1 John 4

1Nanda nano namendi, evetu genembo digari eminge seraera, "Namane God da Asisi budo irera." Mendeni mo, ne geka beká seraera. A mendeni mo, gungubo seraera. Ava itatame gaovo dae resena. Ne, God da Asisiimi sonemburureari geka seraera, ai, sukarui sonemburureari geka seraera? Kote givu! Ainda beká mo: feroveta derari kakato digari mo, Satan da uju ava sari dae sedo, yama reighi mendeni mendeni aminda, geka vironu seraera. 2O mendeni mo, God da Asisiimi ijugurureari geka seraera. Ava sedo, geka beká ava nange kasama areri? Amo mave, "God da Mandi Iesu Keriso fira, namondeda tamo budo, enda eminda siroredo genembo beká usira," ava dubo isambuimi aminge isagha sarira amo, nu geka beká God da Asisi budo aimi sarira. 3O mave gekaá ighagha arira amo, nu God da Asisi jo baeri. Nu Keriso da Gitofu da asisi ava budo irira, ágido ighagha arira. Ainda asisi eko furarira amo, setero ne niningusevu. Ava oroko ojighira irira. 4Avata nanda sasingu, ne God da natofo edo ireva. Ava sedo, ne feroveta gungubo kakato setena ava darigedo, atai fati fefetusevu. Ainda beká mo: Asisi nene ruruseva amo, nu fakinaghaeri. O evetu genembo mendeni endada irise, fisi da uju use, asisi eni rurusera amo, jo amingo iraeri. 5Evetu genembo amo, ne enda da saramana, enda da uju, a enda da kotari aindae seraera. Ne enda da tofori. Aindae ne aminge sirureoro, evetu genembo mendeni endada irera aimi, nenda geka ningiraera. 6O namonde mo, God da tofori. Mave God da natofo edo irera aimi, namondeda geka ningiraera. A mave God da tofo jo ae irera amo, ne namondeda geka jo ningae eraera. Aminguse iroro gido, mave geka beká da Asisi rurusira, a mave derari da asisi rurusira ava, namonde kasama arera. 7Nanda kokomana, namonde tofo tofo dubo baeteri. Ainda beká mo: dubo bari isambu God kena ghe foa gheraira. Numo, dubo bari isambu da susuri. Ava sedo, mave nunda komana dubo barira amo, nu God kasama edo, nunda mandi o gagara edo irira a gido, nunda komana dubo buraira. 8O mave nunda komana jo dubo bae eraira amo, nu God jo kasama ae irira. Ainda beká mo: God nu dubo bari da susuri. 9God nunda dubo bari kau mavega ava, namondekena eminge ijugusira. Nu, namonde nange nunda Mandi da javoda jebuga tuve baetera ava kotise, nunda Mandi dabako tainako ava dirigetiri endada fusira. 10Dubo bari beká mo eviri: namonde numoá jo dubo bae irero, nu namonde dubo ruruse, namondeda ari ekoko kote doyari dae sedo, nunda Mandi dirigetiri fira, ari ekoko da mino futuse ambududurusira. 11Avori, nanda kokomana, God namonde dubo ruruse, amingusira. Ava sedo, namonde kau daba aminga ava use, tofo tofo dubo baeteri. 12Evetu o genembo eni God nunda ditiimi jo gae irira. Avata namonde tofo tofo dubo ruruse irarera amo, God nu tofo mandi namondeda jokáda saramana ururari, nunda dubo bari baji mindafu beká ava arira. 13Namonde God de dabade tatedo irera ava, nange kasama areri? Amo, saone? Nu nunda Asisi mutiri rurusera ava, dubo jokái itatamuse kasama eraera, nu namonde dabade tatedo irera. 14God Afa nunda Mandi, evetu genembo isambu sonembari jebugaoro dae sedo, dirigetiri endada fusira ava, namane totofo gido, ainda bino ava osa seraera. 15Mave, "Iesu mo, nu God da Mandiri," sarira amo, God nu anakora genembo ainghae tatedo, nunda dubo jokáda irarira. 16Namonde God de dabade tatedo irera ava sedo, God namonde nange dubo buraira, ava kasama use tumonderaera. God nu dubo bari da susuri, aminge seteni. Ava sedo, mave dubo ruruse irarira amo, nu God ghae tatedo irari, God nunda dubo jokáda irarira. 17Avori, God ururari, namondeda dubo joká, nunda dubo bariimi bedo beká ava arira. Nu amingarira da beká mo eviri. Nu uju erira, namonde Ategi da Sifo aminda, fakina edo jo oju ae aeteri. A namonde jo oju ae arera da beká mo: Keriso nu namonde dabade tatise, namonde dubo ruruse, nunda jebuga mutiri budo, endada irise, namonde kau numongo ava ari dae use irera. 18Eregoseva? Mave ni dubo barira aindae, ni jo nundae oju ae aresa. O nundae oju aresa da beká mo, nunda dubo bari jo tumonde gogoghombae aresa. Nunda dubo bari tumonde gogoghombaetesa amo, ninda oju dadabaeti. Avori, God namonde dubo buraira. Nunda dubo bari tomanako itatamuse kotugo numoá minoda dubo ruruse, namonde nundae oju jo ae eraera. O oju arera amo, namonde susu eindae oju arera. Namonde nunda dubo bari jo tumonde gogoghombae irise, Ategi da Sifo aminda, nu namondekena fakarago ariá kotise oju arera. 19God nu giti namonde dubo rurusira, aindae sedo, namonde nu dubo buraera. 20Mave, "Na God dubo ererurena," sise, nunda namendi eni imboe arira amo, nu gungubo sarira. Ainda beká mo: namonde God jo ditiimi gae eraera. O namondeda nano namendi mo, ditiimi giraera. Ava sedo, namonde God kena dubo bari ijugari sarera amo, fakaragori. Ai resira amo: namonde numo sonembari da goroto eni tefori. O namonde nano namendikena dubo bari ijugari sarera amo, raugakori. Ava sedo, mave nunda namendi eni imboe arira amo, nu God barago imboe arira. 21Keriso nu aindae sise, agho dari evia futusira. Mave nu God dubo bari sarira amo, nunda namendi barago dubo barira.

will be added

X\