Ali 2

1Ba:bene Pentekose Poko Hegela duluhukuya:, ba:ba tetelo Ya:suku hibima: midipi hiliyonomate kapiya genamamo pekapiyuimiya:. 2Ba:ba tetelo ko diyamonomote Hunu Habane iba:tamo puluhukuya:, konomo huhuti da:goenape ba:ba ka:na pete iba:te da:pola:nuya: ba:be genama gu dito petabuya:. 3Ba:bene koe powoeno ma:lapila keba ka:nala:ka: ibi hiliyonomatamo ba nikuliho, hiya:hiya: kaneka:kehote etatamo etatamo ibi hunamo ba:bo negagahidiya:. 4Ba:ba tetelo Godokono Gobogobote ibi hiliyonomo da:tabuilamiya:, ebete ibi ba heluilame komo kapela tawakalubino hiya:hiya: tabamo olamagimi ba:bo tupuimiya:. 5Ba:bema: buka ka:lamiholedawa, ama: numa:, ba:be Pentekose Poko hegela peheno dopamo komo Yunapi ba:gala komo Yuha:pi Godoko dadikuminakui, ibi hiliyonomate ibino hiya:hiya: muhulu hopone Yelusalema ko habamo pelameholiya: ba:be poko kapimilo kopododima:. 6Ba:bene Godote ebeno Gobogobo Ya:sukunu hibima: midipa:tamo ko diyamago da:poemiya:, hiya:hiya: hopone pokoma: da:pelamiya: komo ibi hiliyonomate ba:be diyamo uliti hibi komo kumima: ba:bo pekapiyuya:. Ba:bema: iba:te koamo hanohanohutiya: mabu hibima: midipa:te Yu tawakalubino tabamo kaga:lutiya:ha: huiyatiya hiya:hiya: tabamo ga:lutiya:, ba:ma ka:na ulihopi ipuwalo etate ebeno tabonomo ulinakui, etate atumu ebeno tabonomo akulinakui, ibi hiliyonomate ba:ba ka:na ewagelitiya:. 7Ba:bene iba:te la:wa:hate ba hanohanoho na:ga:luya:, �Ba:moe tabo da:ga:luta, ba:moi tawakalubi aeno hoponapiha:, ibi ba: Ga:lili hoponapila, 8ba:bema: keba ka:nala:ka: iba:te aeno hiya:hiya: tabonomamo da:ga:luta a nulihutama:? 9A:iye, a hiliyonomate komo muhulu hopone pelameholima:! Iyo, a komo Patiyanapila, Midiyanapila, Ilamanapila, ba:gala Mesopotemiyanapila, ba:gala komo a Yudiyanapila, Ka:padosiyanapila, Pontasenapila, ba:gala A:isiyanapila. 10Ba:gala a komo Piligiyanapila, Pa:mapiliyanapila, ba:gala Isipitinapila, hibila, komo a Sailiniya haboeno Libiya hopone pelamima:, ba:gala komo a Loma ko habane da:pelamima: ba:bi tawakalubila. 11Numa:la:, a ipuwalo komo Yu tawakalubinomola, ba:gala a komo Yu tawakalubiha: huiyatiya ale iba:godone hibi Godo adikumi komo belawiya:ma:, iyo, a komo Kulitinapila ba:gala komo Alebiyanapila, ba:bema: ba:moi tawakaluba:te Godokono koko ododili komoma: da:ga:luta, ale aeno hiya:hiya: tabonomamo badama: kulihutama:?� 12Ba:be mabuma: ibi hiliyonomate hanohanoholo ukui bilibilima: ba eda:ha, etate etatamo goenakui, etate etatamo goenakui, ba:ba ka:na ewagelitiya:, �A:iye! Ba:moe komoeno ipuwa keba ka:nala:ka:?� 13Huiyatiya komopa:te Ya:sukunu oelamepi dubu ba walilatele na:ga:luya:, �Ba:moi dubate helo gao beya nihote da:wigulamehole, ba:bema: daedaeholita!� 14Ba:bene Pitate komo 11 oelamepi dubago mahigate ebeno tabo madodo hunamo ba adipate tawakalubi hiliyonomatamo ba:ma ka:na olamagiya:, �Naeno Yu mabuluba:la:, ba:gala komo la: Yelusalemamo da:pelameholima la: hiliyonomo atumu, nale ba:moe komoeno ipuwa la:tamo kohawakalimima:nemo, ba:bema: wadiyala la: naeno tabo hidamo nulia:la:. 15Ba:moi dubu la:le helo gao beya nihoma: da:ga:lutama, ebe tabo hibiha:. Iba:te helo gao beya kanihakaha:, mabu hibila, dubate helo gao beya duiduiyalo a:kanihala:. Numa:la:, hegela ka:ma: podoluta! 16Huiyatiya ba:moe komo ba: Godokono ukui hawakalimidawa Yowelate dopamo dolamagiya:, ba:be tabola. 17Iyo, Godote Yowelako ipuwado tabo ba:ma ka:na goiya:, �Ba:moe hopoeno kuititi tetelo na Godote naeno Gobogobo hiliyonomo tawakalubi hunamo kohaminama:nemo. Ba:ba tetelo la:eno kuhi ba:gala bohelemele, iba:te naeno ukui hibilo kohawakalimima:na:, ba:gala la:eno uli ape dubuino baiditi hiya:ma: eda:halamete koko komokomo kulameholema:na:, ba:gala la:eno kadelekadela:te atumu hiyolo naeno komokomo kiya:tawahama:na:. 18Iyo, ba: hibila, ba:be hegelalo naeno huiyaha: okopi dubu ba:gala kamenakamena, nale ibi hunamo naeno Gobogobo da:haminamo, iba:te naeno ukui hibinomolo ba:bo kohawakalilamema:na:. 19Ba:bene nale alomo hunulu koko hanohano komo kododilima:nemo, ba:gala hopo habalo nale atumu iwawi komokomo ba pododili, tawakaluba:te hawi ka:ka:la: komo ba:gala koe ba:gala ahuta kulamema:na:. 20Ba:ba tetelo hegelate kuduma:ne, ba:gala manomete hawihawinomoma: keda:ma:ne, ba:bene Kodawoeno Ko Hegelate ko alonomago kopuluhukuma:ne. 21Ba:bema: hibila, puya:te Kodawoeno mahilo da:ka:mimina: Godote ibino ka:ka: ba:bo komula:lelamema:ne.� � 22Ba:bene Pitate tabo moga:melo gala na:kagoiya:, �La: Isalaelanapi tawakaluba:la:, la: ba:moe tabo nulia:la:. La: iya:tawahanomola ba:moe Ya:suku Nasaletenapi Godote hopo habamo poemiya:, mabu Godote ebe ipuwado koko hanohano komo ba:gala iwawi komo la:godolo ba pododili ebeno helo a:pehawakalimi. 23Ba: hibila, ba:moe hopo konomolo eta komote uluhukuhino Godote ba:be komo dopamo kiya:tawama:ne. Ba:bema: ebeno mulu iya:tawa komodo ebete nopo ba:ma ka:na ihatiya:, ebete Ya:suku la:eno kokotamo ihatete, ba:bene kuba ododilipa:te la: ba owalubili la:le ebe lawete keha pihigamo pihomotete ikoko ba:bo alukulimimata, iyo, la:le ebe ba:moe gabodo anakapumimata. 24Huiyatiya Godote Ya:sukunu hoe temeteme pahalamilimiti ebe hoe ipuwane ba:bo adipati, mabu hoete ebe lawema: helo puliyala. 25Ba:be mabuma: Da:ibiditi Godokono heloamo Ya:sukunu komoma: tabo ba:ma ka:na miya:tiya:, �Na Kelisote naeno Kodawa Godoko na tamenomolo buminamo, iyo, ebete naeno tu hapulu ba:la:na nale waguwagukapoma:. 26Ba:bema: naeno tepo ipuwate ba moena, nale ko kalakalago olamaginakomo, iyo, nale Godoko hibima: midi ipuwalo ba emedena, naeno apeno hoe komoma: nale a:ka-ukuibilibila:mo. 27Mabu, Godo, ama:le naeno ape ha:lahapino habalo a:kamiya:pamena:ta, iyo, amia:no Talona Guduti da:hoemene, ama:le ebeno abale komo duhimiti ebe ka:ka:mo gala kakadipatema:na:ta. 28Ba: hibila, ama:le na ka:ka: gabo ya:lo iya:tunamiya:ta, ba:bene nale amia:no holoholo hapuamo da:puluhukumu, ama:le natamo ko kalakala kikanamema:na:ta.� � 29Ba:bene Pitate tabo moga:melo gala na:kagoiya:, �Ekaka:la:, na hilopoheno aeno iniwa Da:ibidikono komo hawakalimima: la:tamo kolamagima:nemo. Ebete ba:moe tabo Godokono Bukamo da:miya:tiya: ebeno komoma: kamiya:tiya:ha:, mabu numa:la:, ebete da:hoiya: iba:te ebe bobamo ihatiya:, ba:bene ka:lo ebeno bobo haba agodolo bitama:na. 30Da:ibidiko ba: Godokono ukui hawakalimidawa etala. Ba:be mabuma: Godote ebeno mahilamo hibi tabonomo Da:ibiditamo da:goiya:, ebete ba:bo iya:tawuya: Godote ebeno eyoni gugudi ipuwalo eta kapiya lawete ebeno Ko Gawadalagi emede baha:mo kadipima:ne. 31Ba:gala Kelisote galane tetelo hoe ipuwane da:mahigamene, ba:be komo uluhukuhino dopamo Da:ibiditi Godokono heloamo dumiya:, ba:be komoeno tabo ba:bema: ebeno Bukamo ba:ma ka:na miya:tiya:, �Godote ebe ha:lahapino habalo a:kamiya:pamene, ba:gala ebe bobo ipuwalo a:kabala:mene.� 32Ba: hibila, Da:ibiditi ba:moe tabo Kelisokono komoma: miya:tiya:, iyo, ba:moe Kelisoko ba: Ya:sutila, Godote ebe hoe ipuwane dadipati ale aeno baidinomamo ebe ba:bo umima:, 33ba:gala ba:moe Ya:suku Godote hununomamo adipatete ebeno tu hapuamo dito adipi. Ba:bema: numa:la:, Nabiwi Godote a hibima: midipa:tamo ikaa:mema: hibilo da:goiya:, ba:be kalakala komote ka:lo ba: uluhuku. Ba: hibila, ebete Ya:sutamo Talona Gobogobo ya:lo ikami, ba:bema: ebete ka:lo a hunamo ebeno helo ba: a:hamina, iyo, la:eno galamo dulihutama ba:gala la:eno baida:mo dumitama ba:moe ba:be komola. 34�Ba:bema: la: ba:moe komo hidamo nemalagidolala:, Ya:suti Godokono Hunu Habamo keba ka:na ka:nodolui, Da:ibiditi ba:ba ka:na kanodoluya:ha:. Ba:be mabuma: Da:ibiditi Ya:sukunu komoma: Godokono Bukamo eta tabo gala ba:ma ka:na kamiya:tiya:, �Kodawa Godote naeno Kodawa Kelisotamo na:goe, �Ama: naeno tu hapuamo na:pemeda:, 35ba:bene ama:go alaholohopi nale ibi amia:no nato a:puti bahima: komidilima:nemo.� � 36Ba:bema: la: Isalaelanapi hiliyonomala:, wadiyala la: iya:tawanomo niya:tawahala:, ba:moe Ya:suku la:le kehamo da:pihomotima, Godote ebe kapiya lawete aeno Kodawama: ba:gala aeno Kelisoma: a:midi!� 37Ba:bene tabo ulihopa:te Pitakono taboeno komoma: ko tepo temeteme ba lawita, ebe ba:gala komo oelamepi dubatamo na:ga:luya:, �Nana:la:, a bada komo na:kododima:?� 38- 39Pitate huiyatiya na:goiya:, �Wadiyala la: la:eno tepo ipuwoeno ukui hiya:ma: midiliti la:eno kuba ododili ipuwane nohobila:la:, ba:bema: ale la: Ya:su Kelisokono mahilamo beyamo kowadulatelema:na:ta. Ba:bene Kodawa Godote la:eno kuba egebolelamete ba adodolelame, ebete ebeno Gobogobo malemalelo la:tamo dito kopoemema:ne. Iyo, la: ba:gala la:eno gugudi ba:gala hiya:hiya: muhulu hopolo demedehona ba:bi tawakalubi atumu, la: hiliyonomo ipuwalo ebete kebe tawakalubi ebetamo pelamema: da:ka:lamina ebete iba:tamo ebeno Gobogoboeno helo kikalamema:ne, dopamo hibilo keba ka:na ka:goiya: ba:ba ka:na.� 40Ba:bene Pitate komo ba:makomako tabo hiliyonomo ba olamagi ibi ba:ma ka:na kiyahalamiya:, �Ba:moe hopolo kuba ododili ipuwalo da:wapata:lamena, la:le ba:bi tawakalubi ipuwane nikulihala: la:eno ka:ka: mula: komo kolawema:!� 41Ba:ba tetelo puya:te ebeno tabo dulihuya: komo ibi hiliyonomate hibima: miditi, ba:bene Ya:sukunu oelamepi dubate ibi beyamo ba:bo wadulateliya:. Ba: hibila, ba:be hegela kapiyalo 3,000 tawakaluba:te hibima: midi ipuwalo iba:go kapiyama: eda:huya:. 42Ba:bene komo hegela hiliyonomolo hibima: midipa:te ibino kapiyuimi komo kamiya:panakuiha:, iyo, iba:te kapimilo oelamepi dubuino iya:tulame komo ulihonakuya: ba:gala Ya:suku emalagidolo baa: nahanakui ba:gala Godotamo toetoe tabo akolamagiminakuya:. 43Ba: hibila, Godote oelamepi dubu ipuwado hiliyonomo hanohano komo ba:gala iwawi komo dododilinakui, ba:bema: hiliyonomo tawakaluba:godolo ko tolenomote itanami. 44Ba:gala eta komo, hibima: midipa:te ukui kapiyama: ba eda:ha, ibino ilina hiliyonomo kapiyama: midiliti, ba:bi ilinamo etate eta owalubinakui, etate eta akowalubinakui, ba:ba ka:na ewagelenama:. 45Ba:bema: iba:godolo modoboha: komokomo dikulinakui, ba:ba tetelo etate ebeno pali haka kolowamima: nimidinakui, etate ebeno eta ilina kolowamima: akanimidinakui, iba:te ba:be gabodo mani duwatehonakui awaepi ba:bo owalubilinakuya:. 46Ba:gala hibima: midipa:te komo hiya:hiya: hegela hiliyonomolo Godoko Adikumino Hiya: Genamamo pekapiyuiminakuya:, ba:bene iba:te gala ibino genamamo da:katolamenakui, hegehege kapiyuimi ipuwalo ibino baa: ba alabaha kalakala konomago ba:bo nahanakuya:. 47Ba: hibila, iba:te ba:moi ododili komodo Godokono mahilo hunamo ba adipatena, komo hiliyonomo tawakaluba:te ibino komoma: hidohido tabo ba:bo ga:lanakuya:. Ba:ba tetelo Godote pui dopamo da:ka:lamiholiya:, ba:bi tawakaluba:te ibino ka:ka: mula: komo ebegodone kolawema:, iba:te komo hiya:hiya: hegelalo hibima: midipa:tamo da:pelamenakui, hibima: midipino kuitititi hunamo ba:bema: nodolonami.

will be added

X\