2 Kol 1

1Na ba: Polotela, Ya:su Kelisote ebeno sose tupuimima: hiya:hiya: hopamo doelamiya:, ba:bi okopi ipuwalo na ba: etala mabu Godote ebeno ubilo na a:laweniya:. Na ba:gala a hibima: midipino ekawi Timotiko, ale la: puya:te Kolini habalo Godokono sose tawakalubima: deda:hanama, ba:gala komo la: puya:te Guliki hopo konomolo Godokono tawakalubima: da:keda:hanama, ale ba:moe leta la: hiliyonomatamo poemema:. 2Wadiyala aeno Nabiwi Godoko ba:gala Kodawa Ya:su Kelisoko iba:te ibino malemale komo ba:gala hete komo la:tamo nikalama:mena:ta. 3Wadiyala ale aeno Kodawa Ya:su Kelisokono Nabiwi Godotamo kalakala tabo kadipatiya:, mabu ebe ba: ebeno gugudi konomamo da:malemalelatelena ba:be Nabiwila, ba:gala ebe ba: iba:tamo gelebadi dikalamena ba:be Godola. 4Iyo, ebete a aeno temeteme hiliyonomo ipuwalo a:gelebadia:menako, mabu ebe ubila ale kebe gelebadi ebegodone da:lawenakoma: a ba:be atu gelebadi komamo komopino hiya:hiya: temeteme ipuwalo ibi atumu kakowalubilinakoma:. 5Numa:la:, ale Kelisoko ipuwalo ba emedena ebe mabuma: hiya:hiya: temeteme komate atamo konomamo keba ka:na kikulihonaka, ba: ba:ba ka:na ebe ipuwado gelebadi komote atamo konomamo atumu ba:kuluhukunakomene. 6Ba:bema: Godokono ubi komo ba: ba:ma ka:nala, kebe hiya:hiya: temeteme komate atamo dikulihonaka, ba:bi temeteme komodo la:le la:eno temeteme ipuwalo la:eno gelebadi komo ba:gala ka:ka: mula: komo kuwatema:nemata, ba:gala aeno temeteme ipuwalo kebe gelebadi komote atamo duluhukunako, ba:be gelebadi komodo la:le atumu la:eno gelebadi komo kakalawema:nemata. Iyo, agodolo da:pola:na ba:bako atu temeteme komate la:tamo da:pikulimina:, ba:bi temeteme ipuwalo la:le hido gelebadi komo lawete kodakodalo ba:bo kola:mota:hanama:nemata. 7Ba:bema: numa:la:, la:le la:eno hibima: midi ipuwado kuititi teta:mo modobolo da:nikulima, ale ba:be komo galane tetelo kumima: hibima: na:midinama:. Iyo, ba:moe komote aeno ukuilo kodakodalo bitana, mabu a iya:tawahala atu hiya:hiya: temeteme komate la: ba:gala a hiliyonomatamo kapimilo keba ka:na kikulihonaka, ba:ba ka:na Godokono gelebadi komote atumu la: ba:gala a hiliyonomatamo kapimilo ba:kuluhukunakomene. 8Ba:bema: aeno hibima: midipi ekaka:la:, A:isiya hopolo atamo duluhukui, a ubila la:le ba:be komo hidonomamo iya:tawaha. Hibila, ba:ba tetelo koko temeteme komate atamo dikulihui aeno ukui komate menemenenomoma: ba eda:haa:me, ale ba:bo emalagidoluima: ale aeno temeteme komoma: ba: dito koha:lahama:nema:. 9Iyo, ale aeno tepo ipuwalo ba:ma ka:na emalagidoluima:, Godokono ubilo aeno ha:laha tetete hibinomolo uluhukui. Huiyatiya eba ka:naha:, hoe komote atamo kuluhukuha:. Ao, Godote a mabuma: ebeno eta ubi ba:ma ka:na ihati, ale ba:bi temeteme ipuwado a ha:kiya aeno helo modoboha:ma: ga:lalo ale ebe kapiya hibima: ba:bo komidima:, mabu ebe ba: ha:lahapi ka:ka:mo da:wadiya:paa:latelenako ba:be Godola. 10- 11Ba: hibila, ebete ba:bako konomo hoe olalati ipuwalo aeno ka:ka: a:mula:lea:mi, ba:bema: a iya:tawahala ebete galane tetelo aeno ka:ka: gala kakamula:lea:mema:ne, iyo, la:le a toetoe tabamo ba owalubi ale aeno hiya:hiya: olalati komo hiliyonomo ipuwalo aeno hibima: midi komo Godotamo bihatenama: ebete aeno ka:ka: komula:lea:mema:. Ba:bema: numa:la:, Godote la:eno hiliyonomo toetoe tabo dulihona ba:be komodo ebete a hidamo bowalubinakomene, iyo, komo tawakalubi hiliyonomate kalakala tabo ebetamo ba:bema: badipatenakomena:. 12Ba:bema: hibila, ale nawagahanama: mabu aeno tepo ipuwoeno mulu ukui komate a ba:ma ka:na kiyaa:menaka, aeno ododili ipuwalo ale hopo habanapi hiliyonomatamo Godokono talona ba:gala tuputupu emede komo kapiyanomo ba hawakalimi, huiyatiya ba:be komo la: Kolini sose tawakaluba:tamo konomamo a:hawakaliminakuima:. Numa:la:, Godokono malemale komodo ebete helo atamo nikaa:mena ale ba:ba ka:na kemedenama:, eta hopo lumagino mulu ukui komodo ale helo a:kalawa:lema:. 13Ba:be mabuma: nale naeno hiya:hiya: leta ipuwalo naeno ubi bihatenamo, la:le naeno tabo komokomo ba ka:lamihole naeno iya:tulame komoeno ipuwa tiyolo ba:bo kuwatenakoma:, 14iyo, wadiyala la:le dopamo aeno iya:tulame komo nanekele keba ka:na ka:lawa:tepuima, ba:ma tetelo la: huiyatiya ba:be iya:tulame komoeno konomo ipuwa hidonomamo kolawema:nemata. Ba:bema: numa:la:, la: ba:be gabodo Kodawa Ya:sukunu Ko Hegelalo a mabuma: kawagahama:nemata, ba:ba tetelo ale la: mabuma: keba ka:na dawagahama: ba:ba ka:na. 15- 16Ba: hibila, na ba:be komo ba iya:tawa nale nopo ba:ma ka:na ihatimo, la: kowalubilima: nale netewa hiya:hiya: tetelo la:tamo kopuluhukuma:nemo. Ba:bema: nale ba:ma ka:na emalagidoluimo, na Ma:sadoniya hopamo ba to gabo tetelo la:go dopamo pemeda:tepate, ba:bene Ma:sadoniya hopone da:kawilamo la:tamo atumu gala kakapuluhukuma:nemo. Ba:gala nale eta ukui ba:ma ka:na kihatimo, nale la: ipuwane Yudiya hopamo to ba tupuimi la:godone owalubi ba:bo kolawema:nemo. 17Huiyatiya nale ba:be nopo hiya:ma: miditi la:tamo kapuluhukuha:, ba:bema: diyala, la:le na ukui gagagagadawama: kuda: a:midinimata. La: iya:tawahala, hopo habanapa:te ha:da amiho gabodo etapa:tamo �Iyo, na kododima:nemo� tabo ba ga:la, huiyatiya ba:be tabo komone ohobila:hate �Ao, na a:kododa:mo� tabo etapa:tamo gala dito kaga:lanaka. A:iye! La:le na ba:bako lumagima: kemalagidolonama? 18Numa:la:, Godoko hibidawanomoma: ba eda:na ebete aeno hibi komo iya:tawala, ale la:tamo pelamema: ha:da amiho gabodo �Iyo� tabo kaga:laha:. Ba: hibila, ale aeno dopo tabo komone ohobila:te ale la:tamo pelamema: �Ao� tabo gala ba kaga:la, a ba:be komo hibi gabodo ododima:. 19A:iye! Na Poloko ba:gala Sailasiko ba:gala Timotiko, ale dopamo la: ipuwalo Hido Tabo ba polamagimi Godokono Gudu Ya:su Kelisokono komo ba:ma ka:na hawakaliminakuima:, ebete etapa:tamo �Iyo, na kododima:nemo� tabo ha:da amiho gabodo goete, ba:be tabone etapa:tamo ohobigalo �Ao, na a:kododa:mo� tabo a:kagaa:mene. Numa:la:, ebete hibidawama: ba eda:na, a hibima: midipi kowalubinama: hiliyonomo tetelo �Iyo� tabo kapiyanomo begoenako, 20mabu hibila, Godote a kowalubinama: hiya:hiya: tabo dolamaginako, ba:bi hiliyonomo tabo komoma: Ya:suti �Iyo� tabo ba goena, ebe kapiyado ba:bi komate hibinomoma: beda:hanamena:. Ba:moe mabuma: ale Godokono hidohido ododili komoma: aeno toetoe tabamo ebe dawagaminanakoma:, ale �Ba:ba:la� tabo Ya:sukunu mahilamo ba:bema: ga:lanakoma:. 21Ba:bema: kalakala konomola, mabu ale la:go kapimilo Godokono Oemedawa Kelisoko ipuwalo ba emedena, Godoko ba: a da:kodakoduia:mena ba:be Helodawala. Iyo, ale ebeno oko kowatihonama: ebete a ba:bema: uwatiya:, 22ba:bene ale ebenoma: deda:hanama: ba:be komo kiya:tawahama: ebete ebeno kukala atamo ba miya:tea:me, ebeno Gobogobo aeno tepo ipuwamo ba: dito ihatea:miya:. Ba: hibila, ale ba:be komodo ba:ma ka:na kiya:tawahama:nema:, kebe hidohido komate ebegodolo da:pola:na, galane tetelo ebete atumu ba:bi hiliyonomo komo atamo hibinomolo kikaa:mema:ne. 23Ba:bema: numa:la:, Godote naeno tepo ipuwoeno komokomo ba ulamelenamena, ebete naeno tabo hibi tabonomoma: goe, ba:ma ka:na na eta ko temeteme la:tamo ikalamema: ubiha:ma: edimo, ba:bema: nale naeno nopo hiya:ma: miditi la:eno Kolini habamo kapeha:. 24Huiyatiya ale la: mabuma: kebe oko kowatinama:, ba:be oko komoma: ukui kubamo akalawa:la:. Numa:la:, Godokono hibi kalakalate la:eno tepo ipuwalo kitanama: ale oko ba:bema: owatinama:, mabu a iya:tawahala la: hibima: midi ipuwalo kodakodalo la:mota:hanamata, iyo, a ubihinola la:le a la:eno kokopima: ka:milo aeno ukui komamo la:le la:eno menemene komago dito papamila:hale!

will be added

X\