1 - 2 Naeno hido lumagi Tiyopolasi, nolata. A ipuwalo kebe komokomate ya:lo dikulihuya:, puya:te tupuimi mabuni ibino baidinomamo ba:bi komo dulameholiya:, komo iba:te Godokono Hido Tabo ba olamagimi ba:bi atu komokomo a ba:gala komo tawakalubi hiliyonomo ba:bo kiyahaa:miya:. Ba: hibila, ba:ba tetene tupuimiti komopi hiliyonomate ba:bi komokomo pepamo hibinomolo miya:tehoma: newagelenama: huiyatiya ibi ipuwalo etate oko hidamo kupuliya:ha:. 3 Ba:bema: naeno kodawa, nale ba:moi hiliyonomo komokomo ibino tupuilame mabuni hidonomamo ba emalagidolenape, naeno tepo ipuwoeno ukuilo ubi ba:bo ihatimo ama:tamo buka ododiti ba:moi komokomo kotuputupuilamema:, 4 iyo, komopa:te ama: diya:tumihui, ama:le ba:bi hiliyonomo komokomo hibinomolo kiya:tawahama:, nale ba:moe komo ba:bema: ododimo. 5 Ba:ba tetelo Heloditi Yudiya hopoeno Ko Gawadalagima: ba eda:na, eta dubu ebeno mahilo Sekalayatela, ebete Abayakono kapiyuimidawama: eda:nami, ebe ba: Godotamo hawa:goeno ikamehodawa etala. Ebeno kamenoeno mahilo Elisabetitila, ba:be kamenoeno nabiwi atumu Godotamo hawa:goeno ikamehodawala. 6 Ba:bene ibi netewapino emede komote Godokono holoholo hapulu tuputupunomoma: ba eda:na, iba:te ebeno hiliyonomo tutumu tabamo hibinomolo papamila:nama:. 7 Huiyatiya ibi niliya, iba:godolo gudu puliyanomola mabu Elisabetiko hogoha: kamenama: eda:nami, iyo, Sekalayako ba:gala Elisabetiko iba:te kadele kabelenomoma: ba eda:ha gudu umi wadiyaha:. 8 Ba:bene eta manomelo Sekalayakono gu tawakalubino tetete uluhukuya:, iba:te Godoko Adikumino Hiya: Genamalo hiya:hiya: oko kopowatihoma:. Ba:bema: eta hegelalo Sekalayate ba:bolo oko nowatitiya:, 9 mabu ba:be hegelalo ebeno tawakaluba:te Godokono ubi komamo papamila:halo ebe belawiya:, ebete Godoko Adikumino Genama guamo na:pa:gate, ba:bolo ebete hido nibo puhulu ilina patapata hunamo ba nehaminahale Godotamo konikamehoma:. 10 Ba:bene ba:bi ilinate koelo ba wamotita tawakalubi hiliyonomate Godoko Adikumino Genama tamelo ibino toetoe tabo Godotamo ba:bo nolamagimitiya:. 11 Ba:ba tetelo Godokono nopodawate hido nibo puhulu ilina wamoteno patapata tu hapudu ba pehawakala Sekalayako kapiyatamo ba:bo puluhukuya:, 12 ba:bene ebete ebe umiti ukui bilibilinomoma: eda:lo konomamo toletoliya:. 13 Huiyatiya nopodawate ebetamo na:goiya:, �Sekalaya, ama: akatoletola:la:. Godote amia:no toetoe tabo uli, ba:bema: amia:no kamena Elisabetiti dubu gudu kalahimima:ne. Ama: ebeno mahilo Yonema: na:ka:miya:. 14 Ba: hibila, ebete da:hawakalamene ama: konomamo ba:bo kokalakalama:na:ta, ba:gala tawakalubi hiliyonomate ba:be mabuma: atumu konomamo kakakalakalahama:na:. 15 Ebete menokoeno tepolo ba emedena Godokono Gobogobote ebe ya:lo kotabuimima:ne, ba:bema: Godokono dopo hapulu ebete kodawama: keda:ma:ne, ba:gala ebete helo gao beya a:kaninakamene. 16 Ba: hibila, ebete hiliyonomo Isalaela tawakalubi ibino Kodawa Godotamo gala kakamagahelema:ne, 17 iyo, ebete aeno Kodawa dopamete kotoma:ne ba:gala Hido-talona Gobogobote ebe hunamo ba emede ebete helonomoma: keda:ma:ne, Godokono ukui hawakalimidawa Elayako keba ka:nala:ka: ba:ba ka:na. Ba:bema: ebete nabi ba:gala gugudi kapiyama: gala kakamidilima:ne, iyo, ebete Godokono tabo ulihoha:pino ukui hiya:ma: midililamete kotuputupuilamelelamema:ne, ba:gala ebete Kodawoeno tawakalubi kohiduilamema:ne ebeno pe komoma:.� 18 Sekalayate Godokono nopodawatamo na:goiya:, �Na ba:moe komo hibinomolo keba ka:na na:kiya:tawamo, mabu na kadelenomola ba:gala naeno kamena kabelenomola?� 19 Ba:bene Godokono nopodawate na:huiyuya:, �Na ba: Ga:ibiliyolote, Godokono holoholo hapulu la:nanakomo, iyo, na ebete poename ba:moe hido tabo ama: kopikiyamema:. 20 Naeno tabote hibinomoma: keda:ma:ne, huiyatiya ama:le ba:be tabo hibima: kamidiha:, ba:bema: ba:ma tetene tupuimiti ba:be hibi komote puluhuku teta:mo ama: tabo olamagiha:ma: keda:ma:na:ta.� 21 Ba:ba tetelo hiliyonomo tawakaluba:te Sekalayakono puluhuku komo ba latimita iba:te na:ga:litiya:, �Tete ga:ga:nomolo ebete Godoko Adikumino Genamalo badama: ka:luta?� 22 Ba:bene ebete Godoko Adikumino Hiya: Genamane da:puluhukuya: tawakaluba:tamo tabo olamagima: kapemodobuya:ha:. Huiyatiya ebete iba:tamo kokotamo da:polamagiya:, ba:be komodo iba:te ba:ma ka:na iya:tawahuya:, ebete Godokono Genamalo ba luta, Godokono nopodawate ebetamo duluhuku ebeno baidi hiya:ma: ba:bo eda:hame. 23 Ba:bene Sekalayakono oko tetete Godoko Adikumino Genamalo da:wibuya:, ebete ebeno habamo ba:bo tuya:. 24 Ba:bene komo hegela da:petohuya: ebeno kamena Elisabetiti lamituma: dediya:, ebete ba:ba tetene tupuimiti paibo manome ipuwalo ebeno genamanomolo emediya:. 25 Ba:ba tetelo ebete ebeno tepo ipuwalo tabo ba:ma ka:na goiya:, �Ka:lo kuititi hegela tetenomolo Godote na a:malemalenateni, iyo, ebete gudu natamo ba ikaname naeno hilopo komo gobogobamo ihatenami.� 26 Ba:bene Elisabetiti lamituma: eda:te, sikisi manome da:petohuya: Godote ebeno nopodawa Ga:ibiliyoloko Ga:lili hopoeno Nasalete habamo ba:bo poemiya:. 27 Ebete bohele Ma:litamo Godokono nopo badahiya:, ba:be bohele dopamo Yausepetamo a:galuimiya:, ba:moe dubu Yausepeko ba: Ko Gawadalagi Da:ibidikono eyono gudu etala. 28 Ba:bene nopodawate Ma:liko na:pegoemiya:, �Ama: nolata, Kodawa Godote ama: malemalelo a:lawia:ta! Ebete ama:go bemedena!� 29 Ba:bema: Ma:liti ba:be tabo duliya: ukui bilibilinomoma: eda:lo ebeno tepo ipuwalo na:goiya:, �Moe komo badala:ka:?� 30 Nopodawate ebetamo na:goiya:, �Ma:li, ama: akatoletola:la:, mabu Godote ama: ba:ma ka:na a:malemaleta:ta, 31 ama:le lamituma: eda:te dubu gudu kalahimima:na:ta, ba:bene ama: ebeno mahilo Ya:suma: na:ka:miya:. 32 Ebete konomoma: keda:ma:ne, tawakaluba:te ebe Hununomo Godokono Guduma: ba:ka:minakomena:, iyo, Godote ebe Ko Gawadalagima: komidima:ne, ebeno iniwa Da:ibidiko keba ka:na kemedenami ba:ba ka:na. 33 Ba:bema: hibila, Ya:ikobokono eyoni gugudi ipuwalo ebete emedena emedena tetelo Ko Gawadalagima: beda:namene, iyo, ebeno Ko Gawadalagima: eda: komote a:kawibonamene.� 34 Ma:liti huiyatiya nopodawatamo na:goiya:, �Na bohelenomola ba:gala na awihinola. Ba:moe komote natamo keba ka:na na:kuluhukumini?� 35 Nopodawate ebetamo na:huiyuya:, �Hido-talona Gobogobote ama:tamo kopema:ne, ba:gala Godokono helote ama: hunamo kemedema:ne, ba:bema: ama:le dalahimimina: ba:be talona gudu tawakaluba:te Godokono Guduma: ba:ka:minakomena:. 36 Ama: amia:no menokoeno naniko Elisabetikono komo nemalagidola. Dopamo tawakaluba:te na:ga:lanakuya: ebe hogoha: kamenala, huiyatiya ebete kabele tetelo lamituma: eda:te sikisi manome ba: a:wibui. 37 Ba: hibila, hiliyonomo komokomo ododilima: Godogodolo helo bitana, eta ododiha: komote ebegodolo kitanaha:.� 38 Ba:bema: Ma:liti na:goiya:, �Na Kodawa Godokono huiyaha: oko bohelela. Wadiyala ama:le da:gaa:, ba:be komote nuluhukamene,� ba:bene Godokono nopodawate ebegodone ba: dito tuya:. 39 Ba:ba tetelo Ma:liti tiyonomo mahigate Yudiya hopoeno hunuhunu hakamo tote eta muhulu habamo dito nuluhukuya:. 40 Ba:bene ebete Sekalayakono genamamo nodolote Elisabetiko ba na:pa:watameho ebetamo nolata tabo ba:bo nolamagiya:. 41 Ba:bema: Elisabetiti Ma:likono nolata tabo duliya:, ba:ba tetenomolo ebeno tepo ipuwalo guduti ko kalakala lawete ba:bo midiwihuya:. Ba:bene Godokono Gobogobote Elisabetikono tepo ipuwa da:tabuimiya:, 42 ebete tabo hunamo adipatelo Ma:litamo na:goiya:, �Hiliyonomo kamenakamena ipuwalo Godote ama: hunamo adipatelo hidonomamo bowalubinamena:ta, ba:gala ama:le dalahimimina: Godote ba:be Kodawa atumu emedena tetelo bowalubinamene. 43 Naeno Kodawoeno menoko, ama:le na unamema: da:pa: kalakala konomola, huiyatiya ba:moe hidonomo komote na kuba lumagitamo badama: kuluhuku? 44 Ba: hibila, nale amia:no tabo dulimo, ba:ba tetelo naeno tepo ipuwalo guduti ko kalakala lawete ba:bo midiwiho, 45 ba:bema: ama:tamo kalakala bada konomola:ka:, mabu ama:le Godoko hibima: a:midia:ta ebeno tabote ama: ipuwado hibinomoma: keda:ma:ne!� 46 Ba:bene Ma:liti na:goiya:, �Naeno emalagidolote Godoko nawagaminuta, 47 iyo, naeno tepo ipuwate naeno Ka:ka: Mula:dawa Godotamo na:kalakaluta, 48 mabu ebete na emalagidolonelo kalakala komo ododi na ebeno deha:poto huiyaha: oko boheletamo! Ba:bema: ba:ma tetene tupuimiti emedena emedena tetelo tawakalubi hiliyonomate na kalakala lumagima: ba:ka:naminakomena:, 49 mabu Helonomo Godote natamo koko hidohido komo ododili, iyo, ba:be Kodawoeno mahilo ba: talonala! 50 Ba: hibila, puya:te ebe da:tolemena ebete iba:tamo malemale bihatenakomene, iyo, tawakaluba:te ba:moe hopolo tete ga:ga:nomolo ba emedehona, ebete iba:tamo ba: ba:ma ka:na bewagelenakomene. 51 Ba:bema: a tetelo ebete ebeno kokotamo koko komokomo ododili, ba:gala puya:te ibi ha:kiya awagahalo kokoma: da:ga:lui, ebete ibino nopo kubahilamete ebeno heloamo ibi a:ta:malateli. 52 Ba:gala ebete koko gawadubu ibino helo habane tama:mo a:miya:ti, huiyatiya ebete ba:be atu tetelo hegehege tawakalubi a:wadiya:paa:lateli. 53 Iyo, puya:te awaelo demedehonama:, ebete ibi hidohido ilinamo ba tabuilame, huiyatiya dogodogo ilinagopi ilinaheno dito oelami. 54 - 55 Ba:bema: hibila, ebete aeno iniwala:tamo hibinomolo da:goiya:, ba:be tabote a tetelo ba: na:hawakala, iyo, tete tatalila ebeno owalubi komote kuluhukuma:ne ebeno huiyaha: okodawa Isalaelatamo. Ba:moe ba:be mabuma: Godote A:ibalahamatamo kebe malemale ka:hawakalimiya:, ba:be malemala:mo ebeno eyoni gugudi emedena tetelo bemalagidolenamene!� 56 Ma:liti ba:moi tabo komokomo olamagi da:wibuya:, ebete netewa-kapiya manome Elisabetikoba: emedete, ba:bene ebete ebeno habanomamo gala dito katuya:. 57 Ba:bene Elisabetikono gudu alahimi tete da:piya: ebete dubu gudu alahimiti, 58 ebe tamelo demedehonama: ba:gala ebeno mabu tawakalubi, iba:te Godokono hido owalubi komo Elisabetigodolo umiti eba:go na:kalakalahuya:. 59 Ba:bene sa:ba:ni hegela da:petohuya:, a:iti hegela tetelo iba:te dubu guduino tama itamida kukala ododima: ba:bo pelamiya:. Ba:ba tetelo komopa:te ubi bihatiya: ba:be gudu ebeno nabiwi Sekalayakono mahilamo koka:mima:, 60 huiyatiya ebeno menokote na:goiya:, �Ao, la: ebeno mahilo Yonema: na:ka:ma:la:.� 61 Ba:bene iba:te la:wa:hate ebetamo na:ga:luya:, �Numa:, la:eno tawakaluba:godolo ba:moe mahilo kitanaha:!� 62 Ba:bema: iba:te ebeno nabiwitamo kokotamo ba ga:la ebe nalatediya:, ebeno ubi keba ka:na kitana gudutamo mahilo kikamema:. 63 Ba:bene Sekalayate kokotamo olamagilo komopa:te tabo miya:teno ilina adahemema: da:goelamiya:, ebete ba:be ilina lawete ba:ma ka:na miya:tiya:, �Ebeno mahilo Yonetela.� Ba:be mabuma: iba:te konomamo hanohanohuya:, 64 ba:bene ba:ba tetenomolo Sekalayakono tabo olamagi komote da:kahidomiya:, ebete Godoko milimiho ba:bo tupuimiya:. 65 Ba:bema: ebeno habanapa:te ba:bi hanohano komo dulamiya: iba:te koamo toletolehuya:, ba:bene iba:te ba:bi komokomo tawakalubi da:nikiyahalamiya:, ba:be tabote Yudiya hopoeno hunuhunu hakoeno hiliyonomo habahabamo ba:bo tuya:. 66 Ba:gala puya:te ba:be tabo duliya: iba:te ba emalagidolo na:ga:luya:, �Ba:moe gudu ebete kebako dawama: na:keda:mene?� Iba:te ba:moe tabo bega:luya: mabu ibino umi ipuwalo Godokono helote ba:be gudugodolo hibinomolo itanuya:. 67 Ba:bene Godokono Gobogobote Yonekono nabiwi Sekalayakono tepo ipuwa da:tabuya:, ebete Godokono ukui ba:ma ka:na hawakalilamiya:, 68 �Godote Isalaela tawakalubi hidonomamo dowalubilinako, ale ebe ba:bema: komilimihoma:nema:, mabu ebete ebeno tawakalubi owalubilima: ba: na:pe, tete tatalila ebete ibino kuba ododili ipuwane ibi kopuluhukulatelema:ne! 69 Iyo, Godote a mabuma: dadipati, ba:be Ko Ka:ka: Mula:lea:medawate ba: na:pe, ebe ba: Godokono okodawa Da:ibidikono eyono gudu etala. 70 Ba: hibila, puya:te dopamo tetelo Godokono talona ipuwalo demedehonama:, ebete ba:bi okopi ipuwado ebeno ukui ba hawakalimi na:goiya:, 71 puya:te maubahalete atamo alaholoho komo dododinaka, ebete a ibino helo kokotone kuluhukua:tema:ne. 72 Iyo, ebete eta tabo ba:ma ka:na kagoiya:, ebete aeno iniwala:tamo ebeno malemale bihatenamene, ba:gala ebete iba:tamo kebe nopo hibinomolo da:tamotiya:, ba:be hido-talona tabo ba emalagidolona emedena tetelo ebete bododinakomene. 73 Ba:gala ebete aeno iniwa A:ibalahamatamo hibinomolo na:kagoiya:, 74 puya:te ago dalaholohonaka, ebete a ibino kokoto ipuwane kuwatema:ne, ba:bene ale ibi tolelameheno ebe kapiyatamo oko bowatihonakoma:. 75 Iyo, ale ebeno holoholo hapulu talona tawakalubima: ba eda:hana, ale emedena tetelo ebeno tuputupu gabodo ba:wapata:lamenama:.� 76 Ba:bene Sekalayate ebeno tabo moga:melo gala na:kagoiya:, �O naeno gudu Yone, tawakaluba:te ama: Hununomo Godokono ukui hawakalimidawama: ba:ka:minamena:ta, iyo, ebete da:poememene, ama:le ba:be Kodawoeno gabo dopamete ba tonato, ebeno gabo kohiduimima:na:ta. 77 Ba:gala ama:le Godokono tawakalubi ba:ma ka:na kiya:tulamema:na:ta, ebete ibino kuba ba egebolelame kadodoholelamema:ne, iyo, ebete ba:be gabodo ibino ka:ka: komula:lelamema:ne. 78 Ba:bema: hibila, aeno Godote a konomamo ba malemalea:tena, ebeno ka:ka: mula:leno alote atamo ba:bo kopuluhukuma:ne, hegelate tawakaluba:tamo da:puluhukunako ba:ba ka:na. 79 Ba:be alote ebeno Hunu Habane kopa:la:minama:ne, hoe ipuwalo ba:gala du ipuwalo demedehona ba:bi tawakaluba:tamo, ba:bema: kalakala konomola, Godote ebeno tatabalo wapata:lame komoeno gabo a ba:bo kiya:tua:mema:ne.� 80 Ba:bema: Sekalayakono guduti ba ape Godokono Gobogobote ebe ipuwalo helonomoma: ediya:, ba:bene ebete dito hopamo tote ba:bo nemedenami, huiyatiya galane Godokono ubi tetelo ebete Isalaela tawakaluba:tamo puluhukuya:.
