Romu 16

1Ma na-kelen-nyɔgɔ-musi Fibi min bi wɔlila Kɛnkariya chɔchi la, n bi a matɔgɔla. 2Wo ni a rabira Mari tɔgɔ rɔ iko a bɛnnɛ wole, Allala mɔgɛnu ni a ma nya min. A makoe ye min bɛɛ la wo bolo, wo ni a dɛnbɛ wonu na bawo a ara nde dɛnbɛ anubɛ mɔgɔ siyaman. 3N bi Pusila anubɛ Akuwila kɔndɔnna, mabɛ minnu bi wɔlila Kirasiti Yisa ye. 4Anu bara anu niyi fili nde ye. Mabɛ sibolo gbɛrɛnuna chɔchi bɛɛ ye baraka birala anu ye. 5Chɔchi mɔgɛ minnu si anu nadɛn anuna bɔn la, wonu fanan kɔndɔn n ye. Wo ni n diyana-mɔgɛ Ipinɛta kɔndɔn. Ale le fɔlɔn mara dɛnkɛninya-mɔgɛ la Kirasiti ye Esiya nyamanɛ rɔ. 6Mariyama fanan kɔndɔn min wɔlita wo ye bɛrɛkɛ! 7Andonaika anubɛ Yuniya kɔndɔn n ye. N Yahudiya-nyɔgɛ le wonu na minnu bi yele la n fɛ nun. Anu malɔnnɛ bɛrɛkɛ kilayɛnu tɛma, ado anu fɔlɔn dɛnkɛninyara nde ko. 8Ampilati kɔndɔn n ye. N diyana-mɔgɛ le ale la Marita diyanayɛ rɔ. 9Yurabanasi fanan kɔndɔn n ye ma wɔli-kɛ-nyɔgɛ le Kirasitila wɔlɛ rɔ. Wobɛ n diyana-mɔgɛ Sataki kɔndɔn. 10Apɛlɛsi fanan kɔndɔn minta lanaya-koe ara bɔ gbɛ rɔ Kirasiti ye. Aritobulula denbayɛ fanan kɔndɔn. 11Hɛrodiyan fanan kɔndɔn. N Yahudiya-nyɔgɛ le. N na kelen nyɔgɔn dɛnkɛninya-mɔgɛnu kɔndɔn minnu bi Nasisala denbayɛ rɔ. 12Tarifina anubɛ Tarifosa kɔndɔn n ye minnu wɔlita Mari ye bɛrɛkɛ anubɛ n diyana-mɔgɛ Perasi. Ale fanan wɔlita Mari ye duk! 13N bi Rufasi kɔndɔnna minta wɔlɛ da rakolo Mari ye anubɛ a na min bara n tabira iko ala dan. 14Asinkariti kɔndɔn n ye anubɛ Filegan anubɛ Hemisi anubɛ Patirobasi anubɛ Hemasi anubɛ n na kelen nyɔgɔn dɛnkɛninya-mɔgɛ toe bɛɛ minnu bi anu fɛ. 15Filologasi anubɛ Yuliya kɔndɔn anubɛ Nirusi anubɛ a na-kelen-nyɔgɔ-musi anubɛ Olimpa anubɛ Allala mɔgɛ min bɛɛ ye anu fɛ nyɔ. 16Wo ni wo nyɔgɔn kɔndɔn ka wo nyɔgɔ ramɔnsɔn iko na kelenmɛnu. Kirasitila chɔchi mɔgɛ bɛɛ ye wo kɔndɔnna. 17N na kelen nyɔgɛnu, n bi wo madiyala ko wo ni a ma wo fɛrɛma mɔgɛ wonuna ko la minnu bi dan-nafarɛ kɛla wo tɛma. Wonu bi mɔgɛnu nasamala ka anu bɔ anuna dɛnkɛninyɛ rɔ. Wo ara karan-bɛrɛ min sɔrɔn, anu bi wo tinyana. Wo ni wo masɛgi mɔgɛ wonu na feu! 18Ado minnu bi ko sufa wonu mala, wonu sa wɔlila ma Mari Yisa, Allata-Mɔgɔ-Yabɔnɛ ye fɔ anu nyɛrɛ buyi. Anu bi mɔgɔ-magbalanɛnu yanfala anuna kuma teleka-telekɛnu anubɛ matɔgɔlɛ fɛ. 19Mɔgɛ bɛɛ ara wola lanaya-koe lamɔɛn kibara-nyimɛla ko la. Woletɔ n sewanɛ wola ko la. N bi a fɛ, wo ni ma hɛnkilimɛnu na ko-nyimɛ wara la kɔnɔ wo ni ma mɔgɔ-magbalanɛnu na ko-yogomɛ wara la. 20Alla min bi yisi-kimɛ dila ma ma, wo ti mɛ Setanɛ kasarala wo kin kɔrɔ. Ma Mari Yisala hinɛ ni to wo fɛ. 21N wɔli-kɛ-nyɔgɔn Timoti ye wo kɔndɔnna anubɛ n Yahudiya nyɔgɛnu Lusiya anubɛ Yeson anubɛ Sosipata fanan. 22Nde, Tatiyasi min bi kɛdi kɛ sɛbɛla Pɔli ye, n bi wo kɔndɔnna Mari tɔgɔ rɔ. 23N yiyalɛ, Keyasi, chɔchi si ladɛn minna bɔn la, a ye wo kɔndɔnna. Irasita min bi soe-wodi-lamarala anubɛ ma na kelen nyɔgɔn Kuwata, wonu fanan bi wo kɔndɔnna. [ 24Ma Mari Yisa, Allata-Mɔgɔ-Yabɔnɛta hinɛ ni to wo dama fɛ.] 25Ma ni gbiliyɛ di Alla ma bawo ale le si ke ka wo lasɔ yiri, wola dɛnkɛninyɛ rɔ iko Yisa, Allata-Mɔgɔ-Yabɔnɛ wota kibara-nyimɛ ye nya min, n bi min nakela wo ma kɔni. Ado tonyɛ kɛ dogonnɛ wo ma nun kebi fɔlɔ 26kɔnɔ kaka, tonyɛ wo ara bɔ gbɛ rɔ nɛbinuna sɛbɛlɛnu tɔ. Sibole bɛɛ nara ke gbundi wo lɔnna Allala kumɛ fɛ. Ado Alla ye nyɔ habadan! Woletɔ mɔgɛnu ni dɛnkɛninya a ma ka ala kumɛ bira. 27Alla kelen pe min kelan ye hɛnkilimɛ la, alamɛ gbiliyɛ dira ale ma Yisa Kirasiti baraka rɔ habadan! Amina!

will be added

X\