Ekaresia 21

1Paul nu ghakada+ vosedo, namane nati embo ategi edo, do sembiseri. Namane dambu sembera, butu javo Kos aminda teteruseri. Tere buvudo sembero sifo atetiri, namane butu javo Rhodes aminda tere buvudo sembero sifo atetiri, reighi javo Patara aminda teteruseri. 2Teredo, ghakaá+ dodo, ghaka+ eni tava useri. Ghaka+ eni Frovensi Foenisia yari dae simbugiri kasama edo, aminda sembudo iseri. 3Sembise, butu Cyprus gido iji vosarikena era ovenembuseri. Ovenembedo sembera, reighi javo Taiar, Frovensi Syria aminda teteruseri. Frovensi Foenisia setena amo, kitakori. Amo frovensi mindafu javo Syria, ainda frovensi eniri. Teteruse, ghaka+ da bajari, nu gugua mendeni tigoro vosare dae sisira. Avori, namane ghaka+ do vitido, Iesu da dorevare mendeni tambudo nemokena aviseri. Amingero, nati embo siseri, "Namane Asisi Kakara da fakinaimi resera: Paul, ni Jerusalem ominda jo yae aresa," aminge siseri. 5Namane aminda irero fura dabako dadabetiri, namane yari dae javi ero, nati embo evevetu mandi sasingude javi etero, namonde dabade vosera fafoda buvudo, namane kauboi dadarigedo banunguseri. 6Banungetero dadabetiri, namane eredo nati embo ategi edo era, ghakada+ vovosero, ne jovereghe natida iseri. 7Namane tuturo edo reighi Taiar ghedo sembera, reighi javo Tolemeas aminda teteruseri. Teredo, Iesu da natofo tambudo nemokena anumbedo tumba dabako geka se niningero sifo atetiri, namane eredo reighiá dodo era, reighi Sesaria aminda buvudo, feroveta eni javo Philip kena aviseri. Philip resena emo, nu giti gegenembo 6 ainde dabade Jerusalem aminda bayau soro aoro dae sedo, gateguseri. 9Philip nunda sasingu, ade jamena avononde naká, ainde dabade God da Geka isagha sedo ghuseri. 10Sifo etoto o etodaba ava reighi aminda irero, God da feroveta genembo javo Agabus, Frovensi Judia aminda ghedo fira buvudo, namanekena teterusira. 11Teredo, Paul da ifu dighari ava budo, tofo nunda ungo ata bundedo eminge sisira, "Na ungo ata bundeteno, eregoseva emo, Jerusalem ominda, Jusi emboi eredo ifu dighari einda numamo ava, eminge sandi bundarera. Bundedo, namonde Jusi embo da gitofu Rome embokena mutarera." 12Aminge setiri ningido, namane nati embode dabade, Paul erama Jerusalem yeure dae sise bureguseri. 13Buregusera avata, nu sisira, "Ne redae sorara use amingevo, na dubo mema ereni? Jerusalem ominda na bundarera, a nu avori. Kotugo na Iesu tumonderaena aindae sedo, daoro ambarena ábarago, avori. Na jo aindae sedo oju ae arena." 14Aminge sedo, namanenda geka jo bae etiri jaredo, namaneva beka dotutuseri. Beka dodo, eminge siseri, "Avori, Bajari da uju aminga ava are!" 15Aminge setero, aminda iriara edo ainda amboda, namane eredo namanenda roera simbugedo Jerusalem iseri. 16Reighi Sesaria ainda dorevare mendeni barago, eretero namonde dabade iseri. Era buvudo, namane vasa reda avarera ava, nene ijugetero namane gosuseri. Kambo ainda numamo da javo mo, Mnason ri. Numo butu Cyprus embori. Mnason resena emo, nu giti beká tuturo edo Iesu tumondedo ghusira. 17Namane era Jerusalem aminda buvero, Iesu da dorevareimi eredo, ivugaghae namane ava nati joká doruseri. 18Nati joká detero, tumba dabako avido sifo atetiri, namane Paul de dabade eredo James kena era, Iesu da dorevare da babojegari totorugedo, anumbirero teteruseri. 19Namane tere anumbetero, Paul eredo, nu nange nange vironu seari, God nu Jusi embo da gitofu digari ava aghi edo esimbugedo ghusira ava, osa setiri nininguseri. 20Ningido, ne God dae sakai setero dadabetiri, Paul kena eminge siseri, "Namanenda namendi, ni kasama eresa, namonde Jusi embo da natofo digari ambari eko ava Iesu tumonderaera. A kotugo, ne Moses da Geka barago kaifa e gogoghombuse irera. 21Evetu genembo mavejo mavejoimi fera, gungubo nindae eminge siseri, 'Namonde Jusi embo da natofo mendeni era, namondeda gitofukena nati dighi anumbuseri. Ainda amboda, Paul nemokena ira, Moses da agho dari a namonde Jusi embo da kiki ava doyoro dae sise, a nenda vide jamena da vika mendo anoso ava erama gafugeóro dae sise, sedo ghusira,' ainda gungubo ava seoro ningiraera. 22Ni fumutasa ava natofo ningido, janje ekoko arera. Ava sedo, namonde nangareri? 23Emingaresa. Gegenembo avononde naká eminda fetirero eregosesa emo, ne saramana a ari mendeni mendeni God da javoda use, nenda beo jo arugae irise, itako avido nenda beo arugari dae siseri. Amingari dae sedo, God kena beka gagojuseri. Avori, nenda sifo orokoá ojighira dadabetira. 24Ava sedo, ni nemonde dabade ya, Moses da agho dari rejo resira ava simbugedo, ne nenda beo arugururoro, ainda joba da sino fuka nine ombaresa. Amingaresa amo, evetu genembo isambu kasama arera: 'Amo, gungubo siseri. Paul nu Moses da agho dari kaifa eraira.' 25Avata namonde Jusi embo da gitofu mendeni Iesu tumondusera amo, ne Moses da agho dari kaifa aoro dae jo saeri. Namane retada (letter) geka evia nembo kaifa aoro dae gefuseri. Sino fuka de bu ya ove kevari da dombuda joba muturaera ava, erá bu mindeóro dae siseri. Ororo erá mindeóro dae siseri. Sino fuka duboda ivasi aoro ambarira da ororo jo vosae arira amo, erá mindeóro dae siseri. A kombo yagera erá eóro dae sedo siseri," James mane aminge siseri. 26Setero, Paul nu, gegenembo avononde naká sisira, ava budo nemonde era nenda beka gajari God kena etero dadabusira. Ava evetu genembokena ijugaoro kasama aoro dae sedo, ne eredo Paul de dabade uvu gutuseri. Edo, roera mendeni Moses da Agho Dari resira ava useri. Etero dadabetiri, Paul nu eredo ira, God da Kambo+ aminda teredo sisira, "Gegenembo avononde sonemberaena ava, oroko God da saramana ari sisera ainda tano fitari dae, uvu guteteri. Ava sedo, nenda javo gembaso fura dabako ainda amboda, ne foama nenda sino fuka dedo joba mutoro nenda beka gajari da sifo dadabarira," aminge sisira. 27Paul da kokomana nenda fura dabako jo dadabae iriri, Paul nu God da Kambo+ jokáda iriri, Jusi embo mendeni Frovensi Asia ghedo fusera aimi gosuseri. Gido ne eredo, Paul kena osogo ari dae sedo, evetu genembo da ghamo deretero erorusira. Eretiri, ne Paul sanduduseri. 28Sandido, ne eminge kori siseri, "Israel embo, fuvu, sonembaove! Genembo ei yama reighi mendeni mendeni aminda deinghuse, evetu genembo isambu dederuse, ne namonde Jusi embo da agho dari, Moses da agho dari, a God da Kambo+ evia imboe aoro dae sedo, dengoro induduse ijugeraira," 29Aminge sisera da beká mo: gitofu da reighi Efesas genembo eni javo Trophimus, nu isaghada Paul ghae deinghero gido kotiseri, "Paul namondeda agho dari bejise, namonde da gitofu enighae dabade ojera, God da Kamboda+ tereteri tano," aminge kotise, Paul sanduduseri. 30Paul sandudusera ainda bino ava ningido, evetu genembo fera totoruguseri. Totorugusera avata, ne susu bunise, Paul ava ungoda bu jumbu buvurutuseri. Jumbu fera isaghada buvero, evetu genembo mendeniimi God da Kambo+ da guro ava gagojuseri. 31Evetu genembo totorugusera aimi Paul budo, ambare dae sedo dorero, Rome embo da isoro kakato da giti jighari ainda bino ava iri niningusira. Amo, Jerusalem embo isambu titigho ariá setero nu niningusira. 32Ningido, nu totoi eredo, nunda isoro kakato mendeni nenda babojegaride dabade budo, sumbudo era natofo jokáda teteruseri. Ne Paul dorero, isoro kakato nenda giti jigharide dabade era buvero gido, dotutuseri. 33Dotero, giti jighariá nu Paul kena ira numoá sandido, seini (chains) etoto aimi bundoro dae sedo, ategi usira, "Genemboé mavejori? Nunda dara rejori? Nu nangeti?" aminge ategi usira. 34Ategi etiri, natofo ne geka nunda nunda siseri, geka jo dabako saeri. Agido, isoro kakato da giti jighari nu Paul daoro ambare dae usera ainda susu ava, nu bunisira. Bunedo setiri, nunda isoro kakato Paul budo, nenda vasa, furu dighi birurughusera ainda jokáda era teteruseri. 35Era, furu da riri aminda buvudo, isoro kakato ne Paul fumbudo vivituseri. Ainda beká mo: natofo totorugusera aimi, nu dari dae useri. 36Ne Paul da amboda amboda ise koko sise, "Devu ambare!" siseri. 37Furuda jarigari dae use, Paul nu isoro kakato da giti jighari aikena Greek gekaimi sisira, "Nanda geka itako saono ningaresa," aminge setiri, isoro kakato da giti jighari nu dudukughedo sisira, "Ni nange nange Greek gekaimi resesi? 38Nanda kotari mo: Egypt embo genembo eni ghaeko dotutusera ominda tuturo edo, nunda mendeni isambu 4,000 ava budo, namane Rome embode isoro ari dae sedo, misi, gandigha, kefata, goroba budo, reighi uvu irae da vasa aminda jungari dae isera ava, na nimova seteni," aminge setiri, 39Paul sisira, "Na Jusi embori. Na Frovensi Silisia ainda jokáda, reighi javo Tarsus aminda siroruseni. Reighi resena emo, jo kitako iraeri, mindafu bekári. Na uju erena amo, na natofokena vironu sarena," aminge sisira. 40Setiri, isoro kakato da giti jighari nu 'avori' setiri, Paul nu ririda fetedo, beka doyoro dae sedo, ungoi de fatiri beka dotero, nu Israel embo da gekaimi sisira.

will be added

X\