Ali 18

1Ba:moe komote da:wibuya: Polote A:tenese haba miya:pate Kolini ko habamo ba: dito tuya:, 2ba:bene eta Yu dubu ebeno mahilo Akuilatela, Pontase hopolo hawakaluya:, ebete Polokoba: ba:bo aluguya:. Ba:ba tetelo ba:be dubuti ebeno kamena Pilisilakoba: Itali hopone piya:, mabu Konomo Gawadalagi Kolodiyasiti Yu tawakaluba:tamo maubalo a:goelamiya: ibi hiliyonomate ebeno Itali hopoeno Loma ko habane kikulihoma:. Ba:bema: eta hegelalo Polote ibi netewapa:tamo nuluhukuti, 3ibino mani oko ipuwalo ibi owalubili ba netupuimi iba:go ba:bo nemediya:, mabu ebete ba:be oko iya:tawala, ebete dopamo sipi-goegoe tamamo walokoa:midahale genama bododilinakui. 4Ba:ba tetelo Yu tawakalubino okoha: talona hegela hiliyonomolo Polote ibino baidi ibubulamehole genamamo tonakui, ba:bene ebete ibi ba:gala Guliki hoponapi iba:go ba kapiyuimi iba:tamo Godokono tabo komokomo ba:bo olamaginakui, mabu ebe ubi konomola iba:te Ya:sukunu hibi komo kiya:tawahama:. 5Ba:bene Sailasiko Timotiko iba:te Ma:sadoniya hopone Kolini ko habamo Polotamo da:puluhukuya:, ebete sipi-goegoe tama genama ododili mani oko ba:bo miya:puya:. Ba:ba tetelo ebete Godokono oko kapiya ba owatina Yu tawakaluba:tamo ba:ma ka:na olamaginakui, Ya:suku ba: Kelisote, Godokono Oemedawala. 6Huiyatiya eta hegelalo iba:te Poloko iduduputimilo ebeno iya:tulame komokomo da:duhilamiya:, Polote ibino dopo hapulu ebeno kalikoeno puhulu ba moda:midatepale na:goiya:, �Ba:moe komone la: niya:tawahala:, la:le ba:bolo Godokono ka:ka: mula: komo nelaweheno, ba:be komo ba: la:eno kubala! Naeno kubaha:, mabu nale Godokono hibi komo la: hidamo iya:tulamimata, huiyatiya la: ubihinola. Ba:bema: ba:ma tetelo na la:godone ohobigate huiyatiya Yuha:pa:tamo kotoma:nemo.� 7Ba:bene Polote ibi miya:palete eta Yuha: dubuino genamalo nemediya:, ba:be dubuino mahilo ba: Taitasi Yasitasitila, ebe hibi Godo badikuminami ba:gala ebeno genamate Yu tawakalubino baidi ibubulamehole genama tamelo la:nami. 8Ba:ba tetelo eta dubu, ebeno mahilo Kilipasatela, ebete Yu tawakalubino baidi ibubulamehole genama umidawama: eda:nami, ebe ba:gala ebeno genamanapi iba:te Kodawa Ya:suku hibima: a:midiya:. Ba:gala komo Kolini habanapi hiliyonomate atumu Godokono tabo Pologodone ulihote hibima: miditi beyamo wadulatele komo ba:bo lawiya:. 9Ba:bene eta dulu Kodawa Ya:suti Poloko hiyolo na:goemeniya:, �Ama: naeno tabo olamagima: akatoletola:la:, ba:gala tabo goeha:ma: akeda:la:, 10mabu nale ama:go bemedenamo, ba:bema: eta lumagiti ama: a:kakubahima:mena:ta. Ba:gala ba:moe haba konomolo naeno komo tawakalubi hiliyonomate bemedena, ama: kapiyaha:.� 11Ba:bema: Polote ba:bolo kapiya gogo ba:gala sikisi manome ba emedena Godokono tabo komokomo tawakalubi ba:bo iya:tulamenakui. 12Ba:be gogolo Loma gabomani koko dubate Ga:liyoko bepoemiya: ebete Guliki hoponapino uli Kapela Ko Gawadalagima: kopeda:nama:, ba:bema: ba:be hopoeno Yu tawakaluba:te ukui kapiyama: miditi Poloko ebetamo ba:bo magatuya: ebeno komo kanagiya:midamema:. 13Ba:ba tetelo iba:te Ko Gawadalagitamo na:ga:luya:, �Ba:moe dubu Godoko adikumino hiya: gabo ba iya:tulame, ebete tawakaluba:tamo helo bikalamena gabomanino kukala kowakalamima:.� 14Ba:bema: Polote ubila huiya tabo kogoemema:, huiyatiya Ga:liyote ebe duhimiti Yu tawakaluba:tamo na:goiya:, �Lumagiti eta ko kuba hibilo nododitale, nale la: Yunapino tabo komokomo hidamo bulihona:, huiyatiya moe komo ko komoha:! 15La: la:eno Yu hopoeno komonomoma: olowabeletihuitamata, ba:bi komo ba: la:eno Buka taboeno ipuwa komokomo, ba:gala la:eno tawakalubino mahiloeno komokomo, ba:gala la:eno iniwalino kukala komokomola, ba:bema: wadiyala la: ha:kiya la:eno ubiha: komo na:netuputupuima:la:. Na ubihinola ba:bi komo anagilamedawama: eda:!� 16Ba:bene Ga:liyote helo lawete ibi hiliyonomo ebeno tabo anagiya:mida genamane dito ta:malateliya:. 17Ba:ba tetelo ba:bi Yunapa:te menemenenomoma: eda:hate ibino baidi ibubulamehole genama umidawa Sostenisiko lawete Ga:liyokono tabo anagiya:mida genama dopo hapulu kubanomamo ba:bo anagalimihuya:, huiyatiya Ga:liyote ba:be komo ko komoma: kagoiya:ha:, ba:bema: ebete iba:godone dito ohobiguya: ebeno komo oko kowatima:. 18Ba:be komote da:wibuya: Polote tete ga:ga:dopo hibima: midipi ekaka:go emedete, ba:bene Kolini haba ba miya:pa ebete Pilisilako ba:gala Akuilako uwatete Siliya muhulu hopamo tolame ba:bo tupuimiya:. Ba:bene iba:te Senekiliya habamo nikuliti ko palai boga:mo nololoheno, dopamo Polote ebeno tepo ipuwoeno hibi komo kohawakalimima: ebeno hinibo ba:bo nelepiya:, mabu ebete dopamo kebe tabo Godotamo hibilo da:goiya:, ebete ba: ba:ba ka:na oko owati ipuwalo kuitita:mo a:nuluhukuya:. 19Ba:bene Polua:te gala katolamete Epesese ko habamo da:nikuliya:, ebete Pilisilako ba:gala Akuilako ba:bo nimiya:paliya: iba:te ba:bolo kemedenama:. Ba:ba tetelo Polote ha:kiya tote Yunapino baidi ibubulamehole genamamo nodolote Godokono Buka tabo komokomo iba:tamo ba:bo nolamagiya:. 20Ba:bene iba:te ebe na:ga:lamiya: tete ga:ga:dopo iba:go kemedema:, huiyatiya Polote na:goiya:, �Ao, na kotoma:nemo.� 21Ba:ba tetelo ebete ibi ba miya:pale eta tabo ba:ma ka:na goelamiya:, �Godote ubi dihatemene na la:tamo gala kakapema:nemo,� ba:bene ebete tote ko palai boga:mo da:nololuya:, ba:be bogete Epesese ko habane ba: dito tuya:. 22Ba:bene bogete kehaha: kolomo na:hiwate Sisaliya ko habamo da:nutiya:, ba:ba tetelo Polote haka gabodo tote Yelusalema ko habamo nuluhukuti sose tawakaluba:tamo ebeno malemale tabo nolamagiti, ba:bene ibi miya:palete ebete A:ntiyoka ko habamo ba: dito katuya:. 23Ba:bene ebete tete ga:ga:dopo A:ntiyokalo emedete, ba:be ko haba kamiya:pate Galesiya ba:gala Piligiya hopodo ba peto Ya:suku ta:matapi owalubila:go ebete ibi ba:bo peheluilamenatuya:. 24Ba:ba tetelo eta Yu dubu ebeno mahilo Apolositi, ebe A:lesandiya habanapila, ebe Godokono Buka taboeno hiya:hiya: komoeno ipuwa iya:tawanomola ba:gala ebeno tabo olamagi mulunomola, ebete Epesese ko habamo piya:. 25Ba:moe dubu eta lumagiti Kodawa Ya:suku ta:mata gabo dopamo iya:tumiya:, ba:bema: ebete ebeno tepo ipuwalo koenomoma: ba eda:na Ya:sukunu komoma: komopi hidonomamo iya:tulamenakui. Huiyatiya ebete Yonekono beyamo wadulatele komo kapiya biya:tawuya:, ba:bema: ebete kiya:tawuya:ha: Godote ebeno Gobogobamo tawakalubi keba ka:na da:wadulatelenako ba:be komo. 26Ba:bene eta hegelalo Apolositi Yunapino baidi ibubulamehole genamalo Godokono tabo toleheno dolamagiya:, Pilisilako ba:gala Akuilako iba:te ebeno tabo uliti, Apolosiko ibino genamamo magatate Godokono gaboeno komoma: komo hidohido iya:tulame tabo komamo ebe ba:bo nowalubiya:. 27Ba:bema: eta tetelo Apolositi Guliki hopamo toma: ubi dihatiya:, Epesese hibima: midipi ekaka:te leta boemiya: Gulikinapi hibima: midipa:tamo iba:te ebe kalakalago kolawema:. Ba:bene Apolositi ba:bamo da:nuluhukuya:, puya:te Godokono malemaledo hibima: midipima: deda:hanama:, ebete ba:bi tawakalubi koamo ba:bo nowalubiliya:. 28Ba:ba tetelo ebete Godokono tabo olamagi helonomoma: neda:te, komo Yunapa:te ebeno taboeno hiya:hiya: komo duhilamema: dewagelenakui, huiyatiya Apolositi tawakalubi hiliyonomoeno holoholo hapulu ibino tabo modobolo alukulilamenakui. Iyo, ebete Godokono Buka tabo komokomoeno ipuwa hidamo ba:ma ka:na hawakaliminakui, Ya:suku ba: Kelisote, Godokono Oemedawala.

will be added

X\