Romu 7

1N na kelen nyɔgɛnu, n bi a fɛ ka min fɔ wo ye, wo si wo nya-yen bawo wo dama ya tɔn wara-koe lɔn. Ma tenbi ma niyi la, furu-tɔn siginɛ ma kuma. 2Kei-wara-sigi-musi si ma kɛ misalɛ la ma ye. Fananta ala kei ye a kɛndɛ la, anubɛ ala kei ti fara muk! Kɔnɔ ni a fagara, ala musi ara bɔ tɔn wo kɔrɔ. 3Woletɔ ni a sigira kei gbɛrɛ wara ala kei ma faga wɛ tumɛ min, mɔgɛnu si a kele ko yɛlan. Kɔnɔ ni ala kei fagara, musi wo ara bɔ tɔn wo kɔrɔ. Woletɔ hali a sigira kei gbɛrɛ wara wo kɔma, a ma yɛlɛnyɛ kɛ worɔ. 4N na kelen nyɔgɛnu, wole fanan bi wo nya le. A manɛ iko wole ara faga ka bɔ tɔn kitabu kɔrɔ ka kofu Kirasiti ma. Kaka, wo ara ma aletɛ la. Ado a wulita ka bɔ furinu tɛma alako wo ni ma gbɔ-nyimɛ la Alla ye. 5Ma ye ma sɔn-kɔrɛnu da kun tɔ tumɛ min, tɔn kitabu wara-koe le ya a ma, nata-yogomɛnu wulita ma yisi rɔ. Anu tora wɔlila ma bagbuyinu tɔ ka a laban sayɛ ma ma bolo. 6Hali wo kaka, ma ara hɔrɔya ka bɔ tɔn kitabu wo kɔrɔ bawo min ya ma bira fɔlɔ nun ka ma ladon yɔɔnyɛ rɔ, ma ara faga ka bɔ wo kɔrɔ. Ma ma to ma sɔn-kɔrɛnu da kun tɔ fɔ Allata Ni Sɛnimɛ ye sɔn-kurɛ minnu dila ma ma. 7Ma si nfen fɔ worɔ? Ma si a fɔ ko tɔn kitabu wo nyɛrɛ le hakɛ la, wa? Ade! Tɔn kitabu wara-koe le ya a ma, n ya nta hakɛ lɔn. Ado ni Nɛbi Musata tɔn do ma a fɔ nun ko n kana n niyi sa mɔgɔna-fan kuma, n ti a lɔn ko hakɛ le wo la nun. 8Kɔnɔ hakɛ le ya a ma, nata su bɛɛ wulita nde rɔ tɔn wo fɛ. Ado ni tɔn wara-ko sa nun, hakɛ ti sɛnbɛ sɔrɔn ma ma nun. 9Yanni n ni tɔn wara-koe lamɔɛn, n bi n niyi la nun. Kɔnɔ n ya tonyɛ lɔn tumɛ min, hakɛ wulita n yisi rɔ ha n fagara. 10Ado tɔn wara-koe min kakɛn ka niyi di n ma, wo nara sayɛ la nde ye 11bawo hakɛ ya fɛrɛ sɔrɔn ka n yanfa tɔn wara-koe fɛ. Ka a tɛgɛ tɔn wara-koe ma, hakɛ ya n kan natɛgɛ. 12Tɔn kitabu nyɛrɛ sɛnima, a telenta, a kin. 13Hakɛ ya ko-nyimɛ do kɛ n ye, Nɛbi Musata tɔn kitabu kɔni. Wo le nara sayɛ la n kuma. Kɛ mara le alako n ni a lɔn hakɛ ye nya min! Tɔn kitabu le ya a yira ma la ko hakɛ yogo dɔgɔma ma de! 14Ma ya a lɔn ko Alla le ya tɔn kitabu di n ma kɔnɔ mɔgɔni-gbuyi le nde la. A manɛ iko n bi yɔɔnyɛ la hakɛ bolo. 15N bi min mala, n ma wo lɔn. Ado n bi a fɛ ka min ma, n sa wo mala. Ado min ma di n ye, n bi wo le mala. 16N sa a fɛ ka min ma, n ba wo ma tumɛ min, wo si a yira ko n bara sɔn ko Allata tɔn kitabu telenta. 17Nde sa ko kɛnu mala n nyɛrɛ ma fɔ hakɛ min bi n tɔ. 18N ya a lɔn ko ko-nyimɛ woo sa nta hadama-denyɛ rɔ. Ado hali ko-nyimɛ kɛ-sɔgɛ ye n na, n ti ke a mala. 19N bi a fɛ ka ko-nyimɛ minnu ma, n sa wonu mala. Kɔnɔ n sa a fɛ ka ko-yogomɛ minnu ma, n bi wonu denu mala. 20N sa a fɛ ka minnu ma, ni n ya wonu ma, wo kɔrɛ le ko nde sa wonu mala n nyɛrɛ ma fɔ hakɛ min bi n tɔ. 21N bara a yen worɔ ko koe do ye mala n na. Ko-nyimɛ kɛ-sɔgɛ wa n bira tumɛ min, n ni n nyɛrɛ yen ko-yogomɛnu da kun tɔ. 22Ado n sewanɛ n yisi rɔ ka a tɛgɛ Allala tɔn wara-koe ma. 23Kɔnɔ ko do ye wɔlila nde rɔ, min bi Allala tɔn wara-koe kɛlɛla n yisi rɔ. Wo ara n ma yɔɔn la hakɛ kɔrɔ. Ado wo si n mara. 24E, mɔgɔ-tɔrɔnɛ le nde la feu! Yon si n nakanan hakɛ ma min bi n halakila n fɛrɛ-bɔnkɛ kɛ rɔ? 25Tabarakala Alla ma, a si n nakanan ma Mari Yisa, Allata-Mɔgɔ-Yabɔnɛ baraka rɔ! I ma a yen? A sɔgɛ ye n na, n ni ma Allala yɔɔn la n yisi rɔ kɔnɔ nta hadama-denyɛ rɔ, n bi yɔɔnyɛ la hakɛ kɔrɔ.

will be added

X\