Yu Epo 3

1Ba:bema: naeno ekaka:la:, Godote la: pui ebeno talonapima: eda:hama: nago da:ka:lamiya:la, wadiyala la: Ya:sukunu komo hidamo nemalagidolala:. Ale kebe tabo komokomo Godokono hibi iya:tulame komoma: da:midilinama:, Ya:suti ba:bi tabo aeno tepo ipuwalo na:kodakoduilamena. Iyo, ebe ba: Godote a kowalubima: da:poemiya: ba:be dawala, mabu ebete ebeno hawi ikame komodo aeno kuba ododili komo egebolea:menako, dopamo Godotamo hawa:goeno ikamehopino Watodawate a Yunapi keba ka:na kowalubinakui ba:ba ka:na. 2Ba: hibila, pote ba:be hido oko kowatima: ebe da:lawiya:, Ya:suti ba:be Kodawoeno hiliyonomo ubi komamo a:papamiwatuya:, dopamo Mosesete Godokono tawakalubi hiliyonomo kowalubilinama: ebetamo hibi oko dowatinami ba:ba ka:na. 3Numa:la:, eta lumagiti hido genama detemene, tawakaluba:te umiti ba:be genama muluma: a:kaga:lamena:, huiyatiya iba:te genama etedawa kapiya muludawama: koka:mima:na:. Ba:bema: hibila, Ya:suti Godokono hidonomo genama etedawama: ba eda:na, wadiyala ale ebe hunamo kadipatiya:, huiyatiya ale Moseseko hunamo a:kadipata:ma: mabu ebete Godokono genama ketiya:ha:, ao, ba:be genamalo demedena ba:bi badininipala ipuwalo ebe etama: eda:na. 4Ba:gala ba:moe eta komo a iya:tawahala, kebe hiya:hiya: genamate da:pola:na, ibino hiya:hiya: etemotehopi atumu ba:kapola:na, iyo, eta kapiyate ha:kiya kuluhukuya:ha:. Ba: ba:ba ka:na ba:moe hopolo da:pola:na ba:bi ilina hiliyonomo atumu iba:te ha:kiya ibino ubilo kikulihuya:ha:, huiyatiya Godote ba:bi ilina ebeno ubilo ododiliya:. 5Ba: hibila, Godokono genamanapi ipuwalo Moseseko ba: hido okodawa etala, iyo, ebete Godokono hiliyonomo ubi komamo na:papamiwatanami. Ba:be mabuma: Godote galane tetelo hopo habanapa:tamo kebe hidohido tabo dolamagimini, Mosesete ebeno oko ipuwalo ba:bi komokomo dopamo a:hawakalilamenakui. 6Huiyatiya genama etedawa Ya:sukunu komo hiya:la. Ebe ba: genama Namutudawoeno Gudula, ba:bema: puya:te ebeno genamalo oko dowatina, ebete ba:bi okopi hiliyonomoeno Watodawama: eda:na, iyo, ebete ba:be komodo ebeno Nabiwino ubi komamo hibilo papamiwatanako. Ba:bema: ba:moe ko komo numa:la:, keba tetelo a hibima: midipa:te aeno hido huiya lawema: uliholo demedehonama: ba:gala ale komopino mauba komoma: toleheno kodakodalo da:la:mota:hanama:, ba:ba tetelo a ba: Godokono hido genamama: beda:hanama:. 7- 8Ba:be mabuma: Godokono Gobogobote ebeno Bukalo ba:ma ka:na goena, �La:eno iniwala:te dito hopolo na Godotamo papamila:ha ubiha:ma: eda:huya:, iyo, iba:te natamo wato kodakodahibima: ba eda:ha, nale ibino kateneno ubi komo iba:tamo ikalameheno iba:te ba:bo ga:luya: na hibi Godoha:. La: huiyatiya naeno tabo ka:lo hegelalo dulima, iba:te dopamo keba ka:na kewageliya:, la: ba:ba ka:na akewagela:la:. 9A:iye! Na Godote 40 gogolo ibi kebe komamo kowalubilinakuimo, iba:te ba:bi hido komokomo ulamenakuya:, huiyatiya keba tetelo nale ibino kuba ukui komamo papamiwataheno iba:te ba:bo ga:luya: na hibi Godoha:! 10Ba:ba tetelo nale ba:bi tawakaluba:tamo maubate na:goiya:mo, �Iba:te na hibilo kata:mahenenaha:, iyo, ibi ubihinola naeno Tutumu Tabamo kopapamila:halema:.� 11Ba:bema: naeno mauba ipuwalo hibi tabonomo ba:ma ka:na goiya:mo, �Nale iba:tamo kebe hopo ikalamema: dopamo demalagidoluya:mo, na ukui hiya:ma: miditi, ba:bene emedena emedena tetelo iba:te naeno Hido Hawela Ami Hopamo a:kana:pa:la:hamena:!� � 12Ba:bema: naeno hibima: midipi ekaki, la: hidamo! Modoboha: la: ipuwalo etate ebeno tepo ipuwalo kuba ukui emalagidolo ba tupuimi Hibi Ka:ka:dawa Godokono ubi komamo papamiwataha:ma: eda:te ebegodone dohobigamene. 13Wadiyala la: huiyatiya hiliyonomo hegelalo la:eno hibima: midi ipuwalo etapa:te etapi nowalubihuinakuya:la:, la: ipuwalo etate kuba ododi komoeno ha:da amiho komamo gate Godotamo wato kodakodama: eda:kapoma:. Ba: hibila, Godote ebeno Bukalo da:goena lumagiti ka:lo hegelalo ebeno tabo kulima:, ba:be taboeno ipuwa a hiliyonomo mabuma: itana. 14La: numa:la:, a kebe hibima: midi komo tupuimi mabuni da:lawiya:ma:, ale ba:be atu komo ipuwalo kodakodalo ba la:mota:hana kuititi hapuamo da:nikulima:, ba:be mabuma: Kelisote a hiliyonomo eba:go kapimilo oko owatipima: koka:mima:ne. 15Iyo, ba:moe mabuma: Godokono Buka tabote ba:ma ka:na goena, �La:eno iniwala:te Godotamo wato kodakodahibima: ba eda:ha, ebetamo papamila:ha ubiha:ma: eda:huya:. La: huiyatiya ebeno tabo ka:lo hegelalo dulima, iba:te dopamo keba ka:na kewageliya:, la: ba:ba ka:na akewagela:la:.� 16Ba:bema: Godokono tabo ulihote huiyatiya ebetamo kopapamila:hama: ubiha:ma: deda:huya:, ba:bi tawakalubi hiliyonomo puya:tela:ka:? Ibi ba: Mosesete Isipiti hopone Godokono heloamo duluhukulateliya: ba:bi tawakalubila. 17Ba:gala 40 gogolo Godote puya:tamo da:maubanami, ibi puya:tela:ka:? Ibi ba: puya:te dito hopolo ebetamo kuba komokomo dododilinakui ba:bi tawakalubila, iyo, ba:ba:te ba:bolo ba:bema: ha:lahuya:. 18Ba:gala Godote hido hopo ikalamema: puya:tamo hibi tabonomo da:goiya:, ibi puya:tela:ka:? Ba:gala ebete ukui hiya:ma: miditi ba:be Hawela Ami Hopo emedena tetelo ikalameha:ma: da:goiya:, ba:be tabo ebete puino komoma: ka:goiya:? Numa:la:, ibi ba: puya:te ebetamo papamila:ha ubiha:ma: deda:huya: ba:bi tawakalubila. 19Ba:bema: ale ba:moe ko komo hibilo umima:, ba:bi tawakalubino hibima: midiha: mabuma: iba:te Godokono hido hopamo kona:pa:la:hama: kamodobuya:ha:.

will be added

X\