1 Kol 2

1Ba:bene naeno hibima: midipi ekaka:la:, dopamo nale la:tamo da:puluhukuimo, ba:ba tetelo na Godokono hibi komo la:tamo kohawakalimima: ebeno tabo ba olamagi na hopo habanapino koko iya:tulame tabo komamo ba:gala ibino mulu ukui komamo kapolamagiha:, mabu na ubiha:ma: edimo la:le na hunamo adipanatenema:. 2Ba:bema: nale la:go ba emedena naeno tepo ipuwoeno ukui ba:ma ka:na ihatimo, naeno hiliyonomo ododili ipuwalo kapiyadawa hunamo ba adipatena, ebeno hidonomo oko kapiya ba:bo kohawakalimima:. Ba:be dawa ba: Ya:su Kelisotela, ba:bene ebeno hidonomo oko ba: ebete keha pihigalo da:hoiya: ba:be komola. 3Ba: hibila, nale la: ipuwalo oko dowatinamimo, ba:be tete ga:ga:dopolo naeno ape heloha:ma: ba eda:na, nale Godokono tabo la:tamo hidamo kolamagima: komo hiliyonomo tetelo na la:eno holoholo hapulu tole komago a:lililanakuimo. 4Ba:gala eta komo. Ba:ba tetelo nale Hido Taboeno komokomo la:tamo kohawakalilamema: hopo habanapino mulu ukui komamo kolamaginakuiha:. Iyo, na iya:tawuimo nale ba:moe hopoeno mulu ukui komamo la: diya:tulamema, ba:bema: Godokono Gobogobote la: ipuwalo hibi oko a:kowata:mene, huiyatiya keba tetelo ebete ebeno heloamo la:eno tepo ipuwoeno ukui hiya:ma: da:midililamemena:, la: ebeno oko owati ipuwado hibima: midipima: ba:bo keda:hama:nemata. 5Ba:be mabuma: la: ba:moe komo hidamo niya:tawahala:, la:eno hibima: midi komoeno mabu ba: Godokono helo komola, hopo habanapino mulu ukui komoha:. 6La: huiyatiya numa:la:, ale Hido Tabo dolamagiminakoma: ba:be Taboeno mulu komo hibilo bitana, puya:te hibima: midi ipuwalo hidamo dapepehona ibi kapiyate ba:be mulu modobolo lawenaka. Huiyatiya ba:be Taboeno mulu komo ba:moe hoponapa:te ibino ukuilo kalawenaha:, ba:gala kebe kuba gobogobate ba:moe hopolo helohelonomoma: deda:hana, ibi atumu ba:be mulu komo modobolo a:kalawa:la:, hibila, ba:bi kuba gobogoboeno helo komote ba: na:wibona. 7Iyo, ale Godokono Hido Tabo ba olamagimi, ebete dopamo diya gabodo dugumuiya: ba:be mulu komote hibima: midipa:tamo ba:ma tetelo na:hawakalana, mabu Godote ba:moe hopo ba:gala alomo ododilihino dopamo ebete ebeno ubi komo ba:ma ka:na ihatiya:, galane tetelo ebete ebeno mulu ukui komamo a hibima: midipi kawagaminoema:ne. 8La: huiyatiya numa:la:, ba:moe hopolo helohelonomoma: deda:hana, ba:bi kuba gobogobate kamodobuya:ha: Konomo Alago Emededawoeno hoe komoeno hibi mulu ipuwa lawe. Iyo, iba:te ba:be Kodawoeno hoe komoeno ipuwa hibilo niya:tawahuya:tale iba:te ebe keha pihigalo ba:kanakapumiya:na:. 9Huiyatiya Godokono Bukalo eta tabote a hibima: midipino komo ba:ma ka:na hawakalimina, �Hopo habanapi hiliyonomate dopamo kebe hido komo kuminakuiha:, ba:gala iba:te kebe hido komo dopamo kulihonakuiha:, ba:gala iba:te kebe hido komote kuluhukuma: ibino tepo ipuwoeno ukuilo kemalagidolonakuiha:, ba:moe ba:be komo Godote a:hiduimiya:, puya:te ebe malemalelo demalagidolona, ba:bi tawakalubi kapiyatamo kikalamema:.� 10Ba:bema: Godote dopamo dugumuiya:, ba:ma tetelo ebete ba:be hido komo ebeno Gobogoboeno heloamo atamo a:hawakalimiya:. Ba: hibila, kebe komate Godokono tepo ipuwalo da:pola:na, ebeno Gobogobote ba:bi komo iya:tawanomola, iyo, kebe komate awalela ipuwalo da:pola:na, ba:bi komo hiliyonomo ba: atumu ebete modobonomolo ulamenako. 11Numa:la:, lumagino tepo ipuwoeno ukui eta lumagiti hibilo a:kiya:tawamene, huiyatiya ba:be lumagino gobogobo kapiyate ebeno tepo ipuwoeno komo iya:tawala. Ba: ba:ba ka:na Godokono tepo ipuwoeno ukui eta lumagiti iya:tawa modoboha:, huiyatiya ebeno Gobogobo kapiyate ebeno komo iya:tawala. 12Ba:moe ba:be mabuma: ba:moe hopolo demedehona ba:bi hiya:hiya: gobogobo ipuwalo Godote eta kapiya a hibima: midipa:tamo kikaa:miya:ha:, ao, ebe huiyatiya ebeno Gobogobonomo atamo ikaa:miya:, ba:bene ale ebeno oko kowatinama: ebete kebe hiya:hiya: helo atamo dito dikaa:miya:, ale ebeno Gobogoboeno ukui komodo ba:bi owalubi komo hidamo kiya:tawahama:nema:. 13Ba:be mabuma: ale hopo habanapino mulu iya:tulame komamo Godokono tabo a:kolamagima:lema:, ao, a huiyatiya ebeno Gobogoboeno iya:tulame tabo komamo olamagiminakoma:. Numa:la:, ale Godokono taboeno ipuwa komokomo ebeno Gobogoboeno owalubi komamo da:hawakalilamema:, puya:te ebeno ukuilo demalagidolona ba:ba:te ba:bi taboeno ipuwa komokomo hidamo kuwatema:na:. 14Huiyatiya pote Godokono Gobogoboeno ukuilo emalagidolonaheno, ba:be lumagi modoboha: Godote tawakaluba:tamo dikalamena ba:bi hiya:hiya: helo komo kuwatema:. Ba: hibila, ba:be lumagiti Godokono dito ikame komo hibima: midipa:godolo dulamemene, ba:bi komoeno mabu iya:tawaheno tawakalubino daedae ukui komoma: ba:bo kemalagidoloma:ne. Iyo, Gobogobote ebe owalubihino ebete ba:be Gobogoboeno oko owati komokomo hidamo a:kiya:tawamene. 15Huiyatiya la: numa:la:, pote Godokono Gobogoboeno ukuilo demalagidolona, ba:be lumagi modobola kebe komate ebe ba:gala komo tawakaluba:godolo da:pola:na, ba:bi hiliyonomo komo Gobogoboeno owalubi komamo hidamo kanagilamelelamema:ne. Huiyatiya kalakala konomola, hopo habanapi ipuwalo eta lumagiti modoboha: hibima: mididawagodolo da:pola:na ba:bi komo kanagilamelemema:, mabu Godote ha:kiya ebeno komo kanagilamelemema:ne. 16Ba:be mabuma: Godokono Bukalo eta tabote ba:ma ka:na goena, �Dopamo tupuimi mabuni eta lumagiti Kodawa Godokono tepo ipuwoeno ukui hibilo kalawenakuiha:, ba:bema: eta dawate modoboha: ebe uli komo iya:tumima:!� A hibima: midipa:te huiyatiya Kelisokono tepo ipuwoeno ukui komokomo hiliyonomo ya:lo uwatiya:ma:.

will be added

X\