Ekaresia 12

1Sifo aminda, reighi Galilee da kini (king) javo Herod nu, eredo Iesu da dorevare mendeni aikena fakarago use, bouvu mutiri mema itatamuseri. Herod setiri, nunda mendenii John da koro James ava, kaiyaimi jetero ambududurusira. 3Ambiri, Jusi embo ava ningido ivuga useri. Ivuga ero gido, Herod setiri nunda isoro kakato era, Peter sandi budo Yisti (Yeast) Kanangara Ari da Kirumo+ da sifo aminda, diburada fifituseri. Etero, dibura aminda kaifa kakato isambu 16 aimi Peter kaifa edo ghuseri. Goroto avononde ava inono gegenembo avononde aimi foama kaifa edo ghuseri. Herod nu Peter bu ya Jarige Yari da Kirumo+ ainda amboda, Jusi embo da dombuda koto ari dae sedo kotisira. 5Peter diburada iriri, ne kaifa edo ghuseri. Kaifa edo ghusera avata, Iesu da dorevare ne fakina edo God kena banungedo ghuseri. 6Herod nu, Peter bu diburada fitido, Jusi embo da dombuda koto ari dae sedo, sifo fifitusira. Ainda tumba daba aminda, kaifa kakato etoto naká aminda kaifa ero, Peter nu nenda soroda asi seiniimi (chains) ungoda bundetero ainghae fase avisira. Dibura kambo guro békada, kaifa kakato mendeni kaifa edo ghuseri. 7Peter fase avíri, aneya fira isagha iri, usasai Peter da vasa aminda janimbusira. Janimbetiri, aneya Peter da tamonda jighido, deretiri diti fangutusira. Fangetiri, "Peter, ni totoi ere!" setiri, asi seiniá tofo vujegusira. 8Vujegetiri, aneya Peter kena sisira, "Ninda ifu dighari a ninda ata jogha, bu dighi simbuge yasi!" aminge setiri, Peter eredo amingiri, aneya sisira, "Ninda tamo asugari asuge, nangae yaore!" 9Aminge setiri dadabetiri, Peter eretiri, aneya nu giti etiri nu ambo gaedo, nengae dabade diburada ghe buvari dae ise, Peter bunise kotisira, "Emo aturu erena, ai, bekári?" 10Kaifa kato eni emboro gaje fetiriri era darigedo, era kaifa kato eni sekago emboro gaje fetiriri darigedo, dibura da guro auriimi usera ainda békada buvurutuseri. Guroá afigaresa amo, ya isaghada buvudo, reighi Jerusalem aminda deingharesa. Aminda buvero, guro tofo mandi afigetiri, era isaghada buvudo nengae emboroda ise, aneya Peter da dombuda manjisira. 11Etiri, Peter kotisira, "Emo bekári. Bajari nunda aneya dirigetiri ojira, Herod da fakina buregedo, na diburada ghedo unumbe bu fitiri isaghada buveni. Herod da uju a Jusi embo da uju namokena jo sirorae arira." 12Ava kotise, nu John Mark noi javo Mary, ainda kamboda isira. Evetu genembo digari totorugedo banunguse irero ainda sifoda, Peter ira buvurutusira. 13Buvudo, furu ainda guro békada fetedo goingoinghiri ningido, ne saramana kato javo Rhoda setero ira, kambo guroda, Peter da beka ava ningi kasama usira. Ningi kasama edo, dudukughe furu da guro jo afigae, nu ivugaghae jovereghe kamboda sufusira. Sumbudo ira kamboda teredo sisira, "Peter ojira furu oinda guro békada fetirira." 15Aminge setiri ningido, ne siseri, "Ni daghedo resesa tanojo!" ava setero, nu kovionoghae sisira, "Na beká resena," setiri, ne mino siseri, "Avose, detero ambiri nunda dangio ava gesi tanojo," aminge siseri. 16Aminge sero, Peter nu goingoinghuse fetiriri ningido, ne guro afigedo Peter á gi dudukughuseri. 17Dudukughero, Peter nemokena ungoi de fafutuse, erama beka seore dae sedo, buregusira. Edo, Bajari nange nange setiri nu buvurutusira ava, isambu isagha setiri dadabetiri, eminge sisira, "Setena ava, James kena a Iesu da dorevare isambukena sevu ningore!" aminge sedo, Peter ne dodo isira. 18Sifo atetiri, dibura da kaifa kakato eredo, Peter tava e bune jaredo, oju use beka dadabuseri. Aminguse, ne tofo tofo se nininguseri, "Peter nange nangedo baghimbeti?" 19Aminge sero, Herod eredo tava aoro dae sisira. Avata, ne Peter tava usera, jo tambae etero, Herod nu kaifa kakatoá bu koto etiri dadabetiri, setiri nunda kaifa kakato amo budo era detero amomonjeguseri. Amomonjegusera ainda amboda, Herod Frovensi Judia dodo ira, reighi Sesaria aminda anumbusira. 20Ainda sifo aminda, Herod nu Taiar a Saidon embokena janje eko use irei. Aminguse iriri gido, ne eredo geka dabade se ningari dae sedo, Herod kena iseri. Era buvudo, ne giti Herod da kambo kaifa kato javo Blastus de komana useri. Amingedo, ne mainungari dae sedo, Herod kena teteruseri. Ainda susu mo: ne Herod da reighida nenda bayau ombudo ghuseri. 21Herod sifo fifitusira á fira buviri, nu gogho edo, kini da anumba vasa aminda anumbedo nemokena vironu sisira. 22Setiri dadabetiri, ne siseri, "Omo jo evetu genembo da geka iraeri. Omo gode eninda gekagori," aminge sise ivugaghae koko siseri. 23Sero, God da aneya nu Herod dorusira. Herod nu evetu genembo da geka ava ningido, jo buregae usira aindae sedo, God nunda aneya dirigetiri fira setiri, Herod jifa ai mindiri ambududurusira. 24Sifo aminda, God da Geka ava sirureoro, ivegedo irureari evetu genembo ningido tumondedo ghuseri. 25Barnabas nengae Saul ghae baimara da moni budo fusera ava, mutero bero, ne John Mark bu nemonde dabade era, Jerusalem ghedo jovereghe reighi Antiok iseri.

will be added

X\