Ali 27

1Ba:bene Loma gabomana:te a ibino Itali hopamo palai boga:go komagatoema: tabo dihatiya:, ba:ba tetelo alaholohopa:te Poloko ba:gala komo du genamalo demedehonama:, ibi hiliyonomo eta alaholohopino watodawoeno kokotamo ba: dito nimiya:tiya:. Ba:be alaholohopino watodawoeno mahilo Yuliyasitila, ba:gala ebeno alaholohopino kapiyuimino mahilo ba: Konomo Gawadalagi Sisakono Kapiyuimipila. 2Ba:bene eta ko palai bogete A:damitiyama habane uluhukuti A:isiya hopoeno komo kehaha: kolomoeno habahabamo gala kakatoma: dewagelitiya:, ale ba:be boga:mo nololote ba:bo tolamiya:ma:. Ba:ba tetelo eta Ma:sadoniya hoponapi A:listakasiko, ebe Tesalonaika habalo hawakaluya:, ago ba:moe dubuti tuya:. 3Ba:bene eta hegelalo ale Saidono ko habamo da:nikuliya:ma:, ba:ba tetelo alaholohopino watodawa Yuliyasiti Poloko malemaletelo ebetamo tete bikamiya:, ebete ba:be habalo ebeno komo mabulubi nulamete iba:te ebeno modoboha: komokomo ipuwalo ebe hidamo kowalubima:. 4Ba:bene a Saidono habane gala da:katolamiya:ma:, kehaha: kolomo ba na:hiwale ko huhuti a da:duhia:miya:, ba:bema: Saipalase hopamo nikuliti ba:be hopoeno kehaha: kolomoeno dododo ba:bo tolamiya:ma: mabu ba:be gabote atamo tatabadopoma: ediya:. 5Ba:bene ale kehaha: kolomo gala kana:hiwalete Silisiya ba:gala Pa:mapiliya hopo tamedo petolamete Lisiya hopoeno Maila habamo ba:bo nikuliya:ma:. 6Ba:bolo eta ko palai bogete A:lesandiya habane Itali hopamo toma: dewagelitiya:, alaholohopino watodawa Yuliyasiti ba:be komo iya:tawate a ba:be boga:mo ololoma: dito noea:miya:. 7Ba:bene ale ba:be boga:go da:katolamiya:ma: ba:ba tetelo huhuino komo umilo a ukuiya ba tolame ko temeteme beniya:tawahuya:ma:. Ba:bene komo hegela da:petohuya: a Sanaidase haba teta:mo nikuliti huhuti a ba:bolo hibilo da:duhia:miya:, a huiyatiya ukui hiya:ma: miditi tataba gabo ohowada:go tolamete kehaha: kolomo ba:bo na:hiwaliya:ma: Kuliti hopoeno Salamone haka kiyamo. 8Ba:bene a Kuliti hopoeno kehaha: kolomo dododo ko temetema:go petolamete eta boge utihole bahi ba:bo numiya:ma:, ba:be boge utihole bahino mahilo nitana �Boge Utiholeno Tataba Bahila,� Laseya haba tamelo itana. 9A ba:be Kuliti hopamo pelamema: tete ga:ga:nomoma: dediya:, ba:bema: Septemba manomeno Ko Hegelate ba peniwibo ba:be hopo konomolo ko huhuti a:mo ya:lo a:tupuimiya:. Mabu ale kehaha: kolomodo kotolamema: hido tete dotuya:ma:, ba:bema: Polote boge okopi ba kiyalame na:goiya:, 10�Dubala:, na numitamo a ba:ma tetelo tolamema: dewagelema: ale konolalatiholema:nema:, iyo, bogeno ka:ka: ba:gala ilina ba:gala a tawakalubino ka:ka:te kalatidiholema:na:.� 11Ba:ba tetelo alaholohopino watodawate Polote da:goiya: ba:be tabo kuliya:ha:, huiyatiya ebete boge atadawa ba:gala boge namutudawa ibino ubi komamo dito papamiwatuya:. 12Iyo, ibino tabo ga:la ipuwalo ibi hiliyonomate ubi nihatiya: ba:be haba miya:pate Kuliti hopoeno eta tatali haba Pinikisa:mo konikulima:, mabu iba:te boge da:putiya: ba:be boge utihole bahi modoboha: ko palai bogete huhu tetelo tete ga:ga:nomolo ba:bolo itana. Ba:ba tetelo iba:te nemalagidoluya: Pinikisi haboeno boge utihole bahino magata kodopola, hegelate da:nihitiganako ba:ba hapulu ba itana ba:bema: huhuti ba:be boge utihole bahi koamo a:kalawa:le. 13Ba:ba tetelo ko huhuti da:wibuya: huiyatiya siyale hapuni nanekela:mo da:pa:mutiya:, ba:bema: boge okopa:te kalakala lawete a ba:be habane ikuli hidoma: ga:lalo iba:te bogeno aga mabu magubutiti Kuliti hopoeno kehaha: kolomo dododo tolame gala ba:bo katupuimiya:. 14Huiyatiya iba:te nanekela:mo ba tolamita, konomo huhuti Kuliti hopo hapuni gala kanemahigate ba:bo piya:, boge okopa:te ba:be huhuino mahilo Dibilidubu Hapuino Huhuma: ka:miya:. 15Ba:ba tetelo huhuti boge da:panagalimiya: okopa:te boge haka hapuamo ohoba:midama: dewageliya: kamodobuya:ha:, ba:bema: iba:te bogeno kiya:li mabu miya:pate huhuti a hakane ko kolomamo ba: dito puluhukua:tiya:. 16Ba:bene ale kehaha: kolomoeno eta deha:poto haka, ebeno mahilo Kolodala, ba:be haka siyale hapudu ba negogoluta tete nanekelelo gawiyate tatabadopoma: ba:bo ediya:. Ba:ba tetelo ale ko palai bogeno ka:ka: mula:meno boge deha:poto ba:bo nihiduimiya:ma: ba:be bogete ko kolomolo ululukapoma:. Iyo, ale ba:be komo ko temetema:go ba:ma ka:na ododiya:ma:, 17okopa:te ba:be deha:poto boge ko kolomoeno beyane adipatete ko palai bogeno guamo ihatete hala:mo matumihote ba:bo kodakoduimiya:. Ba:be atu tetelo iba:te komo koko hala:mo ko boge a:wa:digahalo atumu a:kama:homehuya:, mabu iba:te na:toletolehutiya: Libiya hopoeno kehaha: kolomoeno beya tetelo ditana, ba:be kulili hakamo huhuti aeno boge datamene. Diyala, bogete ba:be kulili hakamo da:nemuigamene, gawiyate boge ba:bolo kubanomamo anagalimihote bogete dito da: nepapohola:hamene. Ba:be mabuma: okopa:te ukui bilibilima: ba eda:ha iba:te eta komo ba:ma ka:na kaododiya:, iba:te ko bogeno palai pahamihote boge guamo dito ihatiya:, ba:bene kehaha: kolomoeno gawiyate ha:kiya a ba:bo atoiya:. 18Huiyatiya huhu ba:gala gawiya ibino helote kekelalamitiya:ha:, ba:bema: eta hegelalo okopa:te bogeno kolowami ilina hiliyonomo beyamo dito iya:hekiya:, 19ba:gala eta hegelalo iba:te atumu kaewageliya:, palai bogeno komo hiya:hiya: oko ilina ibino kokotonomamo uwatete beyamo ba: dito kiya:hekiya:. 20Ba:ba tetelo bogete konomo hawai bubu ipuwado tonami, ba:be mabuma: ale komo hegela ba:gala du hiliyonomolo hegela ba:gala oloki ulameheno konomo huhuti a kubanomamo dalukuinami aeno ka:ka: mula: komoeno ukuiti a:nalatidihoa:miya:. 21Ba:bema: boge okopa:te komo hegela hiliyonomolo tole komago ba emedena baa: kanahanakuiha:, ba:bene eta hegelalo Polote ibino holoholo hapulu mahigate na:goiya:, �Dubala:, la: naeno tabo nulihotale ale Kuliti hopoeno haka ba:ka:miya:pana:, iyo, ba:moe bogete ba:ka:kubana: ba:gala ilina hiliyonomate ba:kalatidiholena:. 22Huiyatiya ka:lo nale la: toelameholelo na:goemo, la: helo gala na:kalawa:la:, mabu bogete kokubama:ne huiyatiya la: ipuwalo eta lumagino ka:ka:te a:kalatida:mene! 23Na Godokono lumagi etala, iyo, ebete na ya:lo a:laweniya: nale ebeno okodawama: keda:nama:. Ba:bema: ka:lo dulu ebeno nopodawate natamo puluhukuti 24na:pegoe, �Polo, ama: akatoletola:la:, ama: Sisakono holoholo hapuamo hibilo konuluhukuma:na:ta. Ba:gala Godote ebeno malemalelo eta tabo ba:ma ka:na kagoe, ba:moe bogelo ama:go demedena ebete ama: mabuma: ba:bi dubu hiliyonomoeno ka:ka: komula:lelamema:ne.� 25Ba:bema: naeno dubala:, la: helo gala na:kalawa:la: mabu na Godoko hibima: na:miditamo, ebete na da:kiyaname ba:be komote hibinomolo ba:ba ka:na kuluhukuma:ne. 26Ba:moe komo ba: hibila, gawiyate a atoete kehaha: kolomoeno eta hopamo konemiya:poema:ne, ale aeno ka:ka: mula: komo ba:bo konuwatema:.� 27A Kuliti hopo da:miya:puya:ma:, ba:ba tetene tupuimiti 14 hegela ba petoho koko gawiyate a Meditala:iniya kehaha: kolomo tetenomodo ba atoe, ba:bene eta dulu iwa tetenomolo boge okopa:te ibino ukuilo haka na:tataliminamo ga:laniya:. 28Ba:bema: iba:te auli ilina deha:poto hala:mo ma:homenate ko kolomoeno kulukulu da:modoboteniya: 40 mita buminiya:, ba:bene tete nanekele toatepanate gala da:kanemodoboteniya: 30 mitama: eda:niya:. 29Ba:bene gawiyate a nakolamo na:nitakua:midoenamo ba ga:lana okopa:te konomamo toletolehonate, iba:te boge gala hapuamo netewa-netewa menemene aga iya:hekemenate hegelate tiyo kowalohoma: Godotamo ba:bo toetoehoniya:. 30Ba:ba tetelo bogeno olalati komo uminate, okopa:te ha:da amiho gabodo a komiya:poenama: iba:te ka:ka: muleno boge deha:poto beyamo ba adipotena a komopi ba:bo kiyaa:meniya:, �Ale boge dopo hapuino aga iya:hekema: kotolamenama:.� 31Polote huiyatiya ibino ha:da komo uminate alaholohopino watodawa na:kiyameniya:, �Na niya:tawanamo, ba:moi okopa:te bogelo ago pola:naheno la:eno ka:ka:te kalatidiholema:na:,� 32ba:bema: komo alaholohopa:te boge deha:potoeno hale da:niya:hiliminiya: ba:be bogete tawakalubihino ba: dito okoa:taniya:. 33Ba:bene owaloho tete da:tataliniya: Polote dubu hiliyonomoeno baa: nahaha: mabuma: tabo helodopamo ba kiyahalamena, ebete ba:ma ka:na goeniya:, �Ba:moi 14 hegelalo la:le la:eno ka:ka: komoma: ukui da:bilibilihonatima, la:le tete ga:ga:nomolo baa: kanahanakuiha:. 34Nale la: ba:bema: kiyahalamenamata, la:le baa: konahama:. Baa: naha ipuwalo la:le helo kolawema:nemata, ba:bene olalatiti la:tamo da:puluhukumini la:eno ka:ka:te a:kalatidihamena:, iyo, ba: hibila, la: hiliyonomo ipuwalo eta lumagino watoeno hinibo eta kapiyate a:kalatida:mene.� 35Polokono tabo olamagi da:wiboniya:, ba:ba tetelo ebete ibino holoholo hapulu baa: lawenate Godotamo kalakala tabo goe da:wiboniya: baa: adikamidalenate na ba:bo tupuiminiya:, 36ba:bema: ibi hiliyonomate ibino tole komo gobogobamo miya:tenate Polokoba: baa: ba:bo nahaniya:. 37Ba:be dulu a puya:te ba:be ko bogelo da:pola:nuya:ma:, aeno tawakalubino kuititi ba: 276 tawakalubila, 38ba:bene baa:te a hiliyonomo da:wigua:meniya:, komo okopa:te bogeno komo kolowami ilina ba:be witi-laisa kodopo kolomamo dito iya:hekeniya:, mabu ibi ubila bogete tutuma: ba eda:na hido haka teta:mo konutinama:. 39Ba:bene hegelate dowalohuya: boge okopa:te kehaha: kolomoeno eta hopo ba:bo umiya:, huiyatiya ibi hiliyonomate ba:be hopo dopamo kuminakuiha:. Ba:ba tetelo iba:te ba:be hopoeno kolomo dodo ba umihuta hido tete ba:bo umiya:, nakola puliyala, kulili haka kapiyate itanuya:, ba:bema: ibino bogete ba:be kulili haka teta:mo konutima: ubi ba ihate iba:te gabo ba:bo ohowadiya:. 40Ba:be mabuma: iba:te bogeno hiya:hiya: agoeno hale iya:hilimiti kolomolo dito miya:paliya:, ba:gala ba:be atu tetelo iba:te dopamo da:matuhulamiya: ba:bi kiya:lino hale pahalamiti, ba:bene eta deha:poto palai ibino boge dopo hapulu ba:bo adipatiya:, huhuti ibi ba owalubilinato bogete hido kulili hakamo konutima:. 41Huiyatiya iba:te ba:ba ka:na ba newagelita, bogete hido haka teta:mo nidihino dopamo beyalo ditanuya: ba:be eta kulili haka teta:mo nutiti bogeno dopo haputi ba:bo nekodakoduya:, ba:bema: ba:ba tetelo koko gawiyate bogeno gala hapu kubanomamo ba anagalimihuta bogete papohola:ha ba:bo tupuimiya:. 42Alaholohopa:te bogeno olalati dumiya: nopo ba:bo tamotiya:, iba:te du genamane boga:go da:magaheliya: ba:bi dubu hiliyonomo kanakapulamema:, komo iba:te hakamo niholoholete dito nalahutihokapoma:. 43Ba:ba tetelo huiyatiya alaholohopino watodawate ubila Polokono ka:ka: komula:mema:, ba:bema: ebete ebeno hopopi na:duhilamiya: iba:te ba:bi dubu anakapulamema:. Ba:be atu tetelo ebete ibi hiliyonomo na:kiyalamiya:, ibi ipuwalo puya:te iholohoma: dewagelitiya: iba:te bogene iya:patila:halete hakamo dopamo koniholohoma: 44ba:gala iholoho iya:tawaha:pa:te boge papohola:hale hapuhapamo alukuila:halete ba:bo kona:hiwalema:. Ba: hibila, a hiliyonomate ba:ma ka:na aeno ka:ka:go hakamo modobolo nidimutiya:ma:.

will be added

X\