Ali 8

1Ba:ba tetelo ba:be uli ape dubu Solote Stibinikono hoe komo umiti na:kalakaluya:. Ba:gala ba:be atu hegelalo sose tawakaluba:te Yelusalema ko habalo demedehonama:, Yu watowatopa:te iba:tamo koko temeteme ikalame ba:bo tupuimiya:. Ba:be mabuma: Ya:sukunu oelamepi dubate ha:kiya ko habalo na:pola:nuya:, huiyatiya komo Ya:suku hibima: midipi hiliyonomate alahutihuya:, ba:ma ka:na komo Yudiya hopamo ba:gala komo Samaliya hopamo hiya:hiya: tolameholiya:. 2Ba:bema: komo Yelusalemanapi Godokono malemala:go demedenama:, iba:te Stibinikono ape pelawete bobamo ba nihate ebe mabuma: konomamo nihimitiya:. 3Ba:ba tetelo Solote ba:moe eta kuba komo betupuimiya:, ebete sose tawakalubino hiya:hiya: genamamo nodolonakui dubu ba:gala kamenakamena da:nulamenakui, ebete ibi uwatete da:wadimuya:talenakui du genamamo dito niya:hekenakui. 4Ba:bema: hibima: midipa:te kebe hiya:hiya: hopamo kalahutihuya:, iba:te ba:bolo hiya:hiya: ba newapata:lame Ya:sukunu Hido Tabo tawakaluba:tamo ba:bo nolamagiminakuya:. 5Ibi ipuwalo Pilipiko ba: etala, ebete Samaliya ko habamo tote Ya:su Kelisokono komoma: tabo da:nolamagitiya:, 6tawakalubi hiliyonomate ebeno tabo hidonomamo ulihutiya:, ba:gala ebete Godokono heloamo kebe hanohano komokomo kododilitiya: iba:te atumu nulamitiya:. 7Ba:ba tetelo Pilipiti tawakaluba:godone kuba gobogobo doelamiya: iba:te ga:ga:go ba:bo ikuliya:, ba:gala ebete ape kodakoda temetema:gopi ba:gala nato a:ta:buta:midalelamepi akahiduilamiya:, 8ba:bema: ba:be Samaliya haba konomolo ko kalakalanomote itanuya:. 9Ba: hibila, Pilipiti Samaliya ko habamo dopamo peheno, eta dubuti ba:bolo nemedenami ebeno mahilo Saimonotela, ebete ebeno giwali ododili komamo tawakalubi behanohanuilamenami. Ba:gala ebe ha:kiya ebe koma: ba midina, 10Samaliya hopoeno dito tawakalubi ba:gala koko mahilago tawakalubi ibi hiliyonomate ebeno iya:tulame komo hidonomamo ulihonakuya:. Ba:bene iba:te na:ga:lanakuya:, �Ebeno helo Hunu Habane pena, ba:bema: ale ebetamo Helonomodawa mahilo kikamiya:!� 11Iyo, Saimonote tete ga:ga:lo ebeno giwali iya:tawa komamo ba:bi tawakalubi da:hanohanuilamenami, ba:bema: iba:te ebeno ododili komodo ebe beta:matanama:. 12Huiyatiya Pilipiti da:piya: ebete Hido Tabo ba polamagi, Godote Ko Gawadalagima: deda:na ebete ba:be komo ba:gala Ya:su Kelisokono helo komo ba:bo pehawakalilamiya:. Ba:ba tetelo Samaliyanapa:te hibima: miditi, ba:bene Pilipiti kamenakamena ba:gala dubu hiliyonomo beyamo ba:bo wadulateliya:. 13Ba:gala Saimonote atumu hibima: miditi Pilipiti ebe beyamo ba:bo kadutiya:, ba:bene Pilipiti Godokono heloamo kebe koko hanohano komo dododilinakui, Saimonote ebe tamenomolo ba luta ba:bi komokomo dulamenakui koamo hanohanonakui. 14Ba:be atu tetelo Yelusalema ko habalo oelamepi dubate Samaliya hoponapino komo ba:ma ka:na uliya:, iba:te Godokono tabo a:lawiya:, ba:bema: iba:te Pitako ba:gala Yoneko ba:be komo umima: ibi ba: dito noelamiya:. 15Ba:bene ibi netewapa:te ba:bamo nuluhukuti uliuli hibima: midipi Godotamo ba:bo newadiya:paa:lateliya: iba:te ebeno Gobogobo kolawema:, 16mabu dopamo Pilipiti ba:bi hibima: midipi beyamo da:wadulateliya: Kodawa Ya:sukunu mahilo kapiyamo ododiya:, huiyatiya ba:ba tetelo Godokono Gobogobote ibi hunamo kapemediya:ha:. 17Ba:bema: Pitako Yoneko iba:te ba:be komo iya:tawahate ibino kokoto Samaliya hibima: midipa:tamo demowatilameholiya:, iba:te Godokono Gobogobo ba:bo lawiya:. 18Ba:ba tetelo Godote oelamepi dubagodone ebeno Hido-talona Gobogobo tawakaluba:tamo keba ka:na kikalamiya:, giwali ododilidawa Saimonote ba:be komo dumiya:, ebete mani iba:tamo ba ikalame na:goiya:, 19�La:godolo ditana ba:be helo nale la:godone mana:mo kolawa:mo, ba:bene nale puino watamo naeno kokoto demowatilamenakomo, iba:te atumu Godokono Gobogobo nagodone ba:lawenakomena:.� 20Ba:bene Pitate ebeno tabo ba huiya na:goiya:, �Amia:no ape ba:gala amia:no mani Saitanakono Koe Habamo kapimilo kotoma:na:, mabu amia:no ukui ba:ma ka:na itana, lumagiti Godokono Gobogoboeno helo mana:mo kolawema:ne! Ao, eba ka:naha:! 21Amia:no kuba ukui komoma: ama: Godokono oko owati ipuwalo ago a:kakapiyamena:ta, mabu Godokono umi ipuwalo amia:no tepo ipuwoeno ukui katuputupuha:. 22Ba:bema: wadiyala ama: ukui hiya:ma: miditi ama:le demalagidoluta ba:be kuba ododi komone nohobiguya:, ba:gala ama: Godoko na:toemehuya: ebete amia:no kuba ukui egebolemete kadodomema:. 23Ba: hibila, na iya:tawala amia:no tepo ipuwoeno mauba komote da:tabui, ba:be mabuma: ama: Saitanakono du genamalo bemedenata!� 24Ba:bene Saimonote tabo ba huiya na:goiya:, �La: nonolata, wadiyala:ka: la: na Kodawa Godotamo nadipanateniya:la:, mabu la:le kebe komoma: ka:ga:loma ba:be kuba huiyate natamo hibilo duluhukumini nale a:kamodobamo.� 25Ba:bema: ba:moe komo da:wibuya:, ba:ba tetelo Pitako Yoneko iba:te Samaliya ko habalo Kodawa Ya:sukunu tabo komokomoma: hawakala ga:late Yelusalemamo gala ba:bo kawiluya:, ba:bene iba:te ba to gabo tetelo Samaliya hopoeno hegehege habahabado Hido Tabo olamagima:go ba:bo tuya:. 26Ba:ba tetelo Kodawa Godokono nopodawate Pilipitamo na:goiya:, �Ama: mahigate siyale hapuamo na:toa, Yelusalemane Gasa habamo dito hopodo da:tolamenaka ba:be gabamo.� 27Ba:bene ebete mahigate ba:bamo na:tuya:. Ba:be atu tetelo eta ko dubu, ebete Itiyopiya hopoeno Ko Gawadalagi Kamena Ka:ndesikono okodawama: eda:nami, ebete ebeno koko ilina ba:gala mani bulamelemenami, ba:be dubuti ba:moe atu gabodo pitiya:. Ebete Yelusalema ko habamo Godoko adikumima: ya:lo tote 28gala ba kapita, ebeno sa:liyote-boge hunulu emedete Godokono ukui hawakalimidawa Aisayakono Buka ka:lamihola:go ba pita, Pilipiti ebe ba:bo numiya:. 29Ba:ba tetelo Godokono Gobogobote Pilipiko na:goemiya:, �Ama: sa:liyote-boge tama:mo nuluhukuti eba:go kapimilo na:tonatuya:.� 30Ba:bema: Pilipiti sa:liyote-boga:go ba puliganato, ko dubuti Aisayakono Buka tabo da:ka:lamiholitiya: ebeno tabo nuliti ebetamo na:goiya:, �Ama:le da:ka:lamiholita ba:be taboeno ipuwa na:kemalagidoluta?� 31Ebete tabo ba huiya na:goiya:, �Ao, na keba ka:na na:kiya:tawamo? Na iya:tunamedawa puliyala.� Ba:ba tetelo ebete Pilipiko na:kiyamiya: ebete sa:liyote-boga:mo ololote ebe tama:mo kopemedema:. 32Ba:bene ko dubuti Aisayakono Bukalo Godokono tabo ba:ma ka:na ka:lamiholitiya:, �Iba:te ba:be dubu lawete a:magatuya: sipi-goemo konanakapumima:. ba:bene lumagiti sipi-goe deha:potoeno ipo diya:hilimita, ba:be sipiti gelebadilo ba luta tabo goeha:ma: keba ka:na keda:nako, ebete ba: ba:ba ka:na tabo akote eta tabo kagoiya:ha:. 33Ba:ba tetelo iba:te ebe ba iduduputimi ebeno komo hidamo anagiya:midameheno hoea:mo dito noemiya:. Numa:la:, iba:te ebeno ka:ka: hopo habalo itamidamiya:, ba:bema: ebeno galanepino komoma: pote na:kolamagimini?� 34Godokono Buka ka:lamihole komo da:wibuya: ko dubuti huiyatiya Pilipitamo na:goiya:, �Ama: na na:kiyanama:, Aisayate pokono komoma: kolamagitiya:, ebe ha:kiya ebeno komoma:la:ka: o eta lumagino komoma: kolamagitiya:?� 35Ba:bema: iba:te badi ba tuta ko dubuti da:ka:lamiholiya:, Pilipiti ba:be taboeno ipuwa dopamo hawakalimiti, ba:bene Godokono Bukoeno komo tabo komokomoeno ipuwa atumu kahawakalilamete Ya:sukunu Hido Tabo ebetamo ba:bo olamaginatuya:. 36Ba:bene ibi netewapa:te ba:be gabodo ba tonato beya bobo deha:potoamo da:nuluhukuya:, ko dubuti na:goiya:, �Ama: ba:moe beya numa:. Ama: modobola:ka: na beyamo adunatene? Eta kodakoda ba:kitana?� 37Ba:bene Pilipiti ebetamo na:goiya:, �Ama: amia:no tepo ipuwalo Godokono tabo hibima: da:mida:, nale ama: beyamo kadutima:nemata.� Ebete tabo ba huiya na:goiya:, �Na ka:lo Ya:suku hibima: a:midimo, ebe ba: Kelisote, Godokono Gudula.� 38Ba:ba tetelo ko dubuti sa:liyote-boge atadawa bikiyamiya: ebete boge ba:bamo koduhimima:, ba:bene ebete Pilipikoba: hititi Pilipiti ebe beyamo ba:bo adutiya:. 39Ba:bene ibi netewapa:te beya ipuwane ba podoluta Kodawa Godokono Gobogobote Pilipiko eta hopamo da:magatuya:, ko dubuti ebe gala kumiya:ha:, ebete huiyatiya ko kalakalago ba:be gabodo gala dito katuya:. 40Ba:ba tetelo Pilipiti Godokono heloamo Asotase habamo nuluhukuti, ebete ba:be habane tote ba:be hopoeno hiliyonomo habahabado Godokono Hido Tabo olamaga:go Sisaliya ko habamo ba:bo nuluhukuya:.

will be added

X\