Lom 8

1Ba:be mabuma: puya:te Ya:su Kelisoko ipuwalo tuputupupima: deda:hana, eta dawate ibi kubapima: ka:lami modoboha:. 2Numa:la:, dopamo tetelo Godote Moseseko ipuwado atamo dikaa:mehuiya: ba:bi Tutumu Tabo komate aeno namutudawama: deda:nami, ale ba:bi kukala ba wakalami hoe huiya ba:bema: iya:tawahanakuima:, huiyatiya Ya:su Kelisoko ipuwalo ebeno Gobogobote naeno namutudawama: dediya:, ba:ba tetelo ebete na pakala namutudawoeno helo ipuwane uluhukunatenete ka:ka: natamo ba:bo ikanamiya:. 3Ba: hibila, Mosesekono Tutumu Tabo komate atamo helo kikaa:miya:ha: ale ebeno kukalamo kopapamila:hanama:, mabu aeno kateneno ubi komate hiya:hiya: kuba komo kododilima: a ipuwalo helohelonomoma: eda:hanama:. Huiyatiya kalakala konomola, Godote aeno modoboha: komo umiti a ba:ma ka:na owalubiya:, ebete ebeno Gudu lumagino apa:mo poemiya: ba:moe hopamo, ba:bema: a tawakaluba:te aeno kateneno ubilo kebe kuba komokomo dododilinama:, ebete ba:bi komoeno hoe huiya a mabuma: a:pelawea:miya:. Iyo, ebete ba:moe hopolo atu kateneno ubi komokomo ba piya:tawa, huiyatiya ba:bi komamo papamiwataheno kuba ododili komoeno helo ba: dito panakapumiya:. 4Ba:bema: hibila, Godote ba:moe gabodo helo atamo ikaa:miya: ale tuputupulu ba emedena ebeno hiliyonomo Tutumu Tabamo kopapamila:hanama:. Iyo, ba:moe ba:be mabula ale ba:ma tetelo aeno kateneno kuba ubi komamo papamila:haheno ebeno Gobogoboeno heloamo bemedenama:. 5Ba: hibila, puya:te ibino kateneno kuba ubi komamo da:papamila:hana ibino kateneno ubi komate ba: ibino namutudawama: eda:na, huiyatiya puya:te Godokono Gobogoboeno ubi komamo da:papamila:hana, ebete ibino namutudawama: ba eda:na ebeno hido komokomo kododilima: iba:tamo hidohido ukui koamo miya:telamena. 6Ba:gala kebe lumagiti ebeno kateneno kuba ubi komo ebeno namutudawama: da:midina, ebetamo hoe huiyate kopema:ne, huiyatiya kebe lumagiti Godokono Gobogobo ebeno namutudawama: da:midina, ebete hibi ka:ka: ba:gala hete kuwatema:ne. 7Ba:bema: pote ebeno kateneno kuba ubi komamo da:papamiwatanako, ebete Godokoba: alaholodawama: eda:na, mabu ebe ubihinola Godokono Tutumu Tabamo papamiwata ba:gala ebegodolo helo kitanaha: ba:be komo kododima:. 8Ba: hibila, kebe lumagiti ebeno kateneno ubi komamo da:papamiwatanako, ebete Godoko kalakaluimima: modoboha:! 9Ba:be mabuma: Godokono Gobogobote la: ipuwalo hibilo demedena, la: la:eno kateneno ubi komamo a:kapapamila:hanamata, huiyatiya ebete la: keba ka:na ka:kiyalametana la: ba:ba ka:na bemedenamata. Iyo, ba: hibila, Kelisokono Gobogobote kebe lumagigodolo emedenaheno, ba:be lumagi ba: Kelisokonoha:! 10Numa:la:, la: niliya mabu la: ba:gala komo hopo habanapi hiliyonomo kuba ododilipima: ba eda:hana la:eno apete ba:bema: hibinomolo koha:lahama:na:. Huiyatiya kalakala konomola, Kelisote la: ipuwalo hibilo demedena, ebeno Gobogobote la:tamo hibi ka:ka: kikalamema:na:ta mabu Godote la: ebeno tuputupupima: ya:lo a:midiliya:ta. 11Iyo, kebe dawate Ya:su Kelisoko hoe ipuwane ka:ka:mo dadipatiya:, ebeno Gobogobote la: ipuwalo hibilo demedena, ebete atumu la:eno ha:laha ape koka:kilamema:ne mabu ebeno Ka:ka: Gobogobote la: ipuwalo hido oko bowatina. 12- 13Ba:bema: naeno ekaka:la:, wadiyala ale Godokono Gobogoboeno ubi komamo ba:papamila:hanakoma:, aeno kateneno ubi komamoha:, mabu numa:la:, la:le ba:ma tetelo ebeno ubi komamo papamila:hate kateneno kuba ododili komo hibilo danakapulamenakoma la:le wiboha: ka:ka: ba:bo kolawema:nemata, huiyatiya la: la:eno kateneno ubi komamo da:papamila:hanakoma hoe huiyate la:tamo kopema:ne. 14Ba: hibila, Godokono Gobogobote pui da:magatalena, ibi ba: Godokono gugudila, 15ba:bema: Godote la:tamo dikalamiya:la ba:be Talona Gobogobo ipuwado la:le tole komo kalawenaha:. Iyo, huiyaha: okopa:te oko ba owatina ibino namutudawoeno mauba komamo keba ka:na ka:toletolehona la: eba ka:na kewagelenaha:, mabu Gobogobote la: hibi gugudima: a:midiliya:ta, huiyaha: okopima:ha:. Ba:be mabuma: ale ebeno heloamo aeno Nabiwi Godoko Abama: ka:milo toetoe tabo ebetamo olamagiminakoma:, 16iyo, hibila, ale toetoe tabo olamagimi tetelo ebeno Gobogobo ba:gala aeno gobogobo, iba:te ukui kapiyama: eda:hate a ebeno hibi gugudima: ba:bo ka:minaka. 17Ba:bema: la: ba:moe eta komo na:kuma:la:, ale Godokono gugudima: hibilo deda:hanama:, ba:be mabuma: galane aeno Nabiwigodone ebeno hidohido komo konomamo konuwatema:nema:, Kelisote dopamo keba ka:na ka:nuwatiya: ba:ba ka:na. Iyo, ale ba:moe hopolo Kelisoko mabuma: temeteme komokomo eba:go duwatenakoma:, ba:be mabuma: ale galane tetelo eba:go ebeno konomo alo ipuwalo konepola:nama:nema:. 18Huiyatiya ale ba:ma tetelo kebe temeteme ipuwalo demedenama:, ba:be komo nale ko komoha:ma: goemo mabu Godote galane tetelo kebe konomo alamo a da:la:minoemene nale ba:be hido komo konomamo emalagidolonamo. 19Numa:la:, Godote ba:moe hopo tupuimi mabu tetelo dododiliya:, ba:bi hiya:hiya: ilina hiliyonomate kapimilo ubi konomamo miya:tena Godokono guguda:te ebegodone hido huiya hawakala ba uwate ba:bo kumima:. 20- 21Ba: hibila, ba:bi ilinate ubihinola ba:moe hopolo temetema:go pola:na, huiyatiya ibi mabuma: Godote ebeno ubi ya:lo ba:ma ka:na ihatiya:, iba:te Saitanakono hoe temeteme ipuwalo tete ga:ga:nomolo pola:nate Godokono gugudino hido aloeno a:la:mina teta:mo ibino temeteme ipuwane konikulima:. Iyo, keba tetelo ebeno guguda:te ebegodone hido huiya duwatemena:, ba:moe hopoeno ilina hiliyonomate ba:be atu tetenomolo ibino kokonomo menemene ipuwane ikuliti ibino hibi kalakala atumu iba:go kapimilo kakuwatema:na:. 22Ba:bema: a iya:tawahanomola, ba:moe hopo tupuimi mabuni pete ba:ma teta:mo puluhuku, da:ka:ka:halena ba:bi ilina hiliyonomate koko temetema:go ihimina, kamenate gudu ko temetema:go keba ka:na kalahiminako ba:ba ka:na. 23Huiyatiya ba:moe hopoeno ilina hiliyonomo kapiyate kihiminaha:, ao, a puya:te Godokono Gobogobo da:lawiya:ma: a ba: atumu aeno tepo ipuwalo koko temetema:go ihiminama:, mabu a ubi konomamo nihatenama: ale aeno Nabiwigodone uliuli apeno wiboha: ka:ka: konuwatema:. Ba: hibila, ebete ebeno Gobogobo atamo dopamo da:poemiya:, ba:be ododi komodo ebete galane teteno komo ba:ma ka:na hawakalimiya:, keba tetelo ale hibi gugudima: eda:ha komote da:hawakalamene, ba:be atu tetelo ale wiboha: ka:keno komo hidohido komo hibinomolo kuwatema:nema:. 24- 25Numa:la:, lumagiti kebe hido komo lawema: uliholo da:latimina, ba:be komote ebetamo hibilo duluhukumini ebete ba:be komo lawema: uliholo gala a:kemedenamene mabu ebete ebeno ubi komo ba: a:lawi. Huiyatiya a hibima: midipino komo eba ka:naha:. Ba: hibila, ale aeno hido ka:ka: Godogodone lawema: uliholo da:latiminamima:, ebete ba:be komodo aeno ka:ka: a:mula:lea:miya:, huiyatiya aeno uliholo latimi komote kekelaa:menaha:. Iyo, ba:ba tetelo ale aeno hidonomo komo hibilo kalawiya:ha:, galane tetelo Godogodone konelawema:nema:, ba:bema: ale tete ga:ga:nomolo uliholo ba latimina ubiha:ma: a:keda:hama:. 26Ba:bema: numa:la:, ale ba:be hido ka:keno hiliyonomo komo uwateha:ma: deda:hanama:, Godokono Gobogobote ba:be komoma: atumu kemalagidolona, ba:bema: aeno hiya:hiya: modoboha: komokomo ipuwalo ebeno owalubi komo ba: ba:ma ka:nala. A ubila ale aeno komoma: Godotamo toetoe tabo olamagimima:, huiyatiya a ha:kiya gabo hibi iya:tawaha:. Ba:be mabuma: Gobogobote aeno modoboha: komoma: ko tepo temeteme ihi komago ebe betoemehonako, huiyatiya hopo habanapa:te ibino hiya:hiya: tabamo da:ga:lana ebete ba:bako tabamo a:kolamaga:le, ebete ebeno tabonomamo olamaginako. 27Ba:bema: kalakala konomola, mabu Godote a tawakalubino tepo ipuwoeno ukui iya:tawanomola, ba:gala ebete ebeno Gobogoboeno ukui atumu iya:tawala, iyo, keba tetelo Gobogobote a ebeno tawakalubi mabuma: da:toetoenako, ba:ba tetelo ebete Godokono ubi komago a hibilo a:wadiya:paa:tenako. 28Ba:bema: a ba:moe komo iya:tawahala, puya:te Godoko malemalelo demalagidolona ba:gala ebete pui ka:ka:lamiya: ebeno ubi komokomo kododilinama:, ba:bi tawakaluba:tamo kebe hiliyonomo temeteme komate dikulihona Godote ba:bi komokomo ipuwalo oko ba owatina, ibi mabuma: ebete ba:bi temeteme ipuwane hidohido komo buluhukulatelenakomene. 29Ba: hibila, hopo tupuimiha: tetelo Godote pui ebenoma: keda:hanama: iba:tamo kukala da:miya:telamiya:, ebete ba:be komo ba emalagidolo ba:bi atu tawakalubi a:kuwatiya: iba:te ebeno Guduino holoholonomo kohawakaliminama:, iyo, ba:be gabodo ebeno badininipala ipuwalo Ya:suti dopodawama: ba eda:na ebeno komo hiliyonomo ekaka:te eba:go bemedehonamena:. 30Ba:bema: Godote pui ebeno gugudima: keda:hanama: ibi duwatiya:, ebete ibi a:kaka:lamiya:. Ba:bene ebete pui da:ka:lamiya:, ebete ibi ebeno tuputupupima: a:kamidiliya:. Ba:bene ebete pui ebeno tuputupupima: da:midiliya:, ebete ibi ebeno konomo alo ipuwamo a:kamagaheliya: iba:te ebeno wiboha: a:la:mina alo ipuwalo kemedehonama:. 31Ba:bema: a ba:moi hidohido komo ba emalagidole a bada tabo na:ka:ga:lama:? Wadiyala a tabo ba:ma ka:na koga:lama:nema:, Godote a hapulu hibilo ba:la:na, ba:bema: ago dalaholohona ba:ba:te wato kikipo a:kalawa:mena:! 32Numa:la:, Godote a mabuma: ebeno Gudunomo kokolomiya:ha:, huiyatiya ebete ebe aeno kuba ododili komoeno hoe huiya lawema: a hiliyonomatamo dito ikaa:miya:. Iyo, ebete ebeno Gudu atamo dikaa:miya:, malemale bada konomola:ka:! Ba:bema: ba:moe komo ba: hibila, ebete komo hiliyonomo hidohido komo atu malemale komodo atamo dito bikaa:menakomene. 33Ba:bema: Godote pui ebeno tawakalubima: keda:hanama: duwatiya:, pote na:ka:modobomene ibi kubapima: koka:lamima:? Eta puliyanomola mabu Godote ibi ebeno tuputupupima: ya:lo a:ka:lamiya:, 34iyo, etate a kubapima: ka:mi modoboha: mabu Ya:su Kelisote a mabuma: hoiya:. Ba:bene Godote ebe hoe ipuwane ka:ka:mo dadipatiya:, ba:ba tetelo ebete Godokono tu hapuamo nemediya:, ba:bema: ba:ma tetelo kalakala bada konomola:ka:, ebete aeno modoboha: komokomo Godotamo a:wadiya:paa:latelenako! 35Ba:bema: Kelisokono konomo malemale ipuwane a tama:mo miya:tema: pote na:ka:modobomene? Eta puliyanomola! Ba: hibila, komopa:te Ya:suku mabuma: atamo temeteme dikaa:mena, ibino ododili komo ba:gala komo hiya:hiya: menemene komo ba:gala komo ukui bilibili komo, ba:bi komokomo hiliyonomate a ebeno malemale komone uluhukua:tema: kamodobonaha:. Ba:gala atumu baa: kape komo ba:gala ilinaheno emede komo, olalati komo ba:gala hoe komo, ba:bi komokomo hiliyonomate modoboha: a Kelisokono malemale ipuwane uluhukua:tema:! 36Ba: hibila, Godokono Buka ipuwalo eta tabote aeno komo ba:ma ka:na hawakalimina, �Godo, tete hiliyonomolo komopa:te ama: mabuma: a anakapua:mema: ewagelena, iyo, ibi ubila a dabihole sipi-goegoemo kanakapua:mema:!� 37Huiyatiya aeno Kodawate a malemalelo konomamo emalagidoloena, ba:bema: ale ebe ipuwado ba:moi hiliyonomo kuba komo ipuwalo a wato kikipo kolawema:nema:! 38Iyo, ba:moe komo na iya:tawanomola, atamo hoe ikaa:me komo ba:gala ka:ka: ikaa:me komo, ba:bi hiya:hiya: komate aeno Kodawoeno malemale ipuwane a a:kuluhukua:tea:mene. Ba: hibila, Hunu Haboeno nopopi, ba:gala Saitanakono helohelo nopopi, ba:gala ebeno komo kubakuba gobogobo, iyo, kebe hiya:hiya: komate ba:ma tetelo dikulihona ba:gala galane tetelo dikulihomena:, 39ba:gala alomo hunulu da:pola:na, ba:gala haka ipuwalo da:pola:na, ba:gala hopolo da:wapata:lamena, ba:moi gobogobo ba:gala ilina hiliyonomo ipuwalo eta kapiyate a Godokono malemale ipuwane uluhukua:te modoboha:, mabu ba:be malemale komo ebete aeno Kodawa Ya:su Kelisoko ipuwado atamo hibinomolo ya:lo ikaa:miya:.

will be added

X\