1 Kol 11

1Iyo, wadiyala la: hibima: midipi hiliyonomoeno ododili komokomo ipuwalo la:le na nibaminatena:la:, nale Kelisoko keba ka:na kibamitinamo ba:ba ka:na. 2Ba:bema: nale la: bimililameholemata, mabu la:eno hiliyonomo ododili komokomo ipuwalo la:le na ba emalagidolone, nale la: dopo soseno ododili komo keba ka:na kiya:tulametanakuima, la: ba:bi komamo hibinomolo ba:ba ka:na papamila:hanamata. 3Huiyatiya na ubila ba:ma tetelo eta uli komo la: kiya:tulamema:, ba:ma ka:na Godote Kelisokono watodawama: keba ka:na keda:na, Kelisote hibima: midipi dubuino watodawama: ba: ba:ba ka:na keda:na, ba:bene hibima: midi dubuti ebeno kamenoeno watodawama: atumu keda:na. 4Ba:bema: la: ipuwalo eta dubuti Godotamo toetoe tabo olamagi tetelo o ebete Godokono ukui hawakalimi tetelo ebeno wato kalikamo da:mula:mene, ba:be ododi komo ba: ebeno watodawa Kelisotamo hilopo ikame komo huiyala. 5- 6Huiyatiya la: ipuwalo eta kamenate ebeno wato kalikamo mula:heno Godotamo toetoe tabo dolamagimini o ebete Godokono ukui sose tawakaluba:tamo da:hawakalimimini, ba:be ododi komo ba: ebeno awitamo hilopo ikame komola, mabu ebeno awi ba: ebeno watodawala. Numa:la:, la: tawakalubino komo ba:ma ka:nala, eta dubuti ebeno kamenoeno konomo kuba mabuma: ebeno hinibo elepe komamo hilopo ebetamo kikamema:ne, ba:bema: la: ipuwalo eta kamenate ebeno wato kalikamo mula:heno hilopoha:ma: deda:mene, wadiyala ebete hilopo na:lawa:mene, kamenoeno awiti hinibo elepe komamo ebetamo hilopo keba ka:na kikamenako ba:ba ka:na. Iyo, la: iya:tawahala, hinibo elepe komo ba:gala hinibo iya:hili komo ba: kamenakamenatamo hilopo ikalame komola, ba:bema: wadiyala iba:te ibino wato kalikamo na:mula:lenakamena:. 7Huiyatiya dubuino komo hiya:la, ebete ebeno wato kalikamo mula:ha:ma: deda:mene hilopo komote a:kitanamene. Numa:la:, Godote dopo dubu ebeno holoholamo ododiya:, ba:bema: ba:ma tetelo dubu hiliyonomate ba:be holoholamo ba emedehona Godokono hido mulu emede ka:ka: komo ba:bo hawakaliminaka. Huiyatiya dubuino hido mulu emede ka:ka: komo kamenakamenate hawakaliminaka, 8mabu Godote dopo dubu ba:gala kamena ba ododili, ebete dubuino ka:ka: kamenagodone kalawiya:ha:, ao, ebete huiyatiya kamenoeno ka:ka: dubugodone lawiya:. 9Ba:gala numa:la:, Godote ebe ha:kiya ebe kokalakaluimima: dopo dubu bododiya:, huiyatiya ebete ba:be dubu kokalakaluimima: dopo kamena akododiya:. 10Ba:bema: la: ipuwalo kamenakamenate ibino wato kalikamo na:mula:lenakamena:, mabu Godote ebeno Gobogoboeno helo iba:tamo dikalami, ibino wato mula:le komote ba:be komo hidamo kohawakalimima:ne. Iyo, ba:be komodo Hunu Haboeno nopopa:te ba:moe komo kiya:tawahama:na:, dubate Godokono hido mulu emede ka:ka: komo keba ka:na ka:hawakaliminaka, talona puliyala hibima: midipi kamenakamenate ba:be atu hido mulu emede ka:ka: komo ba: ba:ba ka:na atumu kohawakalimima:. 11Huiyatiya ba:moe eta komo akadodala:. A hibima: midipi ipuwalo kamenakamenate dubuino komoma: akaga:lala:, �Ale iba:godolo eta owalubi komo a:kuma:lema:,� ba:gala dubate atumu kamenakamenoeno komoma: ba:bako daedae ukui tabo akolamagima:la:. Ao, eba ka:naha:, mabu ale aeno Kodawa ipuwalo ba emedena dubu hiliyonomate kamenakamenagodolo owalubi komo ulamenaka, ba:gala atumu kamenakamena hiliyonomate dubagodone owalubi komo a:kauwatenaka. 12Numa:la:, Godokono ododi komodo dopo kamenate dubugodone uluhukuya:, ba:bene ba:ma tetelo ebeno owalubi komodo dubu hiliyonomate kamenakamena ipuwane a:hawakalahalenaka, iyo, hiya:hiya: tawakalubi ba:gala ilina hiliyonomate ebeno ubi komo kapiyado ba:bema: ikulihonaka. 13Ba:bema: wadiyala la: ha:kiya la:eno ukuia:mo nemalagidolala:, la: ipuwalo eta kamenate ebeno wato kalikamo mula:heno Godotamo toetoe tabo dolamagimini, ba:be komo modobola:ka: o modoboha:ma: ba:keda:mene? 14- 15Numa:la:, Godote pui ebeno ubilo dododiliya:, ba:bi hiya:hiya: tawakalubi ipuwalo komo hiliyonomate ibino tepo ipuwoeno ukuilo na:ga:lana, eta dubuti ga:ga:ga: hinibago demedena ba:be komo ba: kuba hilopo komola, huiyatiya eta kamenate ga:ga:ga: hinibago demedena ba:be komo ba: ebe hagalu kamenama: midi komola. Ba:bema: wadiyala la: ba:be komone niya:tawahala:, Godote kamenakamenatamo ibino ga:ga:ga: hinibo bikalamiya: ba:bi hinibate ibino wato mula:leno ilinama: keda:hanama:. 16Ba:bene la: ipuwalo etate ba:moe komoma: nago olowabeletihuima: dewagelemene, naeno kuititi tabo ebetamo ba:ma ka:na itana, la:eno hopo konomolo puya:te Godokono sose tawakalubima: deda:hana, ibi hiliyonomate ago ukui kapiyama: ba eda:hana kamenakamenoeno komoma: ba: ba:ba ka:na iya:tulamenaka. 17Ba:bema: nale ba:be komo miya:pate nale komo hiya:hiya: komoma: la: diya:tulamema, ba:bi komo ipuwalo nale la: a:kamililamehola:mata, mabu keba tetelo la: da:kapiyuiminakoma, la: la:eno ododili komamo komopino hibima: midi ipuwalo ibi owalubilihino ibi dito kubahilamenakomata. 18Ba:bene dopo komo ba:ma ka:nala, komopa:te na a:kiyanamiya:, la: sose tawakaluba:te da:kapiyuiminakoma la: ipuwalo anagiya:mida komokomo ba:pola:lama:nata. Ba:bema: ibino tabo ga:la ipuwalo nale komo tabo hibima: a:midilimo, 19mabu diyala, ba:bako anagiya:mida komate Godokono ubilo dikulihuya:, la: ipuwalo puya:te ebeno ubi komamo hibilo da:papamila:hanama, la:le ebeno hiya:nomo tuputupu emede ipuwalo ba la:mota:hana, komopa:te ba:be hido emede komo dumilamemena: iba:te ibino kuba ododili komokomo ba:bo kiya:tawahama:na:. 20- 21Huiyatiya numa:la:, la: komopino kuba ododi komo ba: ba:ma ka:nala. La: da:kapiyuiminakoma, la:le Kodawa Ya:suku emalagidolo baa: naha tetelo ebe hibilo kemalagidolonaha:. Iyo, Ya:suku emalagidolo baa: naha tetete peheno, dopamo la:eno poko baa: naha ipuwalo etapa:te etapi emalagidoleheno ibi a:kalatilama:lemata, ba:bene la: komopi ha:kiya la:eno baa: gahugahulu ba naha komopa:tamo malemalelo a:kalabahalama:lemata. Ba:bema: hibila, la:eno ododi ipuwalo komopa:te poko baa: konomamo ba naha huiyatiya komopi baa:te hibilo a:kawigulama:le, komopa:te helo gao beya konomamo niho ipuwalo daedaema: ba eda:ha huiyatiya komopi nonaminalenaka. 22A:iye! Mabu keka: la:le Godokono sose tawakalubi ipuwalo komopi dito tawakalubima: da:midilinakoma? Ba:gala mabu keka: la:le awaepi owalubilihino iba:tamo hilopo dikalamenakoma? La:eno ukui ba:kitana, nale ba:moe ododi komoma: la: da:mililameholema? Ao, mililamehole tabo nagodolo kitanaha:! Ba:moe kapiya tabo la:tamo olamagimo, la:le la:eno ekaka:tamo malemale hawakalimima: ubiha:ma: deda:hama, la:le soseno kapiyuimi komamo akapelama:la:. Wadiyala la: huiyatiya la: ha:kiya la:eno hiya:hiya: genamalo baa: na:nahanakuya:la:. 23Numa:la:, nale Kodawa Ya:sugodone da:lawiya:mo, ba:be atu komo dopamo la: ba:ma ka:na iya:tulamimata, ebeno eta hopodalagiti ebe ebeno anakapumipino kokotamo dihateniya:, ba:be dulu ebete baa: lawenate, 24Godotamo kalakala tabo olamaginate, ba wakamihona ebe ta:matapa:tamo na:goeniya:, �Ba:moe ba: naeno apela, la: mabuma: Godotamo ikamemo. La:le na emalagidolonelo ba:moe komo nododinakuya:la:.� 25Ba:bene baa: naha komote da:wibolameniya:, ebete kalili gala kalawenate na:kagoeniya:, �Ba:moe kalili ba: Godote tawakaluba:go komiloma: uli nopo da:tamotiya: ba:moe ba:be komola, iyo, ba:moe naeno hawiti ba:be nopo bekodakoduimina. Keba tetelo la:le da:nihonakoma, wadiyala na emalagidolonelo nododinakuya:la:.� 26Ba:bema: numa:la:, Kodawate ba:moe hopamo gala peheno, kebe hiya:hiya: tetelo la:le ebe emalagidolo baa: da:nahanakoma ba:gala ebeno hawi kalili da:nihonakoma, ba:bi netewa komodo la: Ya:sukunu hoe komo ba:hawakaliminakomata. 27Ba:be mabuma: kebe lumagiti ebeno tepo ipuwoeno ukuilo Kodawa Ya:suku hibilo adikumihino ebe emalagidolo baa: da:namene ba:gala ebeno hawi kalili da:nimini, ba:be komodo ebete Kodawoeno apeno talona ba:gala hawino talona wakalamiti konomo kuba kododima:ne. 28Ba:bema: lumagiti Ya:suku emalagidolo baa: naheno ba:gala ebete ebeno hawi kalilini nihino, wadiyala ebete dopamo ebeno tepo ipuwoeno komo hidamo nanagiya:midamene, 29mabu kebe dawate Ya:sukunu ape komoeno ipuwa hidamo emalagidoloheno ebe emalagidolo baa: dito da:namene, ba:gala ebeno hawi kalilini dito da:kanimini, ba:be dawoeno komo Godote kubama: kogoema:ne, iyo, ebetamo kuba huiya kikamema:ne. 30Ba:moe ba:be mabuma: apeno temeteme komate la: komo hiliyonomagodolo ba:pola:na, ba:gala tawetawete atumu la: ba ulamena la: ipuwalo komopa:te dito ha:lahuya:. 31Huiyatiya numa:la:, a ha:kiya aeno komo dopamo modobolo danagilamenakoma:, ba:bema: aeno Kodawate aeno komo anagiya:midaa:me tetelo aeno eta ododi komoma: a kubapima: a:kagaa:mene. 32Ba: hibila, keba tetelo ebete a anagiya:midoe ipuwalo kuba huiya dikaa:memene, ebeno ubi komo atamo ba:ma ka:na itananako, ebete a ba:ma tetelo temeteme komamo tuputupulu kemedenama: diya:tua:menako, galane tetelo hopo habanapa:te ibino wiboha: teteno kuba huiya ba uwate, a huiyatiya kuba huiya a:kalawa:ma:. 33Ba:bema: naeno hibima: midipi ekaka:la:, la:le poko baa: ba:gala Ya:suku emalagidolo baa: naha komoma: da:kapiyuiminakoma, wadiyala la: naha tupuimihino tawakalubi hiliyonomoeno pelame komo na:latiminakuya:la:. 34Ba:gala la: ipuwalo baa: kapete kebe lumagi koamo dumimini, wadiyala ebete ebeno genamalo baa: nanekele dopamo nate ba:bene soseno kapiyuimi komamo na:pa:mene, mabu ba:bako ododi komodo kuba huiyate Godogodone la: sose tawakaluba:tamo a:kapa:mene. Ba:bema: kalakala konomola, ba:ma tetelo ba:moi kapiyakapiya komoma: nale la: hidamo a:kiyalamemata, huiyatiya la:eno komo ododili komoma: kebe tabo dulihuimo, nale da:pemo ba:bi komokomo atumu ba:bo kopetuputupuilamema:nemo.

will be added

X\