1 Sɛnbɛ ye male min na dɛnkɛninyɛ la, a kakɛn, min tafaganɛ ma ni wonu sɛnbɛ don ka anu dɛnbɛ anuna dunɛnu bila. Ma kana bila ma nyɛrɛ diyana koenu dɔrɔn fɛ. 2 Ma kelen-kelennamɛ-bɛɛ ni ko-nyimɛ kɛ ma na kelen nyɔgɛnu ye min si anu hɛnɛ alako anu ni sabati dɛnkɛninyɛ rɔ. 3 Ado Kirasiti ma a raya a nyɛrɛ-hɛnɛ-koe la. A sɛbɛnɛ Yaburi kitabu rɔ ko, “Anu bi mɔɛn-kumɛ minnu natala ile Alla ma, wo ye sɛgila nde, ala wɔli kɛlɛ le ma.” 4 Min bɛɛ sɛbɛnɛ Allala kitabu rɔ kɔrɔma la, wo sɛbɛnɛ alako ka ma karan. Anu si a ma, ma ni ma munyu ka ma sɛnbɛ don alako ma si yigi sɔrɔn nya min. 5 Nba, Alla min bi munyu anubɛ yisi-kimɛ dila ma ma, alamɛ wo ya wo dɛnbɛ alako wo ni to sɔn kelen tɔ wo nyɔgɔn fɛ ka bila Kirasiti Yisala misalɛ fɛ. 6 Wo si ma alako wo dama ni Mari Yisa Kirasiti Fa Alla tanto kan kelen tɔ. 7 Wo ni wo nyɔgɔn tabira Allala gbiliyɛla ko la iko Kirasiti ara wo rabira nya min. 8 Ado n bi a fɔla wo ye ko Kirasiti mara Yahudiyanuna wɔli kɛlɛ la ka a mayira ko Alla si ala lanyiri latɔnbagaya min kirinɛ ma benbanu ye. 9 A ya wo ma fanan alako sibolo gbɛrɛnu ni Alla tanto ala kinikinɛla ko la. Iko a sɛbɛnɛ kitabu kan tinɛ donu tɔ nya min ko, “E Alla, n si i matɔgɔ sibolo gbɛrɛnu yala. N bi tantoli-bɛti bɔla i ye.” 10 A sɛbɛnɛ fanan ko, “Sibolo gbɛrɛnu, wo ni sewa Allala mɔgɔ yabɔnɛnu fɛ.” 11 Awa, a sɛbɛnɛ tun ko, “Sibolo gbɛrɛnu ni Mari tanto. Bɛɛ ni a tanto kosɛbɛ!” 12 Wo kɔma, Nɛbi Aiseya ya a sɛbɛ ko, “Mansa kurɛ si bɔ Dawudala kebilɛ rɔ. A si sibolo gbɛrɛnu mara. Anu si anu yigi sigi ale rɔ.” 13 Ma yigi siginɛ Alla min tɔ, alamɛ wo ya wo lafa sewɛ anubɛ yisi-kimɛ la wola dɛnkɛninyɛ fɛ. Wola yigi min bi Yisa rɔ, wo ni to warala Allata Ni Sɛnimɛ baraka rɔ. 14 N na kelen nyɔgɛnu, nde lanɛ a la ko wo fanɛ ko-nyimɛ la. Ado wo fanɛ lɔnnɛ bɛɛ la fanan. Tonyɛ le, wo si ke wo nyɔgɔn makawandila. 15 Kɔnɔ kɛdi kɛ rɔ, Alla ara n yisi ragbɛlɛya ka wo hɛnkili bila koe donu ko. Ka ma Kirasiti Yisala wɔli kɛlɛ la sibolo gbɛrɛnu ye, Alla ya wo fɛrɛ di n ma. N tenbi Allala kibara-nyimɛ-kawandili bɔla, n bi saraka-masɔ-wɔlɛ le kɛla. N ya wo ma le alako sibolo gbɛrɛnu ni ma kɔ-fen-nyimɛ la Alla ye. Anu sɛninyanɛ a yala ata Ni Sɛnimɛ baraka rɔ. 17 N si ke n nyɛrɛ matɔgɔla nta wɔlɛla ko la Alla ye Kirasiti Yisa baraka rɔ. 18 N sa kuma gbɛrɛkɛ fɔla fɔ Kirasiti ya min ke nde wara la dɔrɔn. Sibolo gbɛrɛnu bara Allala kumɛ bira ka a tɛgɛ nde, Pɔlila kawandilɛ anubɛ n kɛ-nya ma. 19 N ya tamaserenu anubɛ kabana-ko-sɛnbɛmɛnu kɛ Allata Ni Sɛnimɛta sɛnbɛ fɛ. Woletɔ ka a dabira Yerusalɛm ha ka ta ke Ilirikim, n bara tagama wo bɛɛ rɔ Kirasitita kibara-nyimɛ lake-koe la. 20 Mɔgɔ ma Kirasiti tɔgɔ fɔ kan min wɛ, a sɔgɛ ya n bira ka kibara-nyimɛ lake nyɔ bɛɛ rɔ. N kana nna bɔn sɔ mɔgɔ gbɛrɛla bon-kurukɛnɛ kuma. 21 Wo ma-sɔgɛ ye n na iko a sɛbɛnɛ Allala kitabu rɔ nya min ko, “Alla wara-koe ma fɔ minnu ye, wonu si a yen. Minnu ma a wara-koe lamɔɛn bɛ tele kelen bɛrɛni, wonu si a nya-yen.” 22 Ta-sɔgɛ ye n na nun ka ke wo ma kɔnɔ ka a tɛgɛ nna wɔlɔ siyamɛ ma, n ma fɛrɛ sɔrɔn. 23 Kɔnɔ kaka, n bara nna wɔlɛ dafa nyamanɛ kɛnu tɔ. A sɔgɛ ye n na san siyaman kɔrɔ ko n ni ta ke wo ma. 24 A di n ye hali kaka, n ni ta ke wo ma. N tenbi tala Sipeni nyamanɛ rɔ tumɛ min, n si ke wo ma. N ba wati-kunduni kɛ wo fɛ diyanayɛ rɔ tumɛ min, wo si n madɛnbɛ tala nyɔ. 25 Kɔnɔ kaka, n bi tala Yerusalɛm, Allala mɔgɛnu dɛnbɛ tinɛ. 26 Chɔchi minnu bi Masidoniya sigisɔn anubɛ Akeya sigisɔn rɔ, wonu bara a latɛgɛ anu nyɛrɛ ma ka bolo-kolɔnnu dɛnbɛ Allala mɔgɛnu tɛma Yerusalɛm. 27 Anu denu denu ya wo latɛgɛ. Ado a bɛnnɛ anu ni bolo-kolɔn wonu dɛnbɛ. Nyɔ-Yahudiyanu bara duwɛ donu sɔrɔn sibolo gbɛrɛnu na min kɛ, woletɔ a bɛnnɛ sibolo gbɛrɛnu ni Yahudiyanu makoe nyinya anu nyɛrɛ bolo-fannu tɔ. 28 N ba ban wodi wo dantɛgɛla anu ma, n tenbi tala Sipeni, n si tenbi wo kɔndɔnna nyɔ. 29 N ya a lɔn ko n ba na ke wo wara tumɛ min, n si Kirasitila duwɛ-bɛrɛbɛrɛ latenbi wo ma. 30 N na kelen nyɔgɛnu, ka a tɛgɛ mala dɛnkɛninyɛ ma ma Mari Yisa, Allata-Mɔgɔ-Yabɔnɛ ma anubɛ ata Ni Sɛnimɛ ye keninteyɛ min dila ma ma, n bi wo madiyala ko wo ni wo raya n fɛ Alla madiya tinɛ nde ye. 31 Wo ni a madiya ko Alla ni n tanka dɛnkɛninyabɛlɛ-wasinɛnu ma Yudiya nyamanɛ wo rɔ. A madiya fanan ko nta wɔlɛ Yerusalɛm, wo ni diya ata mɔgɛnu ye nyɔ. 32 Woletɔ ni Alla sɔnta, n sewanɛ si ta wo taran. Ado n tenbi nyɔ, n si wo wara-koe diya bɔ. 33 Alla min bi yisi-kimɛ dila ma ma, alamɛ wo tora wo dama fɛ. Amina!
