Ali 22

1�Naeno ekaki, nabi, naeno kuba ododiha: komo la:tamo dolamagimo, la: nulia:la:.� 2Ebete iba:tamo Yu tabamo dolamagitiya:, iba:te uliti tabo ga:lahaheno tatabanomolo pola:nuya:. Ba:bene Polote gala na:kagoiya:, 3�Na Yu lumagila, Silisiya hopoeno Tasase ko habalo hawakaluya:mo, huiyatiya na ba:moe Yelusalema habalo apete, ba:bene komo hiliyonomo gogolo Gameliyelate na iya:tunamenakui. Ba:bene ebeno iya:tumi ipuwane Godote aeno iniwala:tamo kebe Tutumu Tabo dikalamiya:, nale ba:bi komokomo kodakodalo ba uwate naeno ape konomo Godokono okamo ba:bo ihatiya:mo, ka:lo la: hiliyonomate keba ka:na kemedeonama ba:ba ka:na. 4Ba:bema: komo gogolo nale ba:moe ukuido puya:te Ya:suku Hibima: Midi Gabodo da:wapata:lamenama: iba:tamo koko temeteme ikalamenakuimo. Iyo, nale ibi ipuwalo dubu ba:gala kamenakamena heloamo uwatenakuimo du genamamo dito niya:hekenakuimo, ba:bene komopa:te ibi danakapulamenakui na ba:be komoma: ba:bo kalakalanakuimo. 5Ka:lo nale kebe tabo dolamagitamo ba:be taboeno hibi komo Godotamo hawa:goeno ikamehopino Hununomo Watodawa ba:gala komo Ka:nisolo dubu, ibi hiliyonomate iya:tawahala. Iba:te natamo komo leta ikanamehonete Dama:sakase habamo na dito oenamiya: nale aeno Yunapi ekaka:tamo ba:bi leta konikalameholema:. Ba:ba tetelo na ubi bihatiya:mo, nale ba:be habamo ba nuluhuku Ya:suku ta:matapi ba:bolo nuwatete hala:mo matuhulameholete Yelusalemamo magahelete iba:tamo kuba huiya kopikalamema:.� 6Ba:bene Polote ebeno tabo moga:melo gala na:kagoiya:, �Huiyatiya na hegela tulilo Dama:sakase haba tama:mo duluhukunatuya:mo, ba:ba tetenomolo Godokono Hunu Habane alo konomote ba pihitiga hegelate da:la:wa:hiya keba ka:nala:ka:, na ba:be alote ba:ba ka:na panagogobeya:midadiganiya:. 7Nale hakamo gate tabo ba:ma ka:na uliya:mo, �Solo, Solo! Keka: mabu ama:le natamo koko temeteme dikanamena?� 8�Nale na:huiyuya:mo, �Kodawa, ama: potela:ka:?� �Ba:bene ebeno huiya tabote ba:ma ka:na piya:, �Na ba: Ya:suti Nasaletenapila, ama:le natamo temeteme dikanamena na ba:be lumagila.� 9Ba:ba tetelo kebe dubate nago da:tolamiya:, iba:te natamo dolamagitiya: ba:be lumagino tabo madodo hidamo kuliya:ha:, huiyatiya alo kapiya bumitiya:. 10�Ba:bene nale na:goiya:mo, �Kodawa, ama: bada ubi kihatiuta nale kododima:?� �Ebete na:huiyuya:, �Ama: mahigate Dama:sakase haba ipuwamo na:nopega, ba:bene ama:le kododilima: Godote ebeno ubi komo ya:lo tetelo dihatiya:, ba:bi komokomo eta lumagiti ba:bolo kokiyahamema:na:ta.� 11Ba:ba tetelo naeno baiditi a:duhunamiya: mabu nale alo konomo bumiya:mo, ba:bema: naeno mabuluba:te na kokotamo lawenete Dama:sakase habamo dito magataniya:. 12�Ba:bolo eta dubu ebeno mahilo A:nanayasitila, ebete Godoko tolemelo Mosesekono Tutumu Tabamo papamiwatanami, ba:gala Yunapa:te ba:be habalo demedehonama: ibi hiliyonomate ebe tuputupudawama: ga:lanama:. Ebete na unamema: da:piya: 13na tama:mo putiti na:pegoiya:, �Naeno ekawi Solo, amia:no baiditi hidamo na:kagahilameholena!� Ba:ba tetenomolo naeno baiditi da:hidohidohuya: nale ebe hidamo ba:bo umiya:mo. 14�Ba:bene ebete natamo na:goiya:, �Aeno iniwala:te dadikuminakui, ba:be Godote ama: ya:lo a:ka:miya:ta ama:le ebeno ubi komo kiya:tawama:, ba:gala ebeno Tuputupu Okodawoeno holoholo kumima:, ba:gala amia:no galamo ba:moe Tuputupudawoeno tabo madodo kulima:. 15Iyo, ama:le ebegodone kebe komokomo kulihui ba:gala kebe komokomo kulamiui, ebe ubila ama:le ba:bi komokomo tawakalubi hiliyonomatamo konolamagima:. 16Ba:bema: bada ka:latimiuta? Ama: mahigate beyamo aduti komo na:lawa:. Ama:le ebeno mahilo da:ka:mimina:, ebete amia:no kuba ukulalemete kadodolemema:na:ta.� � 17Ba:bene Polote tabo moga:melo gala na:kagoiya:, �Nale Yelusalemamo gala da:kapiya:mo, eta hegelalo Godoko Adikumino Genamalo eba:go tabo ba ga:lita naeno baiditi hiya:ma: eda:hanamete hido komo ba:bo umiya:mo. 18Ba:ba tetelo Kodawate natamo ba:ma ka:na goiya:, �Ama: ka:lonomo Yelusalemane tiyonomolo nuluhukuya:, mabu ba:moi tawakaluba:te ama:godone naeno hibi komo a:kalawa:mena:.� 19�Ba:bene nale na:huiyuya:mo, �Kodawa, ba:moenapi iya:tawahala, nale ibino hiya:hiya: baidi ibubulamehole genamalo ama: hibima: midipi doholenakuimo, nale ibi ba uwate komo alukulinakuimo, komo du genamamo dito niya:hekenakuimo. 20Ba:gala ibi iya:tawahala, komopa:te ya:lo gogolo amia:no hibi komo hawakalimidawa Stibiniko danakapumi, nale ba:be komo kalakalago ba umita ebe anakapumipino watuino kaliko bulamelelamitimo.� 21�Huiyatiya Kodawate natamo gala na:kagoiya:, �Ba:moe habane ama: nuluhukuya:, mabu nale ama: muhululu demedehona ba:bi Yuha:pa:tamo konoemema:nemata.� � 22Tabo ulihopi hiliyonomate Polokono tabo hidonomamo ulihonapiya:, huiyatiya ebete Yuha:pa:tamo Godokono ubilo toma: tabo dolamagiya: ba:ba tetelo mauba konomote iba:tamo uluhukuti ga:ga: ba katupuimi Loma gabomana:tamo gala na:kaga:luya:, �Nanakapuma:la:! Ba:moe dubuti na:hoena, ebe wadiyaha: ka:ka:na!� 23Ba:bema: ibino mauba ipuwalo ba ga:gita iba:te ibino watuino kaliko pipikulamete heloamo hakamo iya:hekete, ba:bene haka puhulu uwateholete hunamo ba:bo iya:hekeholiya:. 24Ba:bema: Loma alaholohopino watodawate tawakalubino mauba komo umiti ebeno alaholohopi dubu na:kiyalamiya:, iba:te Poloko gabomanino genama guamo magatate ebe giya:pa:pa:mo ba na:na:miga:ti, Yunapa:te ebetamo badama: ka:ga:gitiya: ba:be komo ebegodone hibilo kiya:tawama:. 25Ba:bene alaholohopi dubate tolamete Poloko ka:na:miga:tima: ebeno ape da:nehogaminuya:, ba:ba tetelo Polote ebe tamelo da:la:nuya: ba:be eta gawadalagi na:kiyamiya:, �Talona ba:kitana, Loma gabomanino pepago da:pata:na ba:bako lumagi dito a:na:miga:tima:? O la: dopamo ebeno komo hidamo ba:kanagiya:midameoma?� 26Alaholohopino gawadalagiti ba:moe tabo duliya:, ebete ebeno watodawatamo gala katote ebe ba:bo nalatediya:, �Ama: ba:moe dubutamo bada komo ododima: kewageliuta? Ama: iya:tawala:ka: ebete Loma gabomanino pepago da:pata:na?� 27Ba:bene alaholohopino watodawate Polotamo nuluhukuti ebe ba:bo nikiyamiya:, �Ama: hibilo na na:kiyanama:, ama: Loma gabomanino pepago ka:pateona?� Polote na:huiyuya:, �Iyo, ba: hibila.� 28Ba:bene alaholohopino watodawate na:goiya:, �Na atumu ba:bi pepago pata:namo, huiyatiya na ba:bi pepa ko maninomamo uwatiya:mo.� Polote na:goiya:, �Na huiyatiya ba:bi pepa mana:mo kuwatiya:ha:. Nale da:hawakaluya:mo ba:ba tetelo gabomana:te naeno nabiwitamo dito ikamiya:.� 29Ba:bene Poloko a:na:miga:tima: da:hidutiya: ba:bi alaholohopa:te ebeno tabo duliya:, ba:ba tetenomolo iba:te tole komo lawete ebe miya:pate tama:mo dito utitatuya:. Ibino watodawate atumu na:katoletoletiya: mabu ebete iya:tawaheno Loma gabomanino pepagoeno lumagi auli hala:mo da:matuhumihuya:, ebete ba:ba ka:na ibino eta ko kukala badikamidaliya:. 30Ba:ba tetelo Polote Yu tawakalubino ukuilo iba:tamo bada kuba kododiya:, alaholohopino watodawate ubila ba:be komo hibinomolo kiya:tawama:. Ba:bema: eta hegelalo ebete tabo benoelameholiya:, Godotamo hawa:goeno ikamehopino hununomo watowatopi ba:gala komo Yunapi Ka:nisolo dubu ibi hiliyonomate kopekapiyama:, ba:bene iba:te da:pelameholiya: ebete Poloko du genamane uluhukutiti ibino holoholo hapuamo ba: dito magahiya:.

will be added

X\