Ekaresia 8

1Stephen ambiri gido, Saul nu ivuga usira. Sifo daba aminda, evetu genembo mendeni Jerusalem aminda eredo, Iesu da natofokena fakarago use, bouvu muteoro mema itatamedo ghuseri. Natofo isambu Frovensi Judia a Samaria aminda oju use, reighi nunda nunda sufuseri. Etero, Iesu da ambo jimbi 12 ainembo fefetuseri. 2Stephen ambiri gido, gegenembo mendeni God tumondusera aimi eredo era, Stephen budo era furuguseri. Aminguse, koko sise dimbia sorara useri. 3Avata genembo Saul, Iesu da natofo dari amboro dae sedo, nenda kambo isambu beje teredo, Iesu da evetu genembo ava sandido mando jokáda ghe jumbu buvudo, budo ira diburada fifitegusira. 4Iesu da natofo oju use sufusera setena amo, ne Jerusalem dodo reighi mendeni mendeni aminda ya, Iesu da Bino ava sedo ghuseri. 5Amingedo, Philip nu eredo ira, reighi Samaria aminda buvurutusira. Buvudo irise, God nange nangedo Evetu Genembo da Koro+ dirigetiri fusira ava, Samaria embokena vironu sedo ghusira. 6Vironu seari, evetu genembo totorugedo ghusera amo, Philip da geka ava ningi gogoghombedo ghuseri. Philip nu ari mendeni mendeni eari, evetu genembo ne jo gae iriara ava, nenda gitida siroreari gi dudukughedo ghuseri. A sukaru barago ondido ghusira. Philip seari, sukaru koko sise evetu genembo digari ainda jokáda ghe vose darigedo ghuseri. A evetu genembo mendeni ungo ata dimbaride, a kotugo mendeni daguna ábarago seari jejebugedo ghuseri. 8Aminguse, evetu genembo reighi Samaria aminda ivuga edo ghuseri. 9Reighi daba aminda, genembo eni javo Simon fira iriri, Philip amboda fusira. Simon resena emo, nu kae jijighuse fiyogha fusedo simbora eari ava gido, evetu genembo dudukughedo ghuseri. Nu, "Na genembo eko eniri," seari, evetu genembo kokotofu a sabua+ amo, isambu nunda geka ava ningido ghuseri. Ningido, Simon nu God da fakina budo aimi ariá sise, nu kaka edo ghuseri. 11Nu sifo ghousa ava, kae jijighuse fiyogha fusedo simbora eari, evetu genembo gi dudukughedo ghuseri. Ava sedo, nu rea sedo ghusira ava, ningi gogoghombedo ghuseri. 12Avata Philip amboda fira, God da Bino Eveva ava sisira. Siri, God namonde nange kaifa eraira ava ningido, Iesu Keriso da javo ava ningido, a kotugo God nange Iesu dirigetiri fusira ava ningido, evetu genembo Philip da geka tumonduseri. Tumondedo setero, Philip nu gegenembode a evevetude dabade budo bafataito usira. 13Simon numbarago, Philip da geka ava ningido tumondusira. Tumondedo setiri, Philip Simon barago bafataito usira. Etiri, Simon nu sifo ghousa Philip da amboda deinghedo ghusira. Philip nu tano mendeni mendeni a ari fakina mendeni mendeni eari, Simon nu jo gae ireira ava, nunda gitida siroreari gi dudukughedo ghusira. 14Iesu da ambo jimbi Jerusalem aminda irise, Frovensi Samaria embo nangedo God da Geka ava ningi tumondedo ghusera ava nininguseri. Ningido, ne Peter nengae John ghae dirigetero, Samaria aminda iseri. 15Era buvudo, Asisi Kakara nu, evetu genembo tumondusera aikena vose asugare dae sedo, benunu siseri. 16Ainda beká mo: Philip ne Iesu da javoda bafataito usira, avata Asisi Kakara nemokena jo vose asugae usira. 17Aindae benunu sise, Peter nengae John ghae ungo jiroda fitero, Asisi Kakara nemokena vose asugetiri dubo kotiseri. 18Ambo jimbi etoto naká nengae, nenda ungo evetu genembo da jiroda fitero, Asisi Kakara vose asugusira amo, Simon nu gosusira. Gido, nu Peter nengae John ghaekena, ainda fakina ava bari dae sedo, moni mutari sisira. 19Sedo, nu eminge sisira, "Nenda fakina ava nandae bofuvu! Nanda ungo evetu genembo da jiroda fitono, Asisi Kakara nemokena vose foa asugare dae sise resena." 20Aminge setiri, Peter numokena ghoghora sedo sisira, "Ni monighae dabade ambaso dae resena. Ni God da joba ava, jo monii ombae aresa! 21Ninda janje jokáimi, God jo tumondae eraesa ava sedo, ni ajagha bekári. Ni namonde dabade jo deinghae arera. 22Ninda ari eko ava vujege dodo, ni Bajarikena benunu saso ninda ari eko kote doyare! 23Ni namanenda fakina gosuse, dighighi beká ava eresa. Satan ninda dighighi ari aimi, bundetiri iresa ava eregosena," aminge setiri, Simon nu eredo Peter nengae John ghaekena mino sisira, "Setesa ava, erama isagha eure dae sedo, Bajarikena nandae benunu sevu!" aminge sisira. 25Ainda amboda, Peter nengae John ghae, Bajari ne nange sonembusira ava osa sise, Bajari da Geka ava vironu siseri. Setero dadabetiri, Peter nengae John ghae eredo jovereghe Jerusalem aminda ise, emboro soroda ne Frovensi Samaria aminda, reighi mendeni mendeni aminda teredo, God da Bino Eveva ava vironu sedo ghuseri. 26Amboda God da aneya Philip kena sisira, "Ni simbugedo vose yasi, reighi uvu irae da vasa aminda emboro eni tambaresa. Emboroá sovenikena aira, Jerusalem buvira, a sovenikena aira, Gesa buvira, aminda buvu fete gi!" aminge sisira. 27Setiri, Philip eredo ise, Ethiopia embo eni firi gosusira amo, nunda kotofu evetu javo Candace, ava sonembedo ghusira. Nunda moni isambu, genembo aikena muteari kaifa edo ghusira. Avori, genemboá nunda reighi dodo Jerusalem ira, God kena banungedo, jovereghe firi Philip gosusira. Genembo nunda ghaka hosiimi jumburaira, (o sariot seraera) aminda anumbirise, God da feroveta Isaiah da buku ava, tegutiri Philip gosusira. Gosiri, Asisi Kakara Philip kena sisira, "Yasi, sariot (chariot) ainda tinguda deinghase!" 30Aminge setiri, Philip ere sumbu buvudo, genembo Isaiah da buku ava tegutiri niningusira. Ningido sisira, "Geka teguteresa amo, ni mino ereruresa?" aminge setiri, 31moni kaifa kato sisira, "Ni na sonembaresa amo, geka teguterena einda beká mo kasama arena," aminge sedo, nu, Philip viti anumbare dae sisira. 32Genemboá nu geka evia tegutusira: "Sino fuka sifi (sheep) ava dedo, ojari dae budo yarera amo, nu beka jo sae arira. A sifi da mamandi (lamb) ainda buroro bambari dae sedo, bu yarera amo, beka jo sae arira. Kau daba aminga ava, Genembo aikena fakarago ero, nu jo tofo sonembari dae sise, geka eni sae usira. 33Numo dorusera amo, nu kau bate eni ava dari da kaugo useri. Nundae ari ekoko use, jo evevada ijujae useri. Nu detero ambududurusira ágido, nunda sasingu a imemesiri da geka mave enii jo sari da kaugo iraeri," geka evia tegetiri dadabusira. 34Dadabetiri, moni kaifa kato Philip kena sisira, "Se ningone! Isaiah tofo nundae sisira, ai? Genembo enidae sisira?" 35Aminge setiri, Philip nu Isaiah da geka aminda tuturo edo, Iesu da Bino Eveva ava numokena ijuguse sisira. 36Aminguse, emboroda uvu eninda buvurutuseri. Buvudo, moni kaifa katoi sisira, "Uvu irira ava sedo, namo bafataito aso dae resena." 37Aminge setiri, Philip sisira, "Ni tumonde gogogho aresa amo, na ni bafataito arena," setiri, genemboá sisira, "Na tumonderena, Iesu Keriso nu God da Mandi bekári," aminge sedo, 38nunda saramana kakatokena setiri, sariot (chariot) jighi fetetiri, genemboá Philip ghae dabade vosera uvuda vosedo, Philip genemboá bafataito usira. 39Edo, nengae uvuda ghe jovereghe vitéro, Bajari da Asisi Philip kena vose asugetiri Philip nu manjisira. Manjetiri, genemboá jo Philip sekago gae usira avata, nu emboroda ivugaghae isira. 40Asisi Kakara Philip budo ira, reighi Asdod aminda fitiri, nu kasama usira. Kasama edo, Philip eredo reighi isambu aminda ise, God da Bino Eveva ava sedo ghusira. Vironu sido ira, Sesaria aminda buvurutusira.

will be added

X\