Yud 1

1Na ba: Yudate, Ya:su Kelisokono okodawa etala ba:gala Ya:imesikono ekawila. La: hibima: midipi Nabiwi Godote dopamo da:ka:lamiya:la, iyo, ebete la: pui malemalelo demalagidolena ba:gala Ya:su Kelisokono itagua:midale ipuwalo demedehonama, na ba:moe leta la:tamo poememo. 2Ba:bema: wadiyala hete komo ba:gala lumagitamo kuba huiya ikameha: komo ba:gala malemale emalagidolo komo, ba:moi netewa-kapiya komate la:godolo konomamo na:pola:namena:. 3- 4Naeno hidohido mabuluba:la:, ale Godogodone kapimilo da:lawiya:ma:, na dopamo ba:be ka:ka: mula: komoma: leta ipuwalo olamagima: ewagelimo. Huiyatiya ba:ma tetelo eta ukuiti natamo a:pi, mabu nale ba:moe komo ulimo, Godokono ubi komamo papamila:haha: dubate la:eno kapiyuimi ipuwamo diya gabodo a:pa:pa:la:huya:. Ba:be mabuma: na ubila ba:moe eta komamo la: ba:ma ka:na kowalubilima:, Godote a ebeno tawakaluba:tamo dikaa:miya:, wadiyala la: ba:be hibima: midi komoma: helonomamo nalaholonakuya:la:. Numa:la:, ba:bakobako dubate Godokono malemale hawakalimino tabo hiya:ma: miditi na:ga:lanaka, lumagiti kuba dododimini Godote huiya a:kikama:mene mabu ebeno malemale konomola, ba:gala iba:te na:kaga:lana Ya:su Kelisoko hibi ka:ka: mula:dawaha:. A:iye, ebe kapiya ba: aeno hibi Namutudawala ba:gala Kodawala, ba:bema: ibino kuba mabuma: Godokono Buka tabote ya:lo tetenomolo a:goiya:, galane iba:te ibino temeteme huiya hibilo kolawema:na:! 5Iyo, Godote kuba ododilipa:tamo huiya dikalamemene, la: ba:be komo dopamo iya:tawahuya:mata, huiyatiya na ubila kebe olalati komote Godokono Isalaela tawakaluba:tamo duluhukuya:, la: ba:moe komo gala na:kemalagidolala:. Numa:la:, Godote ibino ka:ka: mula:lelamelo Isipiti hopone ibi duluhukulateliya:, gala hapuni komo iba:te ebe hibima: kamidiya:ha:, ba:bema: ebete ibi dito anakapulamiya:. 6Ba:gala ba:moe eta komo na:kuma:la:, tupuimi mabuni Hunu Haboeno komo nopopa:te ibino hido emede haba miya:pate Godotamo alaholo komo ba:bo tupuimiya:. Ba:be mabuma: Godote ibi ta:tehoha: auli hala:mo matuhulameholete du ipuwamo dito iya:hekiya:, iba:te ba:bolo ibino kuba huiya uwatema: Godokono Ko Hegela kolatiminama:. 7Ba:gala wadiyala la: Sodomo habanapi ba:gala Gomola habanapi ba:gala ibi tamelo demedehonama: ba:bi habahabanapi ibino komo atumu na:kemalagidolala:. Ibi hiliyonomate atumu Godokono kukala badikamidaliya:, ba:ma ka:na ibi ipuwalo etate etatamo kateneno hiya:hiya: kuba ubi komokomo bododilinakuya:. Ba:be mabuma: Godote ibino kuba huiya iba:tamo ikalamiya:, ba:bene ba:ma tetelo iba:te ha:gaha: koe ipuwalo ko temeteme biya:tawahana. Ba:moe ba:be mabuma: puya:te ba:ma tetelo kuba ododili ipuwalo demedehona, wadiyala iba:te ba:bi tawakalubino temeteme komo ba emalagidolo hidohido ukui nuwata:mena: iba:te atu kuba huiya lawekapoma:. 8Ba:bema: puya:te diya gabodo la: ipuwamo da:pa:pa:la:hui, ba:bi dubate ba: atumu ibino kateneno kuba ododili ubi gabodo ibino ape ba:bo kubahilamenaka. Ba:gala iba:te Godotamo papamila:hale ubiha:ma: eda:halo Hunu Haboeno nopopi ba:bo iduduputilamenaka, mabu ba:bako awagaha ukui komate iba:tamo hiyolo ikulinaka. 9Huiyatiya wadiyala la:le Hunu Haboeno nopopino Gawadalagi Maikolokono komo nemalagidolala:, ebeno helo konomola huiyatiya ebete ba:be komoma: kawagahanaha:. Ba:bema: keba tetelo ebete Mosesekono hoe ape lawema: Saitanakoba: dolowabeletihuiya:, ba:ba tetelo ebete Saitanatamo eta iduduputimi tabo goeheno na:goiya:, �Kodawa Godote ha:kiya ebeno tabamo ama: koduhimima:na:ta, huiyatiya naeno heloamo nale ama:tamo eta komo a:kododa:mo!� 10Huiyatiya la: ipuwalo da:pola:na ba:bi dubuino komo eba ka:naha:. Iba:te Hunu Haboeno komokomo iya:tawaha:, ba:bema: iba:te ba:be haboeno nopopino komoma: ibi iduduputilame tabo bega:lana. A:iye! Iba:te kapiya komo iya:tawahanomola, ba:be komo ba: ba:moe hopoeno katena:mo wapata:lame gabola, iyo, ibi ba: tumu goegoe keba ka:nala:ka: ba:ba ka:nala mabu iba:te hidohido ukuihino dito emedehona! Ba:bema: numa:la:, ibino kateneno ubi komate ibi hibilo kanakapulamema:na:. 11Iyo, Godote ibino kuba huiya iba:tamo dikalamemene ba:be kuba huiya konomoma: keda:ma:ne, mabu iba:te Ka:inikono gabodo tolame ya:lo a:tupuimiya:. Ba:gala ibi Ba:ilamako keba ka:nala:ka: ba:ba ka:nala, iba:te mani koamo emalagidololo koko kuba komokomo ba:bo ododilinaka. Ba:gala ibi Kolako huiyama: eda:hana, ba:ma ka:na iba:te Godotamo papamila:ha ubihinola, ba:bema: hibila, Godote Kolakono kuba mabuma: ebe keba ka:na kanakapumiya:, ebete ibi ba: atumu kohawaminadigalema:ne. 12Numa:la:, la: hibima: midipino kapiyuimi poko baa: naha tetelo, ba:bi dubuino komo ba: hido baa: ipuwalo da:pola:na ba:bi kuba nene huiyala, mabu baa: naha ipuwalo hilopohenola, iyo, ibi ha:kiya ibi kapiya bemalagidolena. Ba:bema: hopote gagalema: deda:, ba:ba tetelo huhuti da:wadahenako ba:bi bubuti dito kopokoa:tahalema:na: huiyatiya wegolate a:koamene, ba:bi dubu ba: ba:ba ka:nala mabu iba:te tawakaluba:tamo giba a:kikalama:la:. Ba:gala ba:bi dubu ba: nolohoha: gao kehala, mabu ko gogote da:pemene ibino haha da:pemagobelelamemene hakamo dito kopiya:hekema:ne, iyo, ibino ka:ka:te ba:ba ka:na wibonomo kowibohoma:na:. 13Ba:bema: komo netewa go tabote ba:bi dubuino komo hawakalimima: ba:pola:na. Dopo go taboeno komo ba:ma ka:nala, ba:bi dubuino hilopo ododili komo ba: koko gawiyate hununomamo da:pakaminanaka ba:ba ka:nala, ba:gala eta go tabo ba:ma ka:na itana, ba:bi dubu ba: du ipuwalo keka:keka:lo da:wapata:lamena ba:bi oloki huiyala. Ba:bema: Godote ibi mabuma: kebe du bobo konomo ya:lo dododilamiya:, ebete ibi ba:bamo konoelamema:ne iba:te emedena tetelo ba:bolo temetema:go konemedehonama:. 14Numa:la:, A:da:mekono eyoni gugudi hiliyonomo ipuwalo Inokote ba: sa:ba:ni badininipaloeno dopo dubu guduma: ediya:, ba:gala ebe ba: Godokono ukui hawakalimidawa etala. Ba:bema: ba:moe Inokote ba:bi kuba dubuino komoma: ya:lo tetelo ba:ma ka:na goiya:, �Numa:la:, Kodawa Godote ebeno mumulunomo talona nopopa:go pete, 15ebete hopo habanapino komokomo hiliyonomo ba panagilamelelame ebeno ubi komamo papamila:haha: tawakaluba:tamo kuba huiya kopikalamema:ne. Iyo, iba:te Godotamo kebe kuba komokomo dododilinaka ba:gala ebetamo kebe kuba tabo da:ga:lanaka, ba:bi komokomoma: kuba huiyate iba:tamo hibilo kopema:ne.� 16Ba:bema: wadiyala la: ba:moi kuba ododilipino komo hidamo niya:tawahala:. Iba:godolo ubiha: tabo ga:la konomola, ba:gala ibi ha:kiya ibino kuba ulameheno komopi kubapima: ka:laminaka. Iba:te ibino kateneno ubi gabodo wapata:lamema: helohelonomola, ba:gala ibi ha:kiya ibi awagaminalelo eta lumagi ha:da amiho gabodo da:milimihomena:, ba:ba tetelo iba:te ubi bihatena ibino tabo olamagi komodo ebegodone eta hido komo dito kolawema:. 17Ba:bema: naeno hidohido mabuluba:la:, Kodawa Ya:su Kelisokono oelamepi dubate la: dopamo da:kiyalamiya:la, wadiyala la: ba:be tabo gala hidamo na:kemalagidolala:. 18Iba:te la:tamo ba:ma ka:na ga:luya:, �Kuititi tetelo kubapa:te Godokono ubi komamo papamila:ha ubiha:ma: eda:halo ibino kateneno ubi gabodo ba wapata:lame la: hibima: midipi kiya:da:latelema:na:ta.� 19Numa:la:, Ya:sukunu oelamepino tabo ba: hibila. Ba:moi kuba ododilipi ba: la:eno kapiyuimi ipuwalo anagiya:mida komo dododina ba:moi ba:bi tawakalubila, iyo, iba:te ibino kateneno ubi komamo ba papamila:hale, Godokono Gobogobote ibi ipuwalo kemedenaha:. 20Ba:bema: naeno hidohido mabuluba:la:, wadiyala la: la:eno hibima: midi komo talonanomoma: ga:late kodakodalo ba lawe ba:bo napepehonala:, ba:gala la: Godokono Gobogoboeno heloamo ebetamo na:toetoehonala:. 21Ba:bene la:le Godokono malemale emalagidolo ipuwalo demedehonama, ba:be komo miya:paheno Kodawa Ya:su Kelisokono pe komo na:latiminala:. Ba: hibila, ebete da:pemene la:le kebe kuba komokomo dododilinakuima, ebete ba:bi kuba hiliyonomo egebolelame tabo polamagiti wiboha: ka:ka: la:tamo ba:bo kopikalamema:na:ta. 22Ba:bema: hibima: midi ipuwalo puya:te kodakodalo la:mota:hanaheno ukui gagagagama: deda:hanaka, la: ibi malemalelo ba emalagidole ibi nowalubila:la:, 23iyo, ba:moe modobo tete ba itana, wadiyala la: ibi Saitanakono koe ipuwane tiyonomolo nuluhukulatela:la:, iba:te ibino ka:ka: mula: komo Ya:sugodone kolawema:. Ba:gala wadiyala la: komo kuba ododilipi atumu malemalelo ba emalagidole na:kowalubila:la:. Huiyatiya la: hidamo, ibi ba owalubili ibino kuba ododili komokomo kokoha:ma: a:kaga:lamata! Numa:la:, iba:te ibino kateneno kuba ubilo dododilinaka, ba:bi komo ba: ibino pupulino ilina huiyala, ba:bema: wadiyala la: ba:bi dalowa:go kaliko ubiha:ma: eda:halo la:eno kokotamo akologihola:la:, ibino kuba dalowa: komote la:tamo pekapoma:. 24O hibima: midipa:la:, aeno Hido Helodawate bemedena, ebe modobola la: ba a:ga:lulatele la:le a:kaguda:mata. Ba: hibila, ebete la: kubaha:pima: midiliti, ba:bene ko kalakalanomago ebete la: ebeno a:la:mina holoholo hapuamo komagahelema:na:ta. 25Ebe kapiya ba: Godotela, ebete aeno Kodawa Ya:su Kelisoko ipuwado aeno Ka:ka: Mula:lea:medawama: eda:na. Ba: hibila, ebeno awagaha komo ba:gala ebeno hido a:la:mina komo, ebeno konomo helo ba:gala ebeno ko gawadalagi komo, ba:moi komate dopamo tupuimi mabuni ebegodolo pola:nama:! Ba:bema: wadiyala ba:ma tetelo ba:gala emedena emedena tetelo ba:moi atu komate ebe kapiyagodolo na:kapola:namena:! Ba:moe ba: naeno tabo kuititila. Ba:ba:la.

will be added

X\