1 Ya:su Kelisoko ba: Godokono Oemedawala ba:gala ebeno Gudula, ba:bene Ya:sukunu Hido Tabo da:tupuimiya: ba:moe ba:be mabula. 2 Ba: hibila, Godote dopamo ebeno ukui hawakalimidawa Aisayako ipuwado Kelisokono pe komoma: ebeno Bukamo tabo ba:ma ka:na miya:tiya:, �Nale Kelisokono dopo hapuamo naeno tabo atadawa kopoemema:nemo, ebete ebeno gabo kopihiduimima:. 3 Iyo, lumagiti dito hopolo tabo ba:ma ka:na ibulu kopegoema:ne, �Kodawoeno gabo na:hiduima:la:, ebeno gabo na:tuputupuima:la:!� � 4 Ba:be mabuma: Yonete a:puluhukuya:. Ebete tawakalubi dito hopolo beyamo ba pewadulatele Godokono tabo ba:ma ka:na polamagiya:, �La:eno kubane ohobila:te beyamo aduti komo lawema: na:pelama:la:, ba:bene Godote la:eno kuba egebolelamete kadodoholelamema:na:ta.� 5 Ba:bema: tawakalubi hiliyonomate Yudiya hopone ba:gala Yelusalema ko habane tolamiya: Yonekono tabo ulihoma:, ba:bene iba:te ibino kuba da:nehawakalilameholiya:, Yonete ibi Yodane Tulilo beyamo ba:bo wadulateliya:. 6 Ba:ba tetelo Yonekono emede komo komopino emede komo huiyaha:, mabu ebete ka:molo-goe ipo kuba kaliko kau-goe tama kamaka:go pulinakui, ba:gala ebeno baa: wawaka ba:gala molo benahanakui. 7 Yonete Godokono tabo ba polamagi na:goiya:, �Eta lumagiti naeno gala hapuni ba:pena. Ebeno helo konomote naeno helo na:gogolona, ba:bema: na hidoenoha: nale hopamo tudiwatate ebeno nato ukulalemema:. 8 Nale la: beyamo wadulatelemata, huiyatiya ebete Godokono Gobogobamo la: kopewadulatelema:na:ta.� 9 Ba:ba tetelo Ya:suku Ga:lili hopoeno Nasalete habane pete, Yonete Yodane Tulilo ebe beyamo ba:bo adutiya:. 10 Ya:suti beyane ba podolo ba:ba tetenomolo Godote ebeno Hunu Haba a:hiya:midutalo ba:bo umiya:, ba:bene ebete Godokono Gobogobo bumiya: ebetamo gimai holamo da:pihitigutiya:. 11 Ba:bene tabote Hunu Habane ba:ma ka:na pihitiguya:, �Ama: naeno kapiya Gudunomolata. Na ama:tamo na:kalakalutamo.� 12 Ba:ba tetenomolo Godokono Gobogobote Ya:suku dito hopamo na:magatuya:, 13 ba:bene ebete dito hopolo 40 hegela ba nemede, Saitanate kuba gabamo kemogabuimima: ebetamo ba:bo uluhukuya:. Ba:bolo hiya:hiya: helohelo ilinate na:pola:nuya:, huiyatiya Godokono nopopa:te ebe na:buiya:minutiya:. 14 Ba:bene gabomana:te Yoneko du genamamo dihatiya:, ba:ba tetelo Ya:suti Ga:lili hopamo Godokono Hido Tabo olamaga:go ba:bo piya:. 15 Ebete na:pegoiya:, �Hido tete ba: a:pe. Godokono Ko Gawadalagima: eda: tete tatalila, ba:bema: la:eno kubane ohobila:te Hido Tabo hibima: na:mida:la:.� 16 Ba:bene Ya:suku Ga:lili Bobo dododo ba tonato, ebete daha uwateholepi netewapi ba:bo nulamiya:, Saimonoko ba:gala ebeno ekawi A:nduluku iba:te daha kamahamo na:hutiya:. 17 Ya:suti iba:tamo na:goiya:, �La: na na:ta:mahena:la:, ba:bene nale la: tawakalubi uwatepima: komidilima:nemata.� 18 Ba:ba tetenomolo iba:te ibino kamahu miya:palete Ya:suku ba:bo ta:matuya:. 19 Ba:bene Ya:suti nanekela:mo gala katote Sebedikono gudu Ya:imesiko ba:gala ebeno ekawi Yoneko ba:bo kanulamiya:, iba:te ibino bogelo emedehote kamahu bihiduilamitiya:. 20 Ya:suti ibi da:ka:lamiya:, ba:ba tetenomolo iba:te ibino nabiwi Sebediko miya:pate Ya:suku ba:bo ta:matuya:, huiyatiya ibino nabiwino mani oko dowatihonama: ba:bi komo dubate eba:go bogelo pola:nuya:. 21 Ba:ba tetelo Ya:suti ebe ta:matapa:go Kapeniyama habamo tolamiya:. Ba:bene Yu tawakalubino okoha: talona hegelalo ebete ibino baidi ibubulamehole genamamo tote ibi da:niya:tulamitiya:, 22 iba:te ebeno tabamo na:hanohanohutiya:, mabu ebete Godokono heloamo iya:tulamitiya: huiyatiya ebe ibino Godokono Tutumu iya:tulamepi huiyaha:. 23 Ba:be atu tetelo kuba gobogobagoeno dubuti ibino baidi ibubulamehole genama gulu na:lutiya:, 24 ba:bene ebete gaa:tepahalo na:goiya:, �Ya:su Nasaletenapi, ama: atamo bada komo na:kododiomena:? Ama: a kubahia:mema: ka:pa:wa? A:iye, na iya:tawala amia:no komo, ama: ba: Godokono Hido-talona Dawalata!� 25 Ya:suti huiyatiya ebe na:kiyahamiya:, �Ama: kodakodate, ebegodone nuluhuka!� 26 Ba:bene kuba gobogobote gaa:tepahago ba:gala ewagelehago dubuino apene duluhukuya:, 27 tawakaluba:te ba:be komoma: na:hanohanohutiya:. Etate eta goemenakui, etate eta goemenakui, �Moe badala:ka:? Moe eta hiya: uli iya:tulame komola:ka:? Ba:moe dubuino helo konomola! Numa:la:, kubakuba gobogobate ebeno tabamo a:papamila:!� 28 Ba:bema: hibila, ba:be atu hegelalo Ya:sukunu oko owati tabote ba:be Ga:lili hopo konomamo ba: dito tuya:, iyo, puya:te ba:bolo demedehonama: ibi hiliyonomate ebeno komoma: tabo ba:bo nikiyahuya:. 29 Ba:bene Ya:imesiko Yoneko iba:te Ya:sukuba: Yu tawakalubino baidi ibubulamehole genamane pikuliti, Saimonoko A:nduluku ibi netewapino genamamo tolamenomo tolamiya:. 30 Ba:bolo Saimonokono moto kakidubu ape koe tawetawa:go watitiya:, ba:bene tawakaluba:te ba:moe kamenoeno komoma: Ya:suku ba:bo ga:lamiya:. 31 Ba:bema: Ya:suti ebetamo pete ebe kokotamo da:padipatiya: ebeno tawetawete na:wibuya:, ba:bene ba:be kamenate mahigate ibi mabuma: baa: okalimi oko ba:bo tupuimiya:. 32 Ba gapogapohona hegelate da:nihila:minaniya:, habaluba:te hiliyonomo temetema:gopi ba:gala kuba gobogobagopi Ya:sutamo ba:bo magaheleniya:, 33 ba:bene komo ibi hiliyonomate genama gigiho dopo hapulu pepola:nuya:. 34 Ba:ba tetelo Ya:suti ibi ipuwalo komo hiya:hiya: temetema:gopi hiliyonomo hiduilamenate, ba:gala hiliyonomo kuba gobogobo komopa:godone ba:bo oelameniya:. Ba:bi kuba gobogobo iya:tawahala Ya:suku ba: Godogodone piya:, ba:bema: iba:te ebeno komo kohawakalimima: ebete tabo ga:la talona bihatelameniya:. 35 Ba:be du tetenomolo owaloho hapuamo Ya:suti ebeno u wata bahini mahiganate, ebe ha:kiya tataba hopamo tonate Godokoba: tabo ba:bo nega:laniya:. 36 Ba:bene duiduiyalo Saimonoko ba:gala ebeno mabulubi iba:te Ya:suku ohowadima: da:tolamiya:, 37 iba:te ebe numiti na:nega:lamiya:, �Hiliyonomo tawakaluba:te ama: bohowaditata.� 38 Ba:bema: Ya:suti iba:tamo na:goiya:, �Kubaha:, a kotolamiya:. Nale komo habahabalo Godokono tabo konolamagima:nemo, mabu na ba:bema: piya:mo.� 39 Ba:ba tetelo ebete Ga:lili hopoeno hiliyonomo habahabamo tonakui, ba:bene ebete Yu tawakalubino baidi ibubulamehole genama gulu Godokono tabo olamaginakui ba:gala ebete kuba gobogobo tawakaluba:godone akoelamenakui. 40 Ba:bene kuitikuita:goeno dubuti Ya:sutamo pete ebeno pupamo pemedete ebetamo koamo ba petoetoe na:pegoiya:, �Amia:no ubi ditama:na, ama:le na kohiduinamema:na:ta.� 41 Ya:suti ebe koamo malemaletelo ebeno kokoto hogaminate ebe ologilo na:goemiya:, �Na ubila, ama: na:hida!� 42 ba:bema: ba:ba tetenomolo kuitikuiti temetemete ebegodone wibote ebe ba:bo hiduya:. 43 Ba:bene Ya:suti ebe ba oeme koamo ba:ma ka:na kiyahamiya:, 44 �Ama: naeno komoma: tawakalubi akanikiyalama:la:. Wadiyala ama: huiyatiya ba:moe tetenomolo tote amia:no ape Godotamo hawa:goeno ikamehodawatamo na:nemutuimiya:, ba:bene hawa:goeno malemale ilina Godotamo akona:nikamiya:, Mosesete dolamagiya: ba:ba ka:na. Ba:be komote tawakalubi kiya:tulamema:ne amia:no temetemete a:wibui.� 45 Huiyatiya ba:be dubuti ba to tawakalubi hiliyonomo na:kiyahalamenatuya:, ba:bema: Ya:suti komo habahabamo hawakala toma: kamodobuya:ha:. Ba:ba tetene tupuimiti ebete huiyatiya dito hopolo emedenami, ba:bene hapuhapuni tawakaluba:te ebetamo pelamenakuya:.
