Taita 3

1I ni ila mɔgɛnu hɛnkili bila ko anu ni sonnɛya kun tiginu anubɛ sɛnbɛ-tiginu ye. Anu ni wonuna kumɛ bira. Anu ni anu tabɛn kɛwɔli-nyimɛ-bɛɛ kɛ tinɛ. 2A fɔ anu ye ko anu kana kuma-yogoma fɔ mɔgɔ wo mɔgɔ ma. Anu kana ma kɛlɛ-tɛgɛlɛnu na. Anu ni ko-nyimɛ kɛ ka anu munyu mɔgɛnu kɔrɔ ado anu kana sɔnkɔ mɔgɛnu ma. 3Ado fɔlɔ nun, kuntan anubɛ kuma-birabɛlɛ anubɛ ko-yogoma-kɛlɛ le male la. Mɔgɛnu ya ma yanfa ko ma ni ma yɔɔnnu na fɛrɛ-nata anubɛ nyɛrɛ-diyana-ko-sufa-bɛɛ bolo. Ma ya mala wati bɛɛ tinya wunduyogoyɛ anubɛ keliyɛ rɔ. Ma gboyara mɔgɛnu ye, ado anu fanan gboyara ma ye. 4Kɔnɔ ma kisilɛ, Allata nyimayɛ anubɛ keninteyɛ bɔra gbɛ rɔ ma ye tumɛ min, 5a ya ma kisi. A ma ma kisi ka a tɛgɛ ma nyɛrɛta kɛwɔli-nyimɛnuna ko la de! A ya wo ma ala kinikinɛ lela ko la. A ya ma kisi ata Ni Sɛnimɛ baraka rɔ min bi sɔrɔn-nya-kurɛ anubɛ ni-kurɛ dila ma ma. Ale le si mɔgɔ yisi ku ka a sɔn sɛninya. 6Ado Alla ara ata Ni Sɛnimɛ labɔn ma kuma bui! A ya wo ma ma kisilɛ Yisa Kirasiti baraka le tɔ. 7Woletɔ ma lanɛ a la ko ma si habadan-nimayɛ sɔrɔn. Yigi wo ye ma bolo bawo ma la ara telen Alla ye Allata hinɛ fɛ. 8Tonyɛ le kɛ la. N bi a fɛ, i ni karan wonu bira bɛrɛkɛ, woletɔ minnu dɛnkɛninyanɛ Alla ma, wonu si to ko-nyimɛ kɛla wati bɛɛ. Wo kin, ado a bɛnnɛ mɔgɛ bɛɛ ma. 9Kuntanya-kumɛ wo, benba-tɔgɔ-rakaran wo, sɔsɔli-sɛ wo, tɔn-wara-ko-kɛlɛ wo, i fara wonu na. Wonu ti ko-wo-ko nyinya. Ko-fuyi le wonu na dɔrɔn. 10Ni mɔgɛ do ye faralɛ kɛla, i ni wo makawandi kinyama fila. Wo kɔma, i makoe kana taran wo la tun 11bawo i ya a lɔn ko wo mɔgɔ sufa hɛnkili rabasannɛ de! A hakɛ ye a yirala a nyɛrɛ la ko ko-yogoma-kɛlɛ le ale la. 12N ba Arimatiya, ni wo ma, Tikika, lata i ma tumɛ min, i raya ka na ke n ma Nikapoli soe burɔ bawo n bara a latɛgɛ ko n ni samɛ kɛ nyɔ. 13I raya ka Apalasi anubɛ n fɛkalɛ Sinasi dɛnbɛ ko anu ni kilɛ bira. Anu makoe taranta fan min bɛɛ la, i ni a ma, anu ni wonu sɔrɔn. 14I ni ila mɔgɛnu karan ko-nyima-kɛ la alako anu ni mɔgɛnu dɛnbɛ anu makoe nyinyɛ la. Anu kana ma mɔgɔ-fuyinu na. 15N fɛ-mɔgɛnu bi i kɔndɔnna. I ni dɛnkɛninya-mɔgɛ-bɛɛ kɔndɔn nyɔ. Allala hinɛ ni to wo dama fɛ.

will be added

X\