Luke 4

1Iesu nu, Asisi Kakara ai asugetiri dubo kotise, Jordan Uvuda ghe jovereghe isira. Asisi Kakara aimi nu unumbe budo ira, reighi uvu ã evetu genembo irae da vasa aminda isira. 2Buvudo ira, sifo 40 aminda iriri, Satan fira numokena buvudo, nunda fakina ava dere gosusira. Iesu bayau jo mindae, kanangara use iriri, sifo 40 ava dadabiri, nu ighoi usira. 3Etiri gido, Satan numokena sisira, "Ni God da Mandi iraresa amo, se ghamanaé farava jinari mindase!" 4Setiri, Iesu mino sisira, "God da Geka eminge resira: 'Evetu genembo oka bayau vanembo kotarera amo, God da jebuga beká jo tambae arera.' " 5Aminge setiri, Satan Iesu unumbe bu vitira, reighi ã frovensi isasambu endada irira, ainda fakina ã duro ava, jighi afigetiri fuge gosusira. 6Gosiri, Satan numokena sisira, "Reighi mendeni mendeni eregosesa evia, God nunda ungo sokinembetiri nane ruruseni. Genembo mavejoá uju arena amo, nane saono nu reighi einda kotofuko arira. A enda einda reighi isasambu da fakina ã gugua numokena mutarena. 7Ava sedo, Iesu, ni namoá tumonde baingharesa amo, reighi einda duro eregosesa evia, nimokena mutono baresa," aminge setiri, 8Iesu mino numokena sisira, "God da Geka eminge resira: 'Nenda Bajari God nusuka numoá, tumonde bainghuse, nunda uju avanembo areva!' " 9Setiri, Satan nu Iesu unumbe budo Jerusalem aminda ira buvudo, God da Kambo+ ainda enoda viti ira fetedo, Satan jovereghe Iesu kena sisira, "Ni God da Mandi iraresa amo, jaunghe gaone! 10Jaunghaso dae resena ainda susu mo, God da Geka eminge resira: 'God nunda aneya ni kaifa aoro dae sedo, dengoro indarira.' 11A God da Geka eni barago eminge resira, 'Aneya nene ni kaifa ururoro, ni vosiya nenda ungoda desembedo vose fetaresa. Ninda ata jo ghamanai de fokughuse, jorae arira.' " Satan aminge setiri, 12Iesu mino numokena sisira, "Resesa amo, geka bekári. Avata vasa eninda, God da Geka eminge resira: 'Nenda Bajari God ava, jo dere gari dae ae areva.' " 13Aminge setiri, Satan nu derari Iesu durari gari dae usira ava, jo inono ae etiri gido, nu Iesu sifo tufako do darigusira. 14Iesu Asisi Kakara ai asugusira ava jo darigae iriri ainghae dabade, jovereghe ira Frovensi Galilee aminda buvurutusira. Buvudo, reighi mendeni kena ise, natofo da dengoro indari kambo+ mendeni aminda vironu seari ningido, nundae sakai sedo ghuseri. Sakai sero, nunda bino ivegedo iri, 'evetu genembo frovensi aminda, isambu nininguseri. 16Iesu nunda reighi Nasareth aminda ira buvudo, nu evovodae edo ghusira aminga ava use, Jangutari da Sifoda, ira dengoro indari da kamboda+ teterusira. Teredo, God da Geka tegari dae erorusira. 17Eretiri, God da Geka Isaiah gefusira ava, mutero bu afigedo, geka evia tambudo tegutusira: 18"Bajari da Asisi namokena asugetiri irena. Ainda beká mo: evetu genembo makasi embokena, Bino Eveva saono dae sedo, na gategusira. Evetu genembo ari ekoi bundetiri irera ava, saono vujege doyoro dae sedo, Bajari setiri ojigheni. Evetu genembo diti digoide ava sonembaono, diti afigari gaoro dae sedo, na mutiri ojigheni. Evetu genembo, nenda kokotofuimi jo tavo ae eraera ava, foa sonembaono jejebugaoro dae sedo, setiri ojigheni. 19A God, ghaeko eminda nunda jebuga ijugarira, ava osa saono dae sedo, setiri na ojigheni." Geka ava tegutusira. 20Tegedo, Iesu buku gajedo, kaifa katokena mutiri biri nu anumbusira. Anumbetiri, dengoro indari da kambo+ aminda, evetu genembo isambu fuge Iesu gosero, 21nu tuturo edo sisira, "Geka oroko nembo teguteno ningeva amo, beká sirorerirere," aminge sisira. 22Iesu geka numo beká ava se disugetiri niningero, tamo gafusira. Etiri ne jovereghe tofo tofo se nininguse yove siseri, "Emo Joseph da mandiri. Nu kotari emo reda rurusi?" aminge setero, 23Iesu nemokena sisira, "Ne rea kotise, uju ereva amo, na kasama erena. Amo, namokena eminge sari dae ereva, 'Geka tege beká sirorariá setesa amo, reighi Kaponiam aminda rea eteso binó setero niningusera ava, sekago eminda ururaso namane gido, tumondaore!' 24Avori, na nemokena eminge resena: feroveta da geka ava, evetu genembo isambu ningido kakara eraera. Avata feroveta tofo nunda totofoi, nu jo tumonduse kakara ae eraera. Aminguse, na nati joká jo dae etevu. 25"Kote givu! Ne feroveta Elijah da kiki kasama ereva. Elijah banungetiri, borija jo dirae iriri baimara tomanako siroredo, ghaeko 3,1/2 dadabusira. Ainda sifoda, roriri digari namondeda reighi Israel eminda iriari. 26Avata God setiri Elijah ira, gitofu da frovensi Saidon reighi Serafet aminda buvudo, gitofu da rori eniá sonembusira. O tofo namondeda roriri eni jo sonembaeri. 27Ã kotugo, feroveta Elisha da sifoda, evetu genembo digari namondeda reighi Israel eminda kae budo iriari. Avata God jo sari ne jebugaeri. God setiri namonde Jusi embo da gitofu, Syria embo, genembo javo Naaman, nusuka numoá jebugusira." 28Aminge setiri, evetu genembo dengoro indari da kambo+ aminda irisera, aimi ningido, janje ekoko beká ava useri. 29Aminguse, ne eredo Iesu ungoda jumbudo, nati jokáda vitererisera reighiá do darigedo, vitera jiroda kounghuseri. Viti fetedo, Iesu fananda fugoro vosiya de ambare dae ero, 30nu jovereghedo ira, natofo jokáda teredo isira. 31Ainda amboda, Iesu ira, Frovensi Galilee reighi Kaponiam aminda buvurutusira. Buvudo, Jangutari da Sifo aminda, ira dengoro indari da kamboda+ teredo, tuturo edo dengoro indudusira. 32Indudiri, natofo geka ava ningido dudukughuseri. Ainda beká mo: Iesu dengoro indudusira amo, geka nunda fakinaghae dabade sisira. 33Genembo eni, sukarui asugetero ireira amo, tere anumbedo, Iesu geka siri ningido, nu sukaru da fakinaimi koko sise sisira, 34"Agá, Iesu, Nasareth embo, ni namanekena nange ari dae fumutasi? Ni saso namane sirivo aoro dae sedo fumutasi, ai? Namane ni kasama erera. Ni God da Genembo kakarago bekári," aminge sisira. 35Setiri, Iesu numokena kovionoghae sisira, "Beka dodo, genembo ainda jokáda ghe fu buvase!" aminge setiri, sukaruimi fugetiri genembo natofo da dombuda duduriri, nu vose darigusira. Sukaru numokena rejo eni jo aeri. 36Ava gido, evetu genembo isambu dudukughedo dabade se nininguseri, "Geka emo rejori? Nu geka fakinaghae seari sukaru ningido, evetu genembo da jokáda ghe vose darigeraera," aminge siseri. 37Aminge sero, Iesu da Bino ava ivegedo iri, reighi isambu nininguseri. 38Iesu dengoro indari da kamboá+ dodo ira, Simon da kamboda teterusira. Teretiri, Simon da imboti kae budo, tamo vevera teria beká iri fasirisira ava, setero niningusira. 39Iesu ava ningido ira, nunda dengesida fetedo, kovionoghae tamo vevera aikena setiri darigiri jebugusira. Jebugedo, anakora nu eredo bayau simbugedo nemokena futusira. 40Tumba jiriri, evetu genembo kae dombu eni dombu eni bambudo iriara ava, isambu nenda kokomanaimi budo fera Iesu kena buvurutuseri. Buvero, Iesu nunda ungo nenda tamonda jighiri, ne isambu jejebuguseri. 41Sukaru evetu genembo da tamonda iriara, ábarago ondiri vose dariguseri. Amingiri, ne koko siseri, "Ni God da Mandiri!" Aminge setero, Iesu nu kovionoghae, beka erá seóro dae sise buregusira. Ainda susu mo: sukaru kasama useri, God genembo eni mutari sisira amo, Iesu ri. Ava sedo, erá sukarui seóro natofo numo kasama eóro dae sise, Iesu ne buregusira. 42Sifo atetiri, Iesu eredo reighiá dodo, evetu genembo irae da vasa aminda iri, evetu genembo tuturo edo numoá tava useri. Tava udo era tambudo, nu nemonde irare dae benunu siseri. 43Avata nu sisira, "God nange nange nunda natofo+ kaifa eraira ainda Bino Eveva ava saono dae sedo, na dirigetiri fuseni. Ava sedo, na ya reighi mendeni mendeni aminda, Bino evia inononda sise deingharena." 44Aminge sedo, Iesu nu eredo Israel embo da reighi aminda birurughuse, dengoro indari da kamboda+ teterudo ise, vironu sedo ghusira.

will be added

X\