Ali 3

1Eta hegelalo hegelate nanekela:mo da:nihitigatepaniya:, ba:be tete ba: 3 koloko tetela, Pitako ba:gala Yoneko iba:te Godoko Adikumino Hiya: Genamamo Godotamo toetoe tabo ga:lanama: toniya:. 2Ba:ba tetelo eta dubuti ba:bo na:lutiya:, ebete menokoeno tepo ipuwane nato a:ta:buta:midaleme ba:ba ka:na pehawakaluya:. Ba:be mabuma: ebeno mabuluba:te komo hiliyonomo tetelo ebe Godokono Genamamo agahenakuya:, ebete kala imi tetelo ditana ba:be Hido Holoholo mahilagoeno gigiholo pemedete tawakalubi manima: ba:bo kopetoelameholenakoma:. 3Ba:bene Pitako Yoneko iba:te Godoko Adikumino Hiya: Genama guamo kona:pa:la:nama: ba tona ba:moe dubuti ibi manima: ba:bo toelameholeniya:. 4Huiyatiya ibi netewapa:te ebe baidi kodakodalo ba umihona, Pitate ebe na:goemeniya:, �Ama: a nua:ma:.� 5Ba:bene ba:be dubuti ibi netewapi ba ulamena nemalagidoloniya:, �Iba:te natamo mani kikanamema:na:.� 6Ba:ba tetelo Pitate ebetamo na:goeniya:, �Nagodolo eta mani kitanaha:, huiyatiya nagodolo eta komo bitana ama:tamo ikamema:. Nale ama: Ya:su Kelisoko Nasaletanapino mahilamo goememata, wadiyala ama: mahigate na:pata:!� 7Ba:bene Pitate ba:be dubu tu hapu kokotone lawenate dadipateniya:, ebeno natote ba:ba tetenomolo hidohidohomeniya:. 8Ba:bema: ebete hunamo epateganate pata: ba:bo tupuiminiya:, ba:bene ebete epategahago ba:gala Godoko milimihago ebe Adikumino Hiya: Genamoeno kala ipuwamo Pitako Yoneko iba:go ba: dito na:pa:la:haniya:. 9- 10Ba:bene ebete ba:bamo da:na:pa:ganiya:, hiliyonomo tawakaluba:te ebe uminate na:ga:laniya:, �A:iye! Ba:moe ba: nato a:ta:buta:midaleme dubula, ebete hiliyonomo tetelo Hido Holoholo mahilagoeno gigiholo emedete manima: toetoitanakui!� Ba: hibila, iba:te ba:be atu dubu buminiya:, ebete nato hidamo a:putihonalo ba:gala ebete Godoko milimihago da:pata:niya:, ba:bema: iba:te koamo ba hanohanohona nipo emalagidoloniya: ba:moe komote ebetamo keba ka:na kuluhuku. 11Godoko Adikumino Genamalo eta pana nitanami, tawakaluba:te ba:be pana Solomonokono mahilamo ka:minakuya:, ba:bene Pitako Yoneko iba:te ba:bamo nutihonate, ba:be dubuti ibino kokoto ba uwatelelamena hiliyonomo tawakaluba:te ko hanohano komago pipulila:haniya:. 12Ba:bene Pitate tawakalubino komo uminate iba:tamo tabo nolamaginiya:, �La: Isalaelanapi tawakaluba:la:, la: bada mabuma: a ua:melo konomamo da:hanohanohonama? La: bada komo kemalagidolonama? Ale ha:kiya aeno heloamo ba:gala aeno tuputupu emede komamo ba:moe dubu na:hiduimimo ka:ga:lonama? 13Ao, ale kododiha:! Huiyatiya A:ibalahamako, Aisa:keko, Ya:ikoboko, ba:gala aeno komo iniwala:te dadikuminakui, ba:be Godote ba:moe komo ha:kiya ododi ebeno Okodawa Ya:suku kawagaminanama:. Numa:la:, la:le ebe anakapumima: Paeletetamo da:magatuima, ba:ba tetelo Paeletete la:eno kokoto ipuwane ebe dito koemema: ubi dihati, huiyatiya la: ebeno holoholo hapulu Ya:suku gunima:mo ba ihiti ubiha:ma: ga:luimata. 14Iyo, ba:moe gabodo la:le hido tuputupu lumagitamo ubiha: komo ba hawakalimi, huiyatiya Paeleteko na:ga:lamimata ebete tawakalubi anakapulamedawa dubu Balabasiko ebeno kuba huiyane dito koemema:. 15Ba:bema: tawakaluba:tamo ka:ka: dikalamena la:le ba:be Kodawa anakapumimata, huiyatiya Godote ebe hoe ipuwane ka:ka:mo gala a:kadipati, iyo, ba:moe komo ale aeno baida:mo dumima: a ba:bema: ga:lanama:. 16Ba:bema: hibila, ba:moe dubu la:le duminama ebeno nato Ya:sukunu helo mahilote a:hiduilameleme. La: iya:tawahanomola ebete dopamo kebe temeteme ipuwalo kemedenami, huiyatiya Ya:sugodone da:pena ba:be hibima: midi komodo ebete la: hiliyonomoeno holoholo hapulu a:hido. 17�Ba:bema: naeno ekaka:la:, na iya:tawala la: ba:gala la:eno watowatopa:te Ya:sukunu hibi komo iya:tawahaheno ebetamo hiya:hiya: kuba komo ba:bo ododilimata. 18Huiyatiya ba:be komoma: ukui bilibilima: akeda:hala:, mabu ya:lo tetelo Godote ebeno ukui hawakalimipi hiliyonomagodone da:hawakalimiya:, ba:be taboeno hibi komote la:eno ododili komodo puluhukui, iyo, ba:ma ka:na ebeno Oemedawa Kelisote la: tawakalubino kokotone koko temeteme uwati. 19Ba:bema: wadiyala la: la:eno tepo ipuwoeno ukui hiya:ma: midiliti Godotamo nohobila:la:, ba:bene ebete la:eno kuba egebolelamete kadodoholelamema:na:ta. 20Ba:moe gabodo komo hiliyonomo tetelo la:eno tepo ipuwa heluimi komote Kodawa Godokono holoholo hapuni ba:penakomene, ba:gala Godote la: mabuma: Ya:suku gala kakapoemema:ne, iyo, Godote ya:lo tetenomolo ebe ebeno Oemedawa Kelisoma: ka:miya:. 21Ba: hibila, ebete Godokono Hunu Habalo nemedenamene ebeno pe kuitita:mo, huiyatiya ebete da:pemene ba:ba tetelo ebete hiliyonomo pakalapakala komo ba pehawaminale uliuli komo kopemiya:tema:ne, Godote ebeno talona ukui hawakalimipi ipuwado dopamo keba ka:na ka:hawakalimiya: ba:ba ka:na. 22�Numa:la:, Mosesete Kelisokono komoma: dopamo ba:ma ka:na goiya:, �La:eno Kodawa Godote la: kopowalubilima: na keba ka:na ka:poenamiya:, ebete ba:ba ka:na ebeno eta Hiya:nomo Ukui Hawakalimidawa la: ipuwane kadipatema:ne. Ba:bema: ebete kebe komokomo la: diya:tulamemena:, wadiyala la: ba:bi hiliyonomo tabamo na:papamila:haliya:la:, 23mabu la: ipuwalo kebe lumagiti ebeno tabo ulihino, Godote ebe hibima: midipi tawakaluba:godone ebe tama:mo ba a:mida ba:bo kokubahimima:ne.� � 24Ba:bene Pitate gala na:kagoeniya:, �Mosesekono gala hapuni komo Godokono ukui hawakalimipi hiliyonomate ibino tabo olamagimi ipuwalo ba:ma teteno komokomo behawakalilamenakuya:, Sa:miyolokono tetene tupuimiti ba:ma teta:mo puluhuku. 25Ba:bema: numa:la:, Godote la:eno iniwala:tamo kebe nopo hibilo da:tamotiya:, ba:gala ebete ebeno ukui hawakalimipi ipuwado kebe hidohido komo la: galanapi mabuma: kododilima: dolamaginakui, la: ba:ma tetelo ba:bi komo hiliyonomo kuwatema:nemata. Iyo, Godote la:eno eta iniwa A:ibalahamatamo ba:ma ka:na olamagiya:, �Nale amia:no galanedawagodolo ba:moe hopo konomolo demedehona ba:bi tawakalubi kapiyuimi hiliyonomo hidonomamo bowalubilinakomo.� 26Ba:moe ba:be mabuma: Godote ebeno Okodawa Ya:suku adipatete la: Yu tawakaluba:tamo dopamo poemiya:, iyo, ebe ubila Ya:suti la:eno koko kuba ododili ipuwane la: ba ohoba:midale hidonomamo kowalubilinama:.�

will be added

X\