Matthew 14

1Sifo aminda, Frovensi Galilee ainda kotofuko javo Herod, nu Iesu da bino ava niningusira. 2Ningido, nunda mendenidae eminge sisira, "John Bafataito Ari Kato seteno dorusera ava, ambarida ghe jebuge erorusira amo, numori tano. Ambarida ghe jebuge erorusira aimi, nu fakina tomanako budo saramana eraira," Herod aminge sisira. 3Ainda beká mo: Herod giti setiri nunda mendeni era John sandi bundedo diburada fifituseri. Nu amingusira da susu mo: nunda koro Philip noaro javo Herodias, 4ava saghimbe bu fifitusira aindae, John nu Herod kena ghoghora eminge sedo ghusira, "Ni evetué bu fifitusesa amo, agho dari bejisesi," aminge sedo ghusira. 5Amingiri, Herod nu John dari ambare dae kotisira. Avata Jusi embo John nu ferovetava sedo ghusera aindae, Herod oju usira. 6Avori, Herod da sirorari sifo aminda, nu evetu genembo mendeninde dabade kirumo useri. Kirumo ero, Herodias da gagara ira teredo yaru didiviri gido, Herod ivuga beká ava usira. 7Ava sedo, gagara aikena beka gagojuse sisira, "Ninda uju ava se ningone! Ni rejodae benunu saresa amo, mutarena," Herod aminge setiri, 8Herodias da gagara, noi rea uju usira ava kotedo, eminge sisira, "John Bafataito Ari Kato da gifua ava, gafuge rooróda vendi mutaso, oroko eminda barena!" sisira. 9Setiri ningido, Kini (King) Herod dubo mema ambarako usira. Avata nunda esa embo da dombuda beka gagojusira aindae, nu bouvu edo, nunda mendeni amingaoro dae sisira. 10Setiri, ne era dibura da vasa aminda teredo, John duboda divegedo, 11gifua ava rooróda vendi budo fera gagara aikena futuseri. Mutero budo ira, noikena mutiri rurusira. 12Etiri dadabetiri, John da ambo jimbi fera, nunda tamo budo era ofofoda furuguseri. Furugedo, era Iesu kena osa siseri. 13Ava osa setero ningido, Iesu namane budo era ghakada+ vosedo, reighi evetu genembo irae da vasa aminda sembiseri. Sembisera ainda bino ava, evetu genembo ningido, nenda reighi isambu dodo Iesu da amboda era, uvu da teria ainda dengesida atai giti era buvurutuseri. 14Namane amboda buvudo, ghaka+ dari vitido, evetu genembo natofogo ava, totorugedo irero gosuseri. Gido, Iesu nendae joka edo, setiri nenda kae evetu genembo jejebuguseri. 15Amingero ungobu etiri, namane Iesu kena era buvudo siseri, "Iji dadabetira, a eminda evetu genembo a kambo tefori. Ava sedo, natofo dirigaso yama reighi mendeni mendeni aminda, bayau ombu mindarera!" siseri. Setero, Iesu namanekena sisira, 16"Redae yareri? Bayau nene mutuvu mindore!" 17Setiri, namane numokena siseri, "Namanekena farava ghabu soveni a oka etoto naká ava irira. Rejo eni tefori," aminge siseri. 18Setero, Iesu sisira, "Avori, namokena bofuvu!" aminge sedo, 19nu natofo kikisada anumbaoro dae sisira. Setiri, ne fuge anumbetero, Iesu nu farava ghabu soveni a oka etoto naká ava budo, dombu utuda fainghuse, God kena 'aiyakoe' sisira. Sedo, farava jighi embebegedo namanekena mutiri, budo era evetu genembokena soro useri. 20Soro etero, evetu genembo isasambu mindero inono etiri, mendeni dotero fasusira. Ava namane rete budo, kanda babai isambu 12 ava vevenduseri. 21Gegenembo bayau risera amo, inono 5,000 avavagori. Evevetu a sasingu jo tegaeri. 22Mindero dadabiri ainghae dabade, Iesu setiri namane ghakada+ vosedo, giti sembi yari dae ero, nu fetedo evetu genembo isambu dirigusira. 23Dirigetiri ero, nu nusuka enda jiro fumbari aminda, banungari dae sedo vitisira. Tumba jiriri, Iesu nusuka vasa aminda iriri, 24namane sembu fera soroda buvurutero, yaura dombuda fusira aimi, eva yaura ai ghaka+ jighi jovereghari dae usira. 25Sifo da tumba aminda, Iesu vose eva etoda fete deinghe namanekena sembu fusira. 26Firi gido, namane oju beká ava edo, "Omo sukaruri!" sise, koko siseri. 27Namane koko sero nininguse ainghae dabade, Iesu namanekena sisira, "Fakina evu! Namori! Erá oju eove!" Iesu aminge setiri, 28Peter eredo numokena sisira, "Geka beká, ni Iesu gido resesa? Nimo iraresa amota, se, nambarago vose eva etoda fete, nimokena yaone!" Peter aminge sisira. 29Setiri, Iesu, "Fu!" setiri, Peter ghakada+ ghe vose, eva etoda fete Iesu kena isira. 30Ise, soroda eva yaura ava itatamedo, oju edo fati basedo vovosusira. Vovosuse, kori sisira, "Arie, Bajari, namo sonembe!" aminge siri, 31ainghae dabade Iesu nunda ungo sirege Peter rurusira. Budo, sisira, "Ninda tumondari jo inono iraeri. Ni redae dubo bunetesi?" aminge sedo, 32nengae ghakada+ vítero, yaura tukughedo binono usira. 33Etiri, namane ghakada+ kaifa erusera amo, kauboi dadarigedo Iesu tumonde bainghuseri. Use, siseri, "Geka bekári: ni God da Mandiri!" 34Aminge sedo, namane Iesu de dabade sembera reighi Genesaret aminda tere dadoruseri. Genesaret resena emo, reighi savavarari. Kotugo ainda jokáda, reighi veveyako mendeni irei. 35Ghaka+ dari vitero, evetu genembo ne fuge Iesu gido kasama useri. Kasama edo, kae evetu genembo bu furoro dae sedo, aghi mutero reighi mendeni mendeni aminda era, kae evetu genembo unumbedo budo fuseri. 36Budo fera buvudo, evetu genembo aimi, ne Iesu kena benunu siseri, nange kae embo Iesu da tamo asugari da tingu ava deredo jejebugaeteri. Aminge setero, mave sire dederusira amo, nu jebugusira.

will be added

X\