Romu 14

1Mɔgɛ minnuta dɛnkɛninyɛ ma kolo wo tɛma, wo ni wonu tabira. Ka a fɔ ko kɛ bɛnta, kɛ ma bɛn, wo sɔsɔli sufa kana na wo tɛma. 2Mɔgɛ do lanɛ a la ko a si ke fan bɛɛ dɔnna. Mɔgɛ minta dɛnkɛninyɛ ma kolo, wo ti soge dɔn fɔ sɛnita-fannu gbansan! 3Mɔgɛ min da tanɛ sa, wo kana mɔgɛ doi wo lafɛya. Min bi sɛnita-fannu gbansan dɔnna, wo kana doi rasɛ min bi fan bɛɛ dɔnna bawo Alla ara anu filɛ bɛɛ rabira. 4Yon bi ile la min bi mɔgɔ gbɛrɛla wɔli kɛlɛ rasɛla? Ni a buira wo, a sɔra wo, wo bɛɛ tonɛ a tigi le ma. Ado wɔli kɛlɛ wo si ke a sɔla bawo Alla min bi ma tigi la, wo si ke a mala, a ni sɔ. 5Donu miriya ko tele do tenbira do la. Donu miriya ko tele bɛɛ kelen. Wo ye min mala, bɛɛ ni wo latɛgɛ a nyɛrɛ yisi rɔ. 6Minnu miriya ko tele do ma tenbi tele do la, anu bi wo mala Marita gbiliyɛla ko la. Minnu bi fan bɛɛ dɔnna, anu bi wo mala Marita gbiliyɛla ko la fanan. Ado anu bi baraka birala Alla ye dɔn-fan wola ko la. Minnu sa fan donu dɔnna, wonu fanan bi wo mala Marita gbiliyɛla ko la. Ado anu fanan bi baraka birala Alla ye. 7Ado ma fenfen sa belila ma nyɛrɛ ma. Ma fenfen sa fagala ma nyɛrɛ ma. Ni ma belita, ma belinɛ Mari hɛnɛ koe la. 8Ni ma fagara, ma faganɛ Mari hɛnɛ koe la. Ma belinɛ wo, ma faganɛ wo, Maritɛ le male la tolon! 9Ado Kirasiti fagara ka wuli ka niyi lafɛ tun alako a ni ma Mari la kɛndɛwaganu anubɛ furinu ye. 10Ile min bi i dɛnkɛninya-nyɔgɛ rasɛla, i ye wo mala nfenna? I ye i dɛnkɛninya-nyɔgɛ lafɛyala nfenna? Kiti-tɛgɛ-lunyɛ, ma dama si sɔ Alla yakɔrɔ. 11Ado a sɛbɛnɛ Allala kitabu rɔ ko Mari ara a keli a nyɛrɛ rɔ ko mɔgɛ bɛɛ si na a nyɛnkin a ye. Mɔgɛ bɛɛ si a fɔ a dɛ la ko Mari le Alla la. 12Ma kelen-kelennamɛ-bɛɛ si ma nyɛrɛ dantɛgɛ Alla ye worɔ. 13Woletɔ ma ni fara ma nyɔgɔn tasɛla. Ado wo ni a latɛgɛ ko wo kana ko-wo-ko ma min si wo na kelen nyɔgɔn kian latugu. Wo kana a ma, a ni bui hakɛ rɔ. 14N bi Mari Yisa rɔ min kɛ, wo ara a yira n na yati, ko dɔn-fen woo sa min natinyanɛ Alla yala. Kɔnɔ ni mɔgɛ do lanɛ a la ko dɔn-fan do latinyanɛ le, a la ara tinya ale ye worɔ. 15Ni wo ya fɛɛ sa wo na kelen nyɔgɛla dɛnkɛninyɛ la wola dɔn-fanla ko la, wo sa tagamana keninteyɛ rɔ tun. Kirasiti fagara mɔgɛ min ye, wo kana sɔn, wola dɔn-fan ni wo tigi halaki! 16Wo ya min lɔn ko-nyimɛ la, wo kana sɔn, mɔgɛ ni wo lɔn ko-yogomɛ la ila ko-ladan-nya fɛ. 17Allala mansayɛ ma dɔn-fan anubɛ minni-fan la fɔ telenbagayɛ anubɛ yisi-kimɛ anubɛ sewɛ, Allata Ni Sɛnimɛ ye min su dila kɔni. 18Min bɛɛ si wɔlɛ kɛ Kirasiti ye kilɛ kɛ fɛ, wo tigi si diya Alla ye ka tɔgɔ-nyimɛ sɔrɔn mɔgɛnu bolo. 19Nba, koe minnu si yisi-kimɛ lana anubɛ minnu si ma nyɔgɔn sɛnbɛ don, fɔ ma ni to wonu mala tuma-wo-tuma. 20Alla ara min nadan, mɔgɔ kana wo tinya dɔn-fanla ko la. Dɔn-fan bɛɛ si dɔn kɔnɔ min si mɔgɔ do labui hakɛ rɔ, wo dɔn ma telen. 21Min fisa, sogo-dɔn wo, gbɛɛ-minyɛ wo, ko-wo-ko min si a ma, wo na kelen nyɔgɛ la ni bui ala dɛnkɛninyɛ rɔ, wo kana wonu ma. 22Wo lanɛ min na koe kɛnu tɔ, wo ni wo lamara wo nyɛrɛ anubɛ Alla tɛma. Ni mɔgɛ ya a lɔn ko a ye ko-latelennɛ le mala, ado a ma sika a nyɛrɛ rɔ, wo tigi sewanɛ le. 23Kɔnɔ ni a sikanɛ ala dɔn-fan rɔ, a wa a dɔn tumɛ min, Alla si a yiliki bawo a ma a dɔn dɛnkɛninyɛ fɛ. Ado ni wo ya ko-wo-ko ma wo sikanɛ min tɔ, hakɛ le wo la.

will be added

X\