Ekaresia 4

1Peter nengae John ghae evetu genembokena geka sero, God da fristi+, Sadusi embo+ mendeni, a God da Kambo+ kaifa kakato da giti jigharide, dabade fera buvurutuseri. 2Iesu ambarida ghe jebuge erorusira ava sedo, God amboda sari evetu genembo ambarida ghe jebuge erarera, ainda geka ava, Peter nengae John ghae ijugero ningido, giti jighariá ne imboe useri. 3Imboe edo, ne eredo, Peter nengae John ghae sandi budo era diburada fitero aminda aviseri, tumba jisira, ava sedo. 4Aminguseri, avata evetu genembo digari ne, Peter nengae John ghae da geka, ningido tumonduseri. Gegenembo tumonduse Iesu da natofo usera amo, isambu 5,000 ri. A evevetu sasingude jo tegae useri. 5Sifo atetiri, Jusi embo da kokotofu, evetu genembo da babojegari, a Moses da Geka ijuga kakatode+ dabade fera, Jerusalem aminda totoruguseri. 6God da fristi+ da giti jighari javo Annas nengae Caiaphas ghae, John, Alexander a giti jighari da nano namendi mendeni barago, aminda totoruguseri. 7Totorugedo, ne Iesu da ambo jimbi budo fera soroda fitero fetetero ategi useri, "Ne mave da fakinaimi, a mave da javoda setevo, genembo daguna omo jebugumuta?" 8Aminge ategi etero, Asisi Kakara aimi Peter sonembiri dubo kotedo sisira, "Kokotofu isambu ojeva totorugetevu, aindae aiyakoe resena. Dengoro javuruvu, geka sari dae erena. 9Genembo daguna nange nange jebugumutara aindae, ategi ereva, ai? 10Kasama aovo dae sedo, na nemokena a Israel embo isasambukena isagha sari dae erena. Nasareth embo Iesu mo God dirigetiri fusira, ainda fakina a nunda javoda, namane setero nu jebugumuta. Iesu resena emo, nene budo arafa detevo ambiri ainda amboda, God setiri ambarida ghe jebugedo erorusira. 11Iesu nange nange ighagha aovo ambari, nunda bino mindafu ari namonde nunda duro gaetera ava, God anakora kasiaimi setiri eminge gefuseri: 'Ghamana eni, kambo itari kakatoi imboe edo fugutusera ava Bajari nune budo, tutumbidae sedo fiti simbugedo, aminda tuturo edo nunda kambo itari dae erira.' 12God nu namonde da ari ekoko kote doyari dae sedo, Iesu mutiri fusira. Ava sedo, namonde jebuga bari sarera amo, namonde Iesu nusuka numoá tumondarera. Jebuga bari da emboro eni tefori," Peter geka aminge setiri dadabusira. 13John nengae Peter ghae ne faiya usera avata, ghousa jo gembaeri, a nengae natofodae jo oju ae usera ava, gegenembo totorugusera aimi gido dudukughuseri. Dudukughedo, kasama useri, "Peter John ghae Iesu de dabade deinghuse, fakina numokena ruruseri." 14A kotugo, genembo daguna jebugusira amo, nu aminda fetiriri gido beka dadabuseri. 15Amingedo, ne setero, Iesu da ambo jimbi etotoá era ajagha fetetero, ne tofo tofo se nininguseri, 16"Namonde nange areri? Evetu genembo isambu Jerusalem eminda, genembo jebugumutara ava, ningi kasama eteri. Ava sedo, jo namonde ighagha ari da kaugo iraeri. 17Avata erama natofo isambu ningeore dae sise, namonde ne bureguse, erama Iesu da javoda geka eni seore dae sarera," aminge setero dadabetiri, 18ne kori setero ambo jimbi etoto naká budo fera teteruseri. Teretero ne bureguse siseri, erama Iesu da javoda geka eni ijuguse seore dae siseri. 19Setero, Peter nengae John ghae eredo mino siseri, "Kasama evu! God da dombuda, eveva mo, namane nenda geka ningaeteri ai, God da geka ningaeteri? Namane God da Geka ningido, rea niningusera a gosusera ava ijugarera," aminge siseri. 21Kaniseremane totorugusera amo, isambu ambo jimbi etoto aikena sekago ghoghora eko beká siseri, avata ne jo daeri, ne dirigetero iseri. Ainda beká mo: natofo ne genembo daguna ava jebugedo deinghiri gido, God dae sakai siseri. Ava sedo, kokotofu ne oju edo, Peter nengae John ghae jo dae useri, ne taká dirigetero iseri. 22Genembo amo daguna siroredo irise, nunda ghaeko isambu 40 dadabetiri ainda amboda jebugusira. 23Peter nengae John ghae, kaniseremane dodo Iesu da dorevarekena iseri. Era buvudo, fristi+ da kokotofu a evetu genembo da babojegaride dabade, rea sisera ava, osa siseri. 24Setero ningido, ne isasambu dabade edo God kena banunguse siseri, "Bajari, nine seteso, utu, enda, eva, a roera isasambu sirorusira. 25Ni Asisi Kakara da fakina aimi seteso, namanenda abua David, ninda saramana kato, eminge gefusira: 'Gitofu nunda oro oro janje ekoko edo, kau nange nangedo God kena isoro aetera ava kotise, manaka garuseri. Avata ne jo aoro inono aeri. 26Enda da babojegari aimi totorugedo, Bajari a nunda Mandi dirigetiri fusira, aikena isoro ari dae sedo simbuguseri,' aminge sisira. 27A nu beká sisira. Kini Herod nengae Rome embo da kotofu eni javo Pontius Pilate, nengae dabade tatedo fera, Jerusalem eminda oro oro mendeni nemonde Israel embode dabade totorugedo, manaka garuseri. Ninda Saramana Kato Kakara Iesu dirigeteso fusira, aikena isoro ari dae sedo, manaka garuseri. 28Ninda fakina a ujuimi rea sisesa ava, ne nimokena isoro use amingero, beká sirorusira. 29Kotugo oroko, Bajari, nene daba aimi namane katiyavara eteri. Geka setera ava kotise, namane sonembururaso, fakina use aindae, jo oju ae arera. Aminguse, tumo fainghedo, ninda Bino a ninda geka ava, vironu sise irarera! 30Ninda ungo siregedo sonembururaso, namane siruroro evetu genembo jebugedo ghaore, o tano dombu eni dombu eni ninda Saramana Kato Kakara, Iesu da javoda ururoro, evetu genembo gido dudukughedo ghaore!" 31Aminge banungetero dadabetiri, vasa totorugusera aminda, enda daradaraghiri Asisi Kakara nemokena vose asugetiri, dubo kotedo eghovo fakara etiri, tumo fainghedo God da Bino ava vironu sedo ghuseri. 32Evetu genembo Iesu tumondusera aimi, dubo dabako a kotari dabako edo ghuseri. Jo mave guguadae ghamo bae edo ghuseri. Ne gugua isambu budo, tofo tofo soro edo ghuseri. 33Aminguse, Iesu da ambo jimbi isambu 12 aimi, Iesu ambarida ghedo jebuge erorusira ainda bino ava osa sedo ghuseri. Fakina use seoro, God ne isambu esimbuge gogoghombedo ghusira. 34Ne isambu uvu bayau inonori. Evetu genembo susu iti fafode, nenda kambo a nenda enda ai budo oriro edo, moni budo Iesu da ambo jimbi 12 aikena mutudo ghuseri. Eoro, ne moni budo evetu genembo da irari a mema ava gosuse a kotise, aminda soro edo ghuseri. 36Amingero, butu Cyprus embo genembo eni javo Joseph, nunda oro javo Levi, ai irei. Nune eredo nunda vare oriro edo, moni budo ambo jimbikena futusira. Ambo jimbi ne nunda javo seka Barnabas jijighuseri. Ainda tuka mo: 'Dubo Jama Mutari Katori.'

will be added

X\