Ekaresia 11

1Jusi embo da gitofu nange nange God da Geka ningido tumondusera ava, Iesu da ambo jimbi a nunda natofo isambu Frovensi Judia aminda iriara aimi, nininguseri. 2Ava ningido, evetu genembo mendeni kotiseri, "Avori, namondeda gitofu ne Iesu da natofo ari dae sarera amo, nenda vika mendo anoso ava gafugarera. Aminguse, ne namonde Israel embo da kaugo edo irarera." Aminge kotise, ne Peter kaifa useri. Kaifa ero, Peter ira nemokena Jerusalem aminda teterusira. Teretiri, ne eredo ghoghora siseri, 3"Ni redae gitofukena esa isesi? Ne nenda vika mendo anoso jo gafugae irero, ni nemonde dabade anumbedo bayau riseva amo, geka bekári, ai?" 4Aminge setero ningido, Peter eredo, nu rea usira, a God rejoá setiri sirorusira ava, ijugari kasama aoro dae sedo, geka sisira, "Nanda nano namendi, na tuturoda ghe sido yarena. Na reighi Jofa aminda banunguse, diti mokoi gosuseni. Utu afigetiri, na roera eni embo mindafu avavaga gosuseni. Embo amo, tingu sovenisoveni dighido fitero vosefira nanda dombuda fefetusira. 6Fetetiri, ainda jokáda fuge gosusena amo, sino fuka, jingabu, kaisi ararafa, a rika ava gosuseni. 7Goseno, beka namokena eminge siri nininguseni, 'Peter, eredo de oje mindi!' 8Setiri, na siseni, 'Tefo, Bajari! Nine seteso namane Israel embo roera eregosena evia, reeta use jo mindae eraera. Roera emo ekori. Na itako jo mindae eraena,' aminge seteno, 9beka sekago utuda ghe sisira, 'God roera mindaso dae sarira amo, erá ekova seose!' aminge sedo, umbu etodaba naká geka daba ava sisira. Setiri dadabetiri, roera isambu jovereghe utuda vitisira. 11Vitíri, gegenembo etodaba naká dirigetiri Sesaria ghedo fera, sifo daba aminda buvurutuseri. Kambo nane avido ghusena aminda fera buvurutuseri. 12Buvurutero, Asisi Kakara namokena sisira, 'Ni gitofudae erá dubo mema eose! Ni eredo, nemonde dabade yasivu!' aminge setiri, namondeda natofo gegenembo 7 eminda fetirera aimi eredo, namane gitofude dabade reighi Sesaria aminda era buvudo, Cornelius da kamboda teteruseri. 13Teretero, aneya nange teredo nunda kamboda fetirise, geka siri niningusira ava, Cornelius setiri namane nininguseri. Amo, aneya numokena eminge sisira, 'Ni genembo eni dirige yama, genembo javo Simon Peter nu reda irira ava ategi e ningare! 14Nune geka sirurari ningido, ninda natofode dabade tumondaovo gido, God nenda ari ekoko kote doyarira,' aminge setiri dadabetiri, Cornelius nu aghi etiri na numokena iseni. 15"Ena buvudo, geka seno ainghae dabade, Asisi Kakara anakora vose evetu genembokena asugerirare. Amo nu, giti namondekena vose asugusira. Kau daba aminga ava nu, evetu genembo gitofu reighi Sesaria aminda totorugusera, aikena vose asugusira. 16Vose asugetiri, na Bajari da geka evia kotiseni: 'Kau John Bafataito Ari Kato uvuimi, bafataito edo ghusira, kau daba aminga ava, na amboda Asisi Kakara nemokena mutarena,' geka ava firi kotiseni. 17Namonde Jusi embo Bajari Iesu Keriso tumondero gido, God namondekena nunda Asisi Kakara mutiri vose asugusira. Kau daba aminga ava, God namondeda gitofukena nunda Asisi Kakara mutiri vose asugusira. Amo isaghari. Ava sedo, God rejoá usira ava gido, na God da uju ava jo buregaeri." 18Aminge setiri ningido, evetu genembo Jerusalem aminda totorugedo ghoghora sisera amo, ne ghoghora dodo, God dae sakai sise, eminge siseri, "Namonde Jusi embo da gitofu nange jebugaetera aindae, God emboro rerebusira. Kau namonde avavaga, ne God tumonduse nenda ari ekoko vujegarera amo, ne jebugedo evovodae irarera," aminge siseri. 19Stephen detero ambududurusira ainda sifoda, Iesu da gitofu ne eredo, Iesu da natofokena fakarago use bouvu futurureoro mema itatamedo ghuseri. Amingedo, Iesu da dorevare oju sumbudo reighi mendenikena iseri. Mendeni oju sumbudo era reighi Foenisia aminda buvurutuseri. Buvudo, Iesu da Bino nenda natofo Israel embokena seoro ningido ghuseri. 20Kotugo, Iesu da dorevare mendeni, Cyprus embo a Sairin embo, ne eredo era Antiok aminda buvudo, Jusi embo da gitofukena Bajari Iesu da Bino Eveva ava, vironu sedo ghuseri. 21Ne God da fakinaimi vironu seoro ningido, evetu genembo digari Bajari tumondedo ghuseri. 22Amingero ningido, Iesu da natofo Jerusalem aminda eredo, Barnabas dirigetero Antiok aminda isira. 23Ira buvudo, God nange nange esimbugetiri natofo dubo kotise ivuga usera ava gido, nu ivuga edo sisira, "Dubo joká isambu Bajarikena futuse irivu!" aminge sisira. 24Barnabas resena emo, nu genembo evevari. Asisi Kakara numokena vose asugetiri, nu dubo kotise tumonde gogoghombedo ghusira. Ava sedo, nu geka seari ningido, evetu genembo digari Bajari tumondedo ghuseri. 25Amingero, Barnabas nu Saul tambari dae sedo, reighi Tarsus aminda isira. 26Ira buvudo, Saul tambu budo, nengae jovereghe fera reighi Antiok aminda buvurutuseri. Buvudo irero, Iesu da dorevare digari totorugeoro, Saul nengae Barnabas ghae ijuguse geka seoro ningido ghuseri. Amingero, ghaeko dabako dadabusira. Reighi Antiok aminda evetu genembo ne tuturo edo, Iesu da natofo isambudae, 'Kuristini' sedo ghuseri. 27Sifo aminda, God da feroveta Agabus a God da feroveta mendeninde dabade, Jerusalem ghedo reighi Antiok aminda iseri. Era buvudo, Agabus nu Asisi Kakara da fakinaimi eredo, amboda rea sirorarira, ainda bino ava isagha setiri, evetu genembo nininguseri. Geka evia sisira: baimara mindafu beká ava reighi isambuda sirorarira. (Amo, baimara Rome embo da kotofuko Claudius da sifoda sirorusira, aindae sisira.) 29Agabus da geka ningido, Iesu da natofo manaka garuse siseri, "Namonde nangedo namondeda natofo Frovensi Judia aminda irera, ava sonembareri? Namondeda irari aminda gosuse, sonemba mutoro yari baore!" 30Aminge sedo, moni dabade edo mutero, Saul nengae Barnabas ghae ava budo era, Iesu da natofo da babojegarikena mutero ruruseri.

will be added

X\