Romu 6

1Ma si nfen fɔ worɔ? Ma ni to hakɛ kɛla alako Allala hinɛ ni wara, wa? 2Ade! A manɛ iko ma ara faga alako hakɛ kana sɛnbɛ sɔrɔn ma kuma tun. Ma si to hakɛ kɛla kama worɔ tun? 3Ado wo ya kɛ lɔn serr, ko ma dɛnkɛninyara Yisa, Allata-Mɔgɔ-Yabɔnɛ ma tumɛ min ka batasi a tɔgɛ rɔ, mabɛ wo mara mɔgɔ kelen na ala sayɛ fɛ. 4Ma batasira tumɛ min, mabɛ Yisa togonta ma nyɔgɔn fɛ. Wo le, iko Kirasiti wulita nya min ka bɔ furinu tɛma ma Fa Allata gbiliyɛ anubɛ sɛnbɛ fɛ, male fanan ni to ni-kurɛ rɔ wo nya na le. 5Ado mabɛ Yisa fagara ma nyɔgɔn fɛ min kɛ, ma si wuli iko a wulita nya min. 6Ado ma ya a lɔn ko ma sɔn-kɔrɛ wo, wo ara faga Kirasiti fɛ ata kɔlɔma ma. Wo mara le alako hakɛ kana sɛnbɛ sɔrɔn ma kuma tun ka ma to hakɛ-yɔɔnyɛ kɔrɔ. 7Ni mɔgɛ fagara wati min, wo tigi ara hɔrɔya hakɛ-sɛnbɛ ma. 8Mabɛ Kirasiti fagara ma nyɔgɔn fɛ min kɛ, ma lanɛ a la ko mabɛ ale si na nimayɛ kɛ fanan ma nyɔgɔn fɛ. 9Ado ma ya a lɔn ko Kirasiti ara wuli ka bɔ furinu tɛma. A ti faga tun mumɛ! Sɛnbɛ sa sayɛ bolo ale kuma hali! 10Ata fagɛ kelan wo ara a ma, hakɛ ti nɔ-ko sɔrɔn a ma. A ye a niyi la kaka alako a ni Alla sako kɛ. 11Wo ni wo miri wo nyɛrɛ ma iko wo faganɛ, woletɔ hakɛ ti nɔ-ko sɔrɔn wo ma. Wo ni Alla sako kɛ kaka Kirasiti baraka rɔ. 12Wo kana sɔn, hakɛ ni nɔ-ko sɔrɔn wo ma alako wo ni to wo nyɛrɛ wasala wo diyana koenu tɔ. 13Wo kana wo nyɛrɛ bagbuyi lasɔnnaya hakɛ ye. Fɔ ka wo nyɛrɛ lasɔnnaya Alla ye telenbagaya kɛ tinɛ bawo wo ara bɔ sayɛ rɔ ka sɛgi nimayɛ rɔ. 14Ado nɔ-wo-nɔ sa hakɛ bolo wo kuma tun bawo wo sa Nɛbi Musata tɔnnu kɔrɔ tun fɔ Allata hinɛ. 15Nba, a ye kama worɔ? Ma ye Allala hinɛ kɔrɔ min kɛ, ma sa tɔn kɔrɔ tun, ma ni to hakɛ kɛla worɔ, wa? Ade! 16Ado wole ya a lɔn ko wo wa wo nyɛrɛ lasɔnnaya iko yɔɔn ka mɔgɛ dola kumɛ bira, wo ara ma yɔɔn la kun tigi wo ye. Ni wo tora hakɛ kɛla, wo si ma yɔɔn la hakɛ kɔrɔ, min si a laban sayɛ ma, ni wo ma, wo si ma Allala yɔɔn la ala kuma-birɛla ko la, min si a laban ko-latelennɛ ma Alla ye. 17Fɔlɔ nun, wo ye yɔɔnyɛ rɔ hakɛ kɔrɔ kɔnɔ kaka, ma si Alla tanto! Wo ara karan min sɔrɔn Alla wara-koe rɔ, wo ye wo birala wo yisi bɛɛ la. 18Nba, wo ara hɔrɔya hakɛ ma ka ma yɔɔn la telenbagayɛ ye. 19(N ya yɔɔnya-koe ma misalɛ la wo ye bawo wo si wo le nya-yen, ado wo rafaganɛ Alla wara-koe rɔ.) Fɔlɔ nun, wo ya wo nyɛrɛ to ko-yogomɛ anubɛ sɔn-yogoyɛ kɔrɔ iko yɔɔn. Kɔnɔ kaka, fɔ wo ni wo nyɛrɛ to ko-sɛnimɛ anubɛ telenbagayɛ kɔrɔ iko yɔɔn alako wo si ma Allata mɔgɔ-kɛndɛnu na nya min. 20Wo ye hakɛ-yɔɔnyɛ kɔrɔ tumɛ min, Alla diyana koe bɔrɔbɔnɛ wo ye. 21Wo ya koe minnu ma fɔlɔ nun, wo miliyanɛ minnu na kaka, wo ya nfen tɔnɛ sɔrɔn wonu tɔ? Wonuna ban le sayɛ la. 22Kɔnɔ kaka, wo ara hɔrɔya hakɛ ma ka ma Allala yɔɔnnu na. Woletɔ wo si tɔnɛ min sɔrɔn, wo le sɛninyɛ la Alla ye. Ado tɔ-a-la, wo si habadan-nimayɛ sɔrɔn. 23Hakɛ sarɛ le sayɛ la kɔnɔ Allala sanbɛ le habadan-nimayɛ la ma Mari Yisa, Allata-Mɔgɔ-Yabɔnɛ baraka rɔ.

will be added

X\