1 Pit 2

1Ba:moe ba:be mabuma: la:godolo da:pola:na ba:bi hiya:hiya: kuba hiliyonomo tama:mo na:miya:ta:la:, ba:ma ka:na ha:da tabo akolamagiminakala:, ba:gala ma:lapila netewa komo na:miya:pala:la:, ba:gala komopino ilinama: akamaubahalenakala:, ba:gala tawakalubino mahilo kubahilame talonala. 2La: huiyatiya a:lia:li gugudimo ba eda:ha Godokono Gobogoboeno hido nono nihoma: la: la:eno ubi komo konomamo nihatenala:, iyo, ba: ba:ba ka:na la: la:eno ka:ka: mula: komo hibilo lawema: hibima: midi ipuwalo kapepehoma:nemata. 3Ba: hibila, dopamo tetelo la: Kodawoeno malemale totoma:namidate golanomoma: ba:bo ga:luya:mata. 4Ba:bema: la:le Ko Ka:ka:dawa Ya:sutamo na:pelama:la:, ebe ba: tawakaluba:te kubama: ga:late tama:mo dihatiya: ba:be dawala, huiyatiya Godote ebe hidonomo nakola huiya hototoma: goelo ba:bo lawiya:. 5Numa:la:, ebeno ka:ka:te la: ipuwalo atumu ba:kaitana, ba:bema: wadiyala la: pelamete la: ha:kiya la: Godotamo na:pikamehala:, la:le ebe adikumino genamoeno hidohido kehama: keda:hanama:. Ba:bene la: ba:be genama gulu ebe ba owatidolona ebeno Gobogoboeno talona oko owati komodo malemale ilina ebetamo ikamehopima: beda:hanamata, ba:bema: la:le Ya:su Kelisoko ipuwado ebetamo dikamehonakoma, ebete kalakalago la:godone buwatenakomene. 6Numa:la:, Godote ba:be komo hawakalima: ebeno Bukalo ba:ma ka:na goena, �Na hidonomo nakola huiya abo lawete Yelusalema ko habalo detenamo ba:be genamoeno hototoma: komidima:nemo. Ba:bema: kebe lumagiti ba:be dawa hibima: da:midimini, ebete emedena tetelo hilopo komo a:kiya:tawanamene.� 7Ba: hibila, la: puya:te Ya:suku hibima: da:midinama, la: iya:tawahala ebe ba: Godokono huiya konomo hototoma: eda:na. Huiyatiya numa:la:, komopa:te ebe hibima: kamidinaha:, ba:bema: Godokono Buka tabote ibino ubiha: komo hawakalimima: ba:ma ka:na goena, �Genama etepa:te tama:mo dihati, ba:be hototote huiyatiya genamoeno helo mabuma: eda:na.� 8Ba:gala Godokono Bukalo eta tabote ba:ma ka:na itana, �Ba:moe Kodawa ba: gabo tetelo ditana ba:be nakolala, tawakaluba:te ibino kuba ubi komago ba tolame ebegodolo nato nukamidahalete ebe hunamo ba:bo konegudima:na:.� Ba:bema: hibila, iba:te Godokono tabo hibima: midiha: mabuma: nato ukamidahalete ba:bo gudinaka, Godote ibi mabuma: ya:lo da:goiya: ba:ba ka:na. 9Huiyatiya la: hibima: midipino komo hiya:nomola. La: ba: Godote ebeno ubilo duwatiya:la ba:bi tawakalubilata, ba:gala la: Ko Gawadalagi Godoko adikumilo ebetamo malemale ilina dikamehonakoma, la: ba: ba:bi okopilata. Iyo, la: ba: ebetamo talona oko dowatinama ba:bi kapiyuimipilata, ba:gala la: ba: Godokono hiya:nomo tawakalubima: eda:hanamata. Ba: hibila, Godote la: du ipuwane a:ka:lamiya:ta, mabu ebe ubila la:le ebeno hidonomo alo ipuwalo ba emedena ebeno hidohido ododili komokomo komopa:tamo kolamagiminakoma:. 10Ba:bema: kalakala konomola, la:le dopamo tetelo Godokono tawakalubima: keda:hanamiha: huiyatiya ka:lo la: ba: ebeno gugudilata, ba:gala dopamo la: ebeno malemale kiya:tawahuya:ha: huiyatiya ba:ma tetelo ebegodone a:lawiya:mata. 11Naeno hidohido mabuluba:la:, nale la: betoelameholemata la: ba:moe hopolo ba emedehona kapelapima: neda:hanala:, mabu la: ba: Godokono Hunu Habanapilata. Ba:bema: la:eno kateneno ubi komamo akapapamila:hala:, mabu ba:bi kuba ubi komate la:eno gobogoboeno ka:ka:go ba alaholoho la: kubahilamema: ewagelena. 12Ba:gala la:le hibima: midiha:pa:go ba emedena ibino holoholo hapulu hidohido komo kapiya nododilinakuya:la:, mabu ibi ipuwalo puya:te la: kubapima: da:ka:lamina, iba:te la:eno hidohido ododili komo ba ulamena la: mabuma: ukui hiya:ma: ba:bo komidilima:na:. Iyo, hibila, Godote hopo habanapino komo anagilamelelamema: da:pemene, ba:be Ko Hegelalo ba:bi atu tawakaluba:te la:eno hidohido ododili komoma: Godokono mahilo kadipatema:na:. 13- 14Ba:bema: Kodawa Ya:suku mabuma: la:le Loma habanapino Konomo Gawadalagitamo na:papamila:hanala:, mabu hopo konomolo ebeno helote hibilo bitana. Ba:gala ebete komo hiliyonomo hiya:hiya: hopamo da:noelamiya: ba:bi koko gawadubu ba:gala ibino komo gabomani okopi, wadiyala la: ibi hiliyonomatamo atumu na:kapapamila:halenakuya:la:. Ba: hibila, ba:bi dubagodolo helo bitana kuba ododilipa:tamo kuba huiya ba ikalame hidohido komo ododilipi hunamo kowadiya:paa:latelema:na:. 15Ba:moe mabuma: Godokono ubi komo ba:ma ka:na bitana, keba tetelo ebeno hibi komo iya:tawaha:pa:te la: kubapima: da:ka:lamimina:, la:le la:eno hidohido ododili komamo ibino daedae tabo ga:la komo ba:bo koduhilamema:nemata. 16Ba:bema: la: Kelisoko ipuwalo tutupima: deda:hanama, la: hidamo! La: daedae ukuilo ba:ma ka:na akaga:lala:, �Kelisote aeno kuba huiya ya:lo uwatea:miya:, ba:bema: ale aeno kuba ubi komokomo gala da:kododilima:, Godogodone kuba huiya a:kalawa:ma:.� Ao, eba ka:naha:! Wadiyala la: huiyatiya la:eno ape Godotamo ikamehonomo nikamehuya:la:, la:le la:eno ododili ipuwalo ebeno huiyaha: okopima: keda:hanama:. 17Ba: ba:ba ka:na la:le komo hibima: midipi hiliyonomo malemalelo ba emalagidole Godoko kapiya na:tolemenala:. Ba:gala ba:moe hopo konomolo heloma: deda:na, ba:be Lomanapino Konomo Gawadalagino komoma: la:le la:eno tepo ipuwalo kuba tabo ga:laheno ebeno tutumamo na:papamila:hanakuya:la:. Iyo, wadiyala la: ha:kiya la: hopamo ba miya:te, komo tawakalubi hiliyonomoeno komoma: la:eno tepo ipuwoeno ukuilo ibi hunamo na:wadiya:paa:latelenakuya:la:. 18Ba:bema: koko oko dubate la: pui mana:mo duwatiya:la, wadiyala la:le ba:bi dubuino huiyaha: oko kowatihonama: la:eno tepo ipuwalo ibino komoma: kuba tabo ga:laheno iba:tamo oko helonomamo nowatinakuya:la:. Iyo, oko namutulubi ipuwalo puya:te la: da:malemalelatelena, la:le hidohido oko ibi kapiyatamo owatihoheno, puya:te la: kiyahalamelo la:tamo da:maubahalena, wadiyala la: ba:bako oko namutuluba:tamo atumu kalakalago na:papamila:halenakuya:la:. 19Ba: hibila, ama: ba:ba ka:na ba ewagelena amia:no kuba ododiha: tetelo etate ama:tamo temeteme dikamemena:, Godote ba:be komo umiti ama:tamo kokalakalama:ne mabu ama: amia:no tepo kodakoduimilo ebeno ubi komamo na:papamiwatanata. 20Huiyatiya ama: oko kubamo owati ipuwalo namutudawate hiya:hiya: temeteme ama:tamo dikamehomena:, ba:ba tetelo ama: amia:no tepo kodakoduimilo ko komoha:ma: da:goemena:, ba:be mabuma: Godote ama:tamo ba:ka:kalakalamene? Ao, ebeno kalakalate a:kitanamene mabu ama: ba: kuba okodawalata, huiyatiya keba tetelo ama: hido oko owati ipuwalo temeteme da:lawemena:, ba:ba tetelo ebeno kalakalate ama:tamo hibilo kitanama:ne. 21Ba: hibila, Godote la: hibima: midipi a:ka:lamiya:ta, la:eno hibima: midi mabuma: ba:moe hopoeno temeteme ipuwalo kopola:nama:. Ba:bema: Kelisote la:eno ka:ka: komula:lelamema: ebeno hoe ipuwalo koko temeteme keba ka:na kuwatiya:, Godoko ubila la: Kelisokono nato bobodo ebe hibilo kota:matanama:. 22Iyo, numa:la:, Kelisote eta kuba kododiya:ha: ba:gala ebegodolo eta ha:da amiho komo puliyala. 23Ba:gala kubapa:te ebe diduduputimiya: ebete huiyatiya iba:tamo iduduputilame tabamo kahuiyuya:ha:, iyo, ebete iba:godone koko temeteme duwatiya:, ebete ibi kiyahalamelo iba:tamo kuba huiya ikalamema: kagoiya:ha:. Ba:ba tetelo ebete huiyatiya ebeno hibima: midi komo Godotamo ihatiya: ebete ebeno ka:ka: komula:mema:, mabu ebe iya:tawuya: galane ba:be Kodawate hiliyonomo tawakalubino komo tuputupunomo gabodo kanagilamelelamema:ne. 24Ba:bene Kelisote ha:kiya ebeno apa:mo aeno kuba ododili komo uwatea:mete keha pihigamo ba:bo watuya:. Ebete ba:ba ka:na ododiya: mabu ebe ubila ale aeno kuba ododili ipuwalo ha:lahate ebeno tuputupu emede ipuwalo kemedehonama:. Iyo, hibila, ebete ebeno temeteme uwate komodo la: a:hiduilamiya:ta, 25ba:bema: numa:la:, dopamo tetelo la: hiya:hiya: dalatidiholiya:ma ba:bi sipi-goegoemo emedehonamimata, huiyatiya ka:lo Godote la: gala a:kamagaheliya:ta la:eno Hido Sipi-goegoe Ulamedawa kota:matanama:, ebe ba: la:eno tepo ipuwoeno Ukui Buiya:minaledawala.

will be added

X\