1 Ma si nfen fɔ ma benba Iburayimala ko la? A ya hɛnkili nyamintan sɔrɔn dɛnkɛninyɛ wara-koe rɔ? 2 Ni ma benba Iburayima telenta Alla yala a nyɛrɛta kɛwɔlɛnu fɛ, nyɛrɛ-matɔgɔ-kunyɛ ye a bolo nun worɔ. Kɔnɔ a ti ke a nyɛrɛ matɔgɔla Alla yala mumɛ! 3 A sɛbɛnɛ Allala kitabu rɔ ko, “Iburayima dɛnkɛninyara Alla le ma. Nba, ata dɛnkɛninyɛla ko la, Alla ya a lɔn mɔgɔ-latelennɛ la.” 4 Mɔgɛ min bara wɔlɛ kɛ, wo si a sarɛ sɔrɔn. Ale ti ala sarɛ wo yen iko di-ma-le. A si a yen iko a sarɛ. 5 Mɔgɔ ti ke wɔli woo kɛla min si a ma, a ni telen Alla yala. Alla si mɔgɔ-yilikinɛnu ma fɛɛbɔnɛnu na bawo a si wonu natelen a nyɛrɛ ma anuta dɛnkɛninyɛ fɛ. 6 Mansa Dawuda ya mɔgɛnu bara-koe fɔ minnu telenta Alla yala hali anu ma wɔlɔ-nyima kɛ. A ko mɔgɔ-sewanɛ le wo mɔgɛnu na. 7 A sɛbɛnɛ Mansa Dawuda bolo ko, “Mɔgɔ-sewanɛ le wo tigi la, minna hakɛ ma ara koto, ado Alla ara anuna hakɛ yamatogon! 8 Mɔgɔ-sewanɛ le wo tigi la, Mari ma hakɛ yen min ma!” 9 Mansa Dawuda ya sewɛ minna ko fɔ, wo ye Yahudiyanu denu dɔrɔn ye, ka, minnu kemininyara? Wo ma de, hali kemininyabɛlɛnu. Ado ma ara a fɔ nun ko Iburayimata dɛnkɛninyɛla ko la, Alla ya a yatɛ mɔgɔ-latelennɛ la. 10 Iburayima telenta Alla yala tumɛ nyamintan? A mara yanni a ni kemininya, ka, ala kemininyɛ kɔma? Yanni a ni kemininya, a telenta Alla yala. 11 Iburayima telenta Alla yala ka a tɛgɛ ata dɛnkɛninyɛ ma. Wo kɔma, a kemininyara alako ala kemininyɛ ni ma koe kɛnu tamasere la. Woletɔ minnu bara dɛnkɛninya Alla ma, Iburayima mara wonu bɛɛ benba la. Alla ara wonu lɔn mɔgɔ-latelennɛ la, hali anu kemininyabɛlɛ. 12 Minnu kemininyanɛ, wonu fanan benba le ale Iburayima la kɔnɔ ka a tɛgɛ anuna kemininyɛ wo ma. Iburayima mara anu benba la bawo yanni a ni keminiya tumɛ min, a ye dɛnkɛninyɛ min tɔ nun, anu denu fanan taranta dɛnkɛninya kelan wo rɔ. 13 Alla ya lanyiri kiri Iburayima anubɛ a bɔnsɔn ye ko duninya si ma anutɛ la. Ka a fɔ ko a ya lanyiri kɛ kiri bawo Iburayima ya Allata tɔn kitabu bira, wo ma. Kɔnɔ a kirita ala dɛnkɛninyɛla ko la. Woletɔ Alla ya a lɔn mɔgɔ-latelennɛ la. 14 Ado Alla ya lanyiri min kiri, ni wo kirita tɔn-biralɛnu denu dɔrɔn ye, mɔgɔla dɛnkɛninyɛ ara ma fuyi la worɔ. Allala lanyiri fanan ma ko nyinya. 15 Nɛbi Musata tɔn kitabu wara-koe ara a ma, Allala diminyɛ ara yigi ma kan ma. Kɔnɔ Allata tɔn kitabu sa kan min, tɔn-tinyɛ sa nyɔ hali! 16 Alla ya lanyiri min kiri, mɔgɛ si wo tɔnɛ sɔrɔn dɛnkɛninyɛ fɛ. Wo mara le alako lanyiri wo ni ma di-ma-le la. Lanyiri wo kirita Iburayima anubɛ a bɔnsɔnnu ye kɔnɔ a sa tɔn-biralɛnu dɔrɔn ye. Minnu bara dɛnkɛninya Alla ma iko Iburayima ya a ma nya min, a ye wonu fanan ye. Ado ma dama benba le Iburayima la dɛnkɛninyɛ fɛ. 17 Iko a sɛbɛnɛ Allala kitabu rɔ nya min, Alla ya a fɔ Iburayima ye ko, “N bara i ma sibolo siyaman benba la.” Ado lanyiri wo kanbalita bawo Iburayima dɛnkɛninyara Alla ma. A lanɛ a la ko Alla si furinu nawuli. Ado Allata kumɛ si a ma, fan minnu sa nyɔ nun, wonu ni taran nyɔ. 18 Yigi woo sa Iburayima ma wati min den sɔrɔn koe rɔ, a dɛnkɛninyara, ado a ya a yigi sa Allata lanyiri-kirinɛ kuma. Woletɔ a mara “sibolo siyaman benba la.” Iko a sɛbɛnɛ Allala kitabu rɔ nya min, a ko, “I kegeyɛ si siyaya iko lolenu.” 19 Hali Iburayima ya a lɔn ko a siyi ma ara dɔgɔya, ala dɛnkɛninyɛ ma dɔgɔya. A tora doni, a sɔrɔn ni san kɛmɛ bɔ. Ado ala musi Sira ma den sɔrɔn bɛ. 20 A ma ala dɛnkɛninyɛ boloka. Ka a tɛgɛ lanyiri wo ma, a ma sika Alla rɔ. Ala dɛnkɛninyɛ ya a sɛnbɛ kuma sa, woletɔ a ya Alla tanto. 21 Ado a lara a la serr, ko Alla ara lanyiri min kiri a ye, a si wo lakanbali. 22 Woletɔ Iburayimata dɛnkɛninyɛ ya a ma, Alla ya a “yatɛ mɔgɔ-latelennɛ la.” 23 Kumɛ wonu sɛbɛni ma Iburayima dɔrɔnna ko la. 24 Anu sɛbɛnɛ male fananna ko la. Alla ya male yatɛ mɔgɔ-latelennɛnu na bawo ma ara dɛnkɛninya Alla ma, min ya ma Mari Yisa lawuli ka a bɔ furinu tɛma kɔni. 25 Yisa fagara alako ma hakɛnu ma ni koto. A wulita alako ma la ni telen Alla ye.
