariva sise ijugeraera,' Geka amo God setiri, Isaiah nendae sedo gefusira," Iesu aminge sisira. Ainda beká mo: ne sembae kotedo ghuseri. 10Setiri dadabetiri, Iesu evetu genembo isambukena kori setiri, fera numokena totorugetero, Iesu nemokena sisira, "Ne erekoteva, evetu genembo ungo jo seghae iria edo, bayau bu mindarera aimi, tamo bebeta arira. Eva ningido, kasama aovo dae sise resena. 11Evetu genembo rea mindarera aimi, nenda tamo jo bebeta ae arira. O geka sembae evetu genembo da békada buvarira aimi, ne bebeta arira. Ava ningido, kasama aovo dae sise resena!" Iesu aminge sisira. 12Setiri dadabetiri, namane era numokena buvudo siseri, "Nine setesa, ava ningido Moses da Geka kaifa kakato+ meka geri," namane aminge setero, 13Iesu mino sisira, "Amo dovu! Moses da Geka kaifa kakato+ erá koteove! Amboda, nanda Afa utuda irira aimi eredo foama, geka bekáda bekáda sise, evetu genembo ijujarira. Kau genembo vare vive eraira aminga ava, arira. Ijuga kakato jo nune govari fetae usera ava, tuse babarigarira. O ijuga kakato nune govetiri fefetusera, avanembo doyari fetarera. 14Ava sedo, Moses da Geka kaifa kakato+ mo, erá koteove! Ne diti digoideri. A ne eregoseva: genembo diti digoide aimi, jo ya nunda komana diti digoide ava unumbedo, nengae emboro evevada yae arera. Nengae dabade emboro kosasaghedo ya bakoda durarera," aminge sisira. 15Setiri, Peter eredo sisira, "Kasia da tuka ava ijugaso ningore!" Peter aminge setiri, 16Iesu namanekena sisira, "Ne nangetiraimi geka setena da beká ava jo kasama ae erevu? Nemo nanda ambo jimbiri. Avata na eregosena, nenda kotari kikitakori, evetu genembo mendeni da kotarigori. 17Ne anakora geka evia kasama aetevu! Genembo bayau rea mindarira amo, tininda vosiyari ya foká ari dadabarira. 18Avata nu geka rea bekaimi seraira amo, dubo joká isambuimi seraira. Aimi nu bebeta eraira. 19Ainda tuka mo: nu rea dubo jokáda koteraira aimi, nu derari komana dari ambarira, kombo yagera arira, bagia arira, gungubo sarira, aji sarira, a ari ekoko mendeni arira. 20Aimi genembo da dubo joká bebeta eraira. Avata Moses da Geka kaifa kakato+ da ijuga ava kotae edo, ungo jo seghae iria edo bayau mindareva aimi, nenda dubo joká jo bebeta ae arira," Iesu aminge sisira. 21Iesu nu reighiá dodo, ira gitofu da reighi etoto, javo Taiar a Saidon, ainda frovensi aminda teterusira. 22Teteriri, oro Keinan embo da evetu eni fira numokena buvudo sisira, "Bajari, David da Mandi God mutari sisira amo, nimori. Ava sedo, na joka aso dae resena. Sukarui nanda gagarakena asugetiri, mema teria ava itatamuse irira." 23Aminge sisira avata, Iesu numokena geka mino eni jo sae usira. Namane numokena era siseri, "Evetué dirige yare! Nu namondeda amboda amboda fuse beisiga udo refira." 24Aminge setero, nu sisira, "Na jo oro mendeni mendeni ava sonembari dae sedo furaeri. Namondeda natofo Jusi embo God dodo irera, ava sonembaono dae sedo, God na dirigetiri fuseni," nu aminge sisira. 25Namane Iesu de dabade aminge sero ningido, evetuá fira dombukena buvudo, kauboi dadarigedo Iesu kena sisira, "Bajari, namo sonembe!" 26Aminge setiri, Iesu mino numokena eminge sisira, "Ne namanenda gitofuri. Namane nendae 'sinova' seraera. God namanenda abua Abraham gategusira, a namanenda oro barago gategusira. Ava sedo, God da sasingu giti bayau mindaeteri. Nenda bayau budo sinodae fugarena amo, jo eveva iraeri. Ava sedo, ni redae sonembareni?" aminge sisira. 27Setiri, evetuá sisira, "Ai, Bajari! A nu beká resesa. Avata evetu genembo beká bayau rirureoro, susunda dudurugeari, sinomane ne ava mindiraera. Ava sedo, na joka edo sonembaso dae resena." 28Aminge setiri, Iesu mino numokena sisira, "Aiya, evetugo! Ni na tumonde gogogho eresa! Ava sedo, benunu setesa, ava nimokena sirorare!" Iesu nu aminge siri ainghae dabade sukaru darigetiri, evetu ainda gagara jebugusira. 29Iesu namane budo reighiá dodo ira, uvu da teria javo Galilee ainda tinguda isira. Aminda ise, Iesu enda jiro fumbari aminda viti ganasa ifuda anumbusira. 30Anumbetiri, evetu genembo digari fera numokena totoruguseri. Evetu genembo ata sembaede, diti digoide, ungo ata ambaride, beka guga, a kae evetu genembo mendeni ainde dabade ava budo fera, Iesu da dombuda buvudo fitero anoseguseri. Anosegetero, Iesu setiri jejebuguseri. 31Jejebugedo, evetu genembo beka gugaá tuturo edo beka siseri. Ata sembae eveva useri. Ungo ata ambari jejebuguseri. A diti digoideá diti eveva usira. Amingiri, evetu genembo isasambu ava gido dudukughuseri. Dudukughedo, ne Israel embo da God dae sakai siseri. 32Amboda, Iesu kori setiri, namane era numokena buvero sisira, "Evetu genembo namonde sifo etodaba naká deinghuse bayau dadabetiri gido, na nendae joka erira. Erama dirigeóno kambo da ise, emboroda ighoii sirivo eore dae sise resena!" Iesu aminge setiri, 33namane numokena siseri, "Namonde nange nange farava budo mutoro mindareri? Reighi eminda, evetu genembo a nati tefo ava sedo, bayau tefori," namane aminge siseri. 34Setero, Iesu namanekena ategi usira, "Nemokena farava nanjogo iri?" setiri, namane siseri, "Namanekena farava 7 a oka veveyako etoto naká ava irira," aminge setero, 35Iesu natofo endada anumbaoro dae sisira. 36Setiri, ne fuge anumbetero, Iesu farava 7 okaghae budo God Afakena 'aiyakoe' sedo, jighi embebegedo namanekena mutiri budo, evetu genembo isambukena soro useri. 37Etero budo, ne isasambu mindero inono usira. Etiri, mendeni dotero fasusira ava rete budo, kanda babaimi isambu 7 ava vendero bedo usira. 38Gegenembo bayau risera amo, inono 4,000 avavagori. Evevetu a sasingu jo tegaeri. 39Etiri dadabetiri, Iesu natofo amo dirigetiri ero, nu ghakada+ vosedo, Megadan embo da reighida sembisira.

will be added

X\