Ma:t 16

1Ba:bene komo Pa:lisi kapiyuimipi ba:gala Sa:diyusi kapiyuimipi iba:te ubi bihatiya: Ya:sutamo pelamete ebe kuba gabamo kopemogabuimima:. Iba:te ebe ba:ma ka:na pega:lamiya:, �Ama:godolo Godokono helo ditana, ba:be komo hawakalimima: eta hanohano komo atamo nododa:.� 2Ya:suti tabo ba huiya iba:tamo na:goiya:, �Hegelate ba nihitiga hegela hunu hawihawima: da:neda:mene, la: ba:be komo umiti koga:lama:nemata, �Dumutu hegela hidamo kopowalohoma:ne.� 3Ba:gala eta tetelo hegelate ba owalohuta la: wegola bubu dulamema la: koga:lama:nemata, �Ba:moe hegelate kokubama:ne.� Iyo, la: alomoeno komokomo ulame iya:tawahala, huiyatiya ba:ma tetelo Godote la: ipuwalo dododilina ba:bi komoeno ipuwa la: hidamo kiya:tawahanaha:. 4Kuba ododilipi ba:gala hibima: midiha:pi, iba:te ubi konomola Godokono helo hawakalimino hanohano komo kumima:, huiyatiya Godote eta komo iba:tamo a:kahawakalima:mene. Ba: hibila, ebete Yaonako ipuwado da:hawakalimiya: ba:be hanohano komo kapiya la:tamo ikalamiya:ta.� Ba:ba tetelo Ya:suti ibi miya:palete ba: dito tuya:. 5Ba:bene Ya:suti ebe ta:matapa:go Ga:lili Bobo hapuamo da:na:hiwaliya:, ba:ba tetelo iba:te baa: uwate komo nadoduya:. 6Ya:suti iba:tamo na:goiya:, �La: hidamo nulia:la:. Palawa baa:te ha:kiya hunamo da:mahiga, Pa:lisi kapiyuimipi ba:gala Sa:diyusi kapiyuimipi ibino awagaha komo ba:ba ka:nala. A:iye, ba:mako komote la:tamo akuluhukala:!� 7Ba:bema: iba:te ibi ipuwalo tabo ba:ma ka:na ga:luya:, �Ebete atamo ba:moe tabo begoe mabu ale baa: kawadaheha:.� 8Huiyatiya iba:te tabo da:ga:lutiya: Ya:suti iya:tawate na:goiya:, �La:eno hibima: midi komo kokoha:. La:le baa:heno pola:na tabo badama: ka:ga:lutama? 9Keka: mabu la:le naeno hibi komo hidamo kuminaha:? Nale eta gapogapolo paibo baa: 5,000 dubatamo da:wakalamiholenimo, ba:moe komoma: la:godolo ukui ba:kitana? Ba:ba tetelo la: kebaleta bagolo ka:tabuilameonima? 10Ba:gala eta hegelalo nale sa:ba:ni baa: 4,000 dubatamo da:kawakalamiholimo, ba:ba tetelo la: kebaleta bagolo ka:tabuilamiuima? 11La: bada mabuma: naeno komo hidamo kemalagidolonaha:? Nale la:eno baa: naha komoma: kagoeha:. La: hidamo, Pa:lisi kapiyuimipi ba:gala Sa:diyusi kapiyuimipi ibino awagaha komote la:tamo akuluhukala:!� 12Ba:bene Ya:suku ta:matapa:te ebeno tabo ipuwa hidamo ba:ma ka:na lawiya:, Ya:suti palawa baa: hunamo mahiga tabo da:kiyalamiya:, ebete Pa:lisi kapiyuimipino awagaha iya:tulame komoma: goiya:. Ebe ubihinola ba:be kubate ebe ta:matapa:tamo uluhuku. 13Ba:bene Ya:suti Sisaliya-Pilipai hopamo da:nuluhukuya: ebete ebeno ta:matapi ba:bo nalateda:liya:, �Na Tawakalubino Naniwi iba:te pokomo ka:ga:lanaka?� 14Iba:te na:ga:luya:, �Komopa:te ama: Yoneko beyamo wadulateledawama: ga:lanaka, komopa:te ama: Elayama: ga:lanaka, komopa:te ama: Yelemayama: ga:lanaka, ba:gala komopa:te ama: Godokono ukui hawakalimidawa etama: ga:lanaka.� 15Ba:bene Ya:suti ibi nalateda:liya:, �Huiyatiya la:le na pokomo ka:midinionama?� 16Saimono Pitate tabo ba huiya na:goiya:, �Ama: ba: Kelisotela, iyo, ama: ba: Ka:ka: Godoeno Gudulata!� 17Ba:bene Ya:suti ebetamo na:huiyuya:, �Saimono, Yonekono gudu, ama: koamo na:kalakala! Mabu ba:moe hibi komo eta lumagiti ama: kiya:tumiha:, ama: naeno Hunu Haboeno Nabiwiti iya:tumia:ta. 18Na ama:tamo ba:ma ka:na goemo, �Ama: ba: Pitate, naeno nakolalata. Ba: hibila, nale ba:moe nakola hunamo naeno sose ketema:nemo, ba:bema: Saitanakono hoe komote ba:be sose kubahimima: a:kamodobamene. 19Numa:, nale Ko Gawadalagi Godokono hiya:hiya: ki ama:tamo kikamehoma:nemata. Ba:bema: ama:le Saitanako koduhimima: ba:moe hopolo kebe gigiho ba:moi kia:mo da:kalapilamena: Godokono Hunu Habalo atu kalapila komote konitanama:ne, ba:gala ama:le lumagino ka:ka: komula:mema: ba:moe hopolo kebe gigiho ba:moi kia:mo da:hiya:midamena:, Hunu Habalo atu a:hiya:mida komote konitanama:ne.� � 20Ba:bene Ya:suti ebeno ta:matapi koamo kiyahalamiya:, �Nale Kelisoma: hibilo deda:namo, la:le ba:moe komo komopi akakiyalama:la:!� 21Ba:ba tetelo Ya:suti ebe ta:matapi iya:tulame ba:ma ka:na tupuimiya:, �Nale Yelusalema ko habamo tote tawakaluba:godone koko temeteme ba:bo konuwatema:nemo, Godokono ubila. Ba:bene Godotamo hawa:goeno ikamehopino watowatopi, ba:gala Godokono Tutumu iya:tulamepi, ba:gala komo koko dubu iba:te na kanakapunamema:na:, huiyatiya netewa-kapiya hegelalo Godote na hoene kadipanatenema:ne.� 22Ba:bene Pitate Ya:suku komo ta:matapa:godone nanekela:mo magatate ebe ba:ma ka:na ba:bo nikiyahamiya:, �Kodawa, ba:moe kubate ama:tamo akuluhukala:, wadiyala Godote na:duhima:mene!� 23Ba:bene Ya:suti ohobigate Pitatamo na:goiya:, �Pita, ama: Saitanako huiyala! Na na:miya:pana:! Ama:le naeno nato ukamidadawama: editata mabu amia:no ukui Godotamo kihatitaha:, ama: tawakalubino ukuilo emedenata!� 24Ba:ba tetelo Ya:suti ebe ta:matapi na:goelamiya:, �Kebe lumagiti na ta:mahenema: ubi dihatemene, dopamo ebete ebeno komo adodolete ebeno keha pihiga aguti na ba:bo na:ta:mahena:mene. 25Ba: hibila, kebe lumagiti ebeno ka:ka: natamo damawada:mene ebeno ka:ka:te kalatidima:ne, huiyatiya kebe lumagiti ebeno ka:ka: na mabuma: datutimini, ebete hibi ka:ka: ebo konumima:ne. 26Ba:bema: lumagiti hopoeno ilina hiliyonomo uwatenomo ba uwate, ebeno ka:ka: datutimini ba:be lumagino huiya keka:? Ebete ebeno ka:ka: gala kakalawema: bada ilina na:kikamemene? Gabo puliyala, kitanaha:. 27Ba: hibila, Tawakalubino Naniwiti ebeno hido-talona nopopa:go ba:gala Nabiwi Godokono helonomo alago kopema:ne. Ba:ba tetelo ebete tawakalubino komo ba anagilamelelame ibino modobo oko huiya hibilo kikalamema:ne. 28Na la:tamo hibi tabo begoemo, ba:ma tetelo demedehona komo iba:te Tawakalubino Naniwi ebeno Ko Gawadalagi heloago da:pemene, ba:be ko komo dopamo umiti galane ba:bo koha:lahama:na:.�

will be added

X\